រាជធានីភ្នំពេញ ៖ ប្រភពពីមន្ត្រីជាន់ខ្ពស់របស់គណបក្សសង្គ្រោះជាតិ កាលពីថ្ងៃទី២១ សីហា ២០១៤ នេះ បានឱ្យដឹងថា គណបក្សសង្គ្រោះជាតិបានដាក់បញ្ជីបេក្ខជនប្រធាន អនុប្រធាន និងមន្ត្រីគណៈកម្មការរបស់ខ្លួនទៅកាន់សភា ដើម្បីសុំការផ្តល់សេចក្តីទុកចិត្តដោយបោះឆ្នោតគាំទ្រពីសមាជិកសភា ឬតំណាងរាស្ត្រមកពីគណបក្សប្រជាជនកម្ពុជា ដែលកំពុងកាន់អំណាច ។
ការអះអាងរបស់មន្ត្រីគណបក្សសង្គ្រោះជាតិធ្វើឡើង ស្របពេលដែលប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានប្រកាសកាលពីពេលថ្មីៗនេះថា សមាជិកសភាគណបក្សប្រជាជនកម្ពុជារបស់លោក នឹងបោះឆ្នោតគាំទ្រសមាជិកគណៈកម្មការនានារបស់គណបក្សសង្គ្រោះជាតិ នៅពេលសភាប្រជុំនៅក្នុងសម័យប្រជុំសភានាសប្តាហ៍ក្រោយនេះ។
គណបក្សសង្គ្រោះជាតិបានឱ្យដឹងថា សមាជិកគណៈកម្មការនានាសរុបមាន៤៦នាក់ ក្នុងនោះមានតួនាទីជាប្រធាន អនុប្រធានគណៈកម្មការនីមួយៗ ព្រមទាំងសមាជិកផងដែរ ។ លោកអេង ឆៃអ៊ាង ជាប្រធានគណៈកម្មការទី១ ទទួលបន្ទុកសិទ្ធិមនុស្ស ទទួលពាក្យបណ្តឹងស៊ើបអង្កេត ។ លោក ប៉ុល ហំម ជាប្រធាន គណៈកម្មការទី២ អភិវឌ្ឍផែនការកសិកម្ម លោកយ៉ែម ប៉ុញ្ញារិទ្ធ ជាប្រធាន គណៈកម្មការកិច្ចការអប់រំ យុវជន លោកជំទាវ មួរ សុខហួរ ជាប្រធានគណៈកម្មការកិច្ចការសុខាភិបាល ការងារ សង្គមកិច្ច លោកយឹម សុវណ្ណ ជាប្រធានគណៈកម្មការបោសសំអាត ប្រឆាំងអំពើពុករលួយ លោកសុន ឆ័យ អនុប្រធានគណៈកម្មការសេដ្ឋកិច្ច ហិរញ្ញវត្ថុ និងធនាគារ លោកឡុង រី ប្រធានគណៈកម្មការសន្តិសុខ និងការពារជាតិ លោកម៉ៅ ម៉ូនីវណ្ណ អនុប្រធានគណៈកម្មការគមនាគមន៍ រ៉ែ និងថាមពល លោកជំទាវជូឡុង ស៊ូម៉រ៉ា ប្រធានគណៈកម្មការកិច្ចការបរទេស និងលោកអ៊ូ ច័ន្ទរិទ្ធ អនុប្រធានគណៈកម្មការនីតិកម្ម។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ