ខេត្តតាកែវ ៖ ការប្រកួតកីឡាបាល់ទាត់លក្ខណៈមិត្តភាពអន្តរជាតិ ដែលគេប្រសិទ្ធនាមថា Yamaha Challenge International Friendly 2014 ដែលរៀបចំឡើងដោយសហព័ន្ធកីឡាបាល់ទាត់កម្ពុជា នឹងចាប់ផ្តើមជាផ្លូវការនាវេលាម៉ោង២រសៀលថ្ងៃសុក្រ ទី២២ សីហា នៅលើទីលានបាល់ទាត់បាទី ខេត្តតាកែវ ។ ព្រឹត្តិការណ៍នេះមានការចូលរួមពីក្រុមយុវជនថ្នាលអាយុក្រោម១៤ឆ្នាំ (U-14) ជប៉ុន និងសិង្ហបុរី រួមទាំងក្រុម U14 កម្ពុជាចំនួន៤ក្រុមធ្វើការប្រកួតប្រជែងគ្នាដណ្តើមពានរង្វាន់ខាងលើនេះ ។
លោកម៉ៃ តុលា អគ្គលេខាធិការរងសហព័ន្ធកីឡាបាល់ទាត់កម្ពុជាបានឱ្យដឹងថា សហព័ន្ធនិងក្រុមហ៊ុន Yamaha របស់ជប៉ុនបានចុះអនុស្សរណៈយោគយល់គ្នា (MOU) មួយកាលពីពេលថ្មីៗកន្លងទៅនេះ ស្តីពីការបង្កើតព្រឹត្តិការណ៍ប្រកួតបាល់ទាត់ជាលក្ខណៈមិត្តភាពអន្តរជាតិនៅមជ្ឈមណ្ឌលសាលាកីឡាបាល់ទាត់ជាតិបាទី។ ព្រឹត្តិការណ៍នេះនឹងប្រព្រឹត្តទៅចាប់ពីថ្ងៃទី២២ ដល់២៤ ខែសីហា ដោយមានកីឡាករ៦ក្រុមចូលរួមប្រកួត ក្នុងនោះមានក្រុម U-14 Gifu Prefecture Selection (ជប៉ុន), ក្រុម U-14 GFA Singapore (សិង្ហបុរី) និងក្រុម U-14 កម្ពុជា យើងដែល៤ក្រុម គឺក្រុមសាលាកីឡាបាល់ទាត់ជាតិ, ក្រុមភ្នំពេញក្រោន, ក្រុមខេត្តស្វាយរៀង និងក្រុមអាកាសចរណ៍ស៊ីវិល ដែលជាអតីតម្ចាស់ជើងឯកពានរង្វាន់ជាតិ U-13 កម្ពុជា កាលពីឆ្នាំ២០១៣ កន្លងទៅ ។
លោកម៉ៃ តុលា បានបញ្ជាក់ថា គោលបំណងនៃការរៀបចំព្រឹត្តិការណ៍នេះឡើង គឺដើម្បីផ្តល់ឱកាសឱ្យក្មេងៗដែលជាយុវជនថ្នាលរបស់ប្រទេសជាតិយើង ធ្វើការប្រកួតដកស្រង់បទពិសោធន៍ និងបច្ចេកទេសថ្មីៗពីគ្នាទៅវិញទៅមក ជាពិសេសគឺក្រុម U-14 ជបុ៉នតែម្តង។ ម្យ៉ាងវិញទៀត វាក៏ជាការបង្កើនកិច្ចសហប្រតិបត្តិការល្អរវាងសហព័ន្ធកីឡាបាល់ទាត់កម្ពុជា និងសហព័ន្ធកីឡាបាល់ទាត់ជប៉ុនផងដែរ ដែលជាដៃគូអភិវឌ្ឍន៍មួយដ៏សំខាន់សម្រាប់អនាគតកីឡាបាល់ទាត់កម្ពុជាយើង ៕
ចែករំលែកព័តមាននេះ