រាជធានីភ្នំពេញ ៖ តាំងពីបានខ្សែក្រវាត់ពីប្រទេសបារាំង កីឡាការិនីជើងខ្លាំង នាង វី ស្រីខួច នៅមិនទាន់បានឡើងសង្វៀនប្រដាល់ម្ដងនោះឡើយ ។ ប៉ុន្តែនៅថ្ងៃអាទិត្យសប្តាហ៍នេះ នាងនឹងឡើងប្រកួតយកពានមួយទៀតហើយ បន្ទាប់នៅក្នុងដៃមានពានជើងឯកមួយ និងខ្សែក្រវាត់មួយប្រកបដោយមោទនភាព ។
វី ស្រីខួច បានផ្ដល់សម្ភាសន៍ដោយផ្ទាល់នៅសង្វៀនទូរទស្សន៍បាយ័នថា មួយរយៈនេះ នាងមិនបានប្រហែសនោះទេ បន្ទាប់ពីត្រូវស្ថានីយទូរទស្សន៍បាយ័នផ្ដូផ្គងឲ្យឡើងប្រកួតដណ្ដើមពាន ជាមួយកីឡាការិនី សឹង តុ នៅថ្ងៃអាទិត្យ ទី២៤ សីហា នេះ។ កីឡាការិនីទាំងពីរធ្លាប់ប៉ះគ្នាច្រើនលើកមកហើយ ដោយក្នុងពេលខ្លះវី ស្រីខួច ឈ្នះ និងពេលខ្លះ សឹង តុ ឈ្នះ។ យ៉ាងណាក៏ដោយ ក្នុងការប៉ះគ្នាលើកចុងក្រោយ ជើងខ្លាំងសឹង តុ បានរបូតតំណែងជើងឯករបស់ទូរទស្សន៍បាយ័នទៅឲ្យវី ស្រីខួច ដែលក្រោយមកនាងក៏ហាក់បណ្ដែតខ្លួនឲ្យក្លាយជាកីឡាការិនីបាត់បង់ថាមពលទៀត ព្រោះតែស្ថានភាពក្រីក្រ និងមិនបានហ្វឹកហាត់ជាប់លាប់។
តាមការបញ្ជាក់ ជីវភាពជាក់ស្ដែងរបស់កីឡាការិនីទាំងពីរ ស្ថិតក្នុងសភាពក្រលំបាកដូចគ្នា ។ ប៉ុន្តែ វី ស្រីខួច ហាក់មានឱកាសប្រសើរជាង ដោយសារតែនាងអាចផ្អាកការងារធ្វើសំណង់ និងការងារក្នុងរោងចក្រដែលធ្លាប់ប្រឡូកមកចំណាយពេលហាត់រត់ និងចូលក្លិបហ្វឹកហាត់ទៀងទាត់ ។ ផ្ទុយទៅវិញ កីឡាការិនីសឹង តុ នៅតែប្រើកម្លាំងដដែលទេ បន្ថែមពីអាជីពប្រដាល់ដែលយូរៗម្តងទើបបានឡើងរេញយកប្រាក់នោះ ។ កីឡាការិនី សឹង តុ ក្នុងពេលនេះអាចមិនមែនជាដៃគូរបស់កីឡាការិនីវី ស្រីខួច នោះទេ ដោយសារតែស្ថានភាពគ្រួសារហាក់រុញឲ្យនាងដកឃ្លាកាន់តែឆ្ងាយពីការហ្វឹកហាត់ ។ យ៉ាងណាក៏ដោយជើងខ្លាំងរូបនេះនៅតែជាដៃគូម្នាក់ ដែលធ្វើឲ្យកីឡាការិនី វី ស្រីខួច ញញើតញញើមជាងគេ ពិសេសគឺស្នៀតទាត់និងជង្គង់ បើទោះជានាងហាក់អន់កម្លាំងមិនដូចមុនក្ដី ។
វី ស្រីខួច និយាយថា ពានជើងឯកដែលគ្រោងដណ្ដើមគ្នានៅថ្ងៃអាទិត្យនេះ មិនមែនជាពានជើងឯកទូរទស្សន៍បាយ័ន ដែលនាងធ្លាប់ដណ្ដើមបានកាលពីឆ្នាំមុននោះទេ ប៉ុន្តែជាពានមួយថ្មី ដែលខាងទូរទស្សន៍បាយ័នរៀបចំឡើង ឱ្យពួកយើងទាំងពីរប្រជែងដណ្ដើមយក។ ទោះជានាងធ្លាប់ចាញ់កីឡាការិនីសឹង តុ នាពេលកន្លងមក តែនាងនៅតែមានជំនឿថា ឈ្នះដោយមិនតឹងតែងនោះឡើយសម្រាប់ការប៉ះគ្នាជាថ្មីនៅសង្វៀនបាយ័នស្ទឹងមានជ័យ នាថ្ងៃអាទិត្យ នេះ។ ជំនឿចិត្តនេះ កើតឡើងបន្ទាប់ពីនាងមានពេលហាត់រត់រាល់ព្រឹក និងបានរំលឹកក្បាច់គុនជាមួយគ្រូបង្វឹករាល់ល្ងាច ក្រោយពេលទំនេរមិនធ្វើការងារ ។ គាប់ជួនជានាងនៅពេញកម្លាំង និងទើបផ្ដួលកីឡាការិនីជនជាតិបារាំង ក្នុងព្រឹត្តិការណ៍ជើងឯកអាស៊ី-អឺរ៉ុបនៅក្នុងប្រទេសបារាំងមុននេះបន្តិចផង ទើបនាងគិតថាសឹង តុ មិនមែនជាឧបសគ្គទៀតទេ។ វី ស្រីខួចនិយាយថា «សម្រាប់ខ្ញុំត្រៀមខ្លួនឈ្នះសម្រាប់ការប្រកួតដណ្ដើមពានលើកនេះរួចហើយ ព្រោះតាំងពីខ្ញុំមកពីបារាំង ខ្ញុំមានពេលហ្វឹកហាត់ច្រើន!»។
មន្ត្រីទូរទស្សន៍បាយ័នប្រាប់ថា ការរៀបចំព្រឹត្តិការណ៍ដណ្ដើមពាននេះ មានបំណងឲ្យវី ស្រីខួច ដែលទើបឈ្នះពាន និងខ្សែក្រវាត់ពីបារាំង បានឡើងប្រកួតយកប្រាក់លាន និងកុំឲ្យមហាជនភ្លេចឈ្មោះ ។ មន្ត្រីដដែលនេះ ប្រាប់ថា ការប្រកួតនេះ ខ្លួននៅមិនទាន់អស់ចិត្តនោះទេ ក្នុងពេលដែលវី ស្រីខួច ពិបាករកដៃគូ ដែលតម្រូវឲ្យនាងប្រកួតតែជាមួយគូបដិបក្ខដដែលៗ ដែលនាងធ្លាប់ផ្ដួល ។ ប៉ុន្តែក៏គ្រាន់បើជាងឲ្យនាងនៅស្ងៀម ហើយមិនមានចំណូលពីការប្រដាល់នោះដែរ។ មកទល់ពេលនេះ ក្ដីបារម្ភនៅតែកើតឡើង ដោយសារវត្តមានអ្នកប្រដាល់នារីថ្មីមិនមានទាល់តែសោះ ក្នុងពេលដែលដៃគូចាស់ៗទាំងអស់របស់វី ស្រីខួច កាន់តែលាឈប់ជិតអស់ហើយ ៕
ចែករំលែកព័តមាននេះ