ខេត្តកំពង់ធំ ៖ លោកវរសេនីយ៏ត្រី ញ៉ែម ឈុនលី អធិការនគរបាលក្រុងស្ទឹងសែនបានឲ្យដឹងថា ដោយទទួលបទបញ្ជាពីលោកឧត្តមសេនីយ៏ត្រី ជូ សំអាន ស្នងការនគរបាលខេត្ត និងលោកវរសេនីយ៏ឯក កែ ខាន់ណារ៉ា ស្នងការរងទទួលបន្ទុកព្រហ្មទណ្ឌ កម្លាំងនៃអធិការដ្ឋានគរបាលក្រុងស្ទឹងសែន បានឃាត់ខ្លួនជនសង្ស័យដែលជាមុខសញ្ញាចោរលួច និងប្លន់ម៉ូតូប្រជាពលរដ្ឋម្នាក់ កាលពីរសៀលថ្ងៃទី០១ សីហា នៅចំណុចមុខសណ្ឋាគារសំបូរព្រៃគុបជិតគល់ស្ពានកំពង់ធំ និងដកហូតបានកាំភ្លើងខ្លី១ដើម ម៉ាកK54 ដែលមានគ្រាប់ចំនួន៨គ្រាប់ និងបង់កាំភ្លើង១ ។
នៅចំពោះមុខសមត្ថកិច្ចជនសង្ស័យឱ្យដឹងថា ខ្លួនឈ្មោះ ព្រំ សំអុល ភេទប្រុស អាយុ៣៩ឆ្នាំ រស់នៅភូមិទឹកម្លាង ឃុំសណ្តាន់់ ស្រុកសណ្តាន់ ធ្លាប់ជាប់គុក១ដង ពីបទលួចម៉ូតូប្រជាពលរដ្ឋ ។ លុះចេញពីគុកមកវិញ នៅចុងខែមិថុនា ឆ្នាំ២០១៤ រូបខ្លួនក៏បានលួចយកកាំភ្លើងខ្លីម៉ាក K54 ខាងលើនេះ ពីឈ្មោះ វុធ ជាអ្នករកស៊ីនៅខេត្តកំពង់ចាម ក្រោយមករូបគេក៏បានយកកាំភ្លើងខ្លីដែលលួចបាននោះ ទៅធ្វើសកម្មភាពភ្ជង់ប្លន់យកម៉ូតូម៉ាកវ៉េវអាល់ហ្វា ពណ៌ខ្មៅ គ្មានស្លាកលេខពីបុរសមិនស្គាល់ឈ្មោះម្នាក់ នៅចំណុចភូមិបឹង តំបន់ក្បាលជ្រូក ស្ថិតក្នុងឃុំមានរិទ្ធ ស្រុកសណ្តាន់ យកមកជិះមិនទាន់បាន់ប៉ុន្មានថ្ងៃផង ម៉ូតូនោះក៏ត្រូវគេលួចបន្តទៀតបាត់ទៅ ។ មុនពេលឃាត់ខ្លួនរូបគេបានមករង់ចាំជិះរថយន្តនៅចំណុចគល់ស្ពានកំពង់ធំ ក្នុងគោលបំណងធ្វើដំណើរទៅកាន់តំបន់៩៩ ក្នុងភូមិសាស្ត្រស្រុកសណ្តាន់វិញ ក៏ត្រូវសមត្ថកិច្ចចាប់ខ្លួនតែម្តង ។
លោកវរសេនីយ៏ឯក កែ ខាន់ណារ៉ា ស្នងការងទទួលបន្ទុកព្រហ្មទណ្ឌបានឲ្យដឹងដែរថា បន្ទាប់ពីបានទទួលពាក្យបណ្តឹងពីខាងជនរងគ្រោះ លោកឧត្តមសេនីយ៏ត្រី ជូ សំអាន ស្នងការនគរបាលខេត្តកំពង់ធំ បានដាក់បទបញ្ជាឲ្យតាមដានស្រាវជ្រាវ រកមុខសញ្ញាចាប់ជនសង្ស័យយកមកផ្តន្ទាទោសទៅតាមផ្លូវច្បាប់ឲ្យខាងតែបាន រហូតមកដល់ ថ្ងៃទី០២ ខែសីហា ឆ្នាំ ២០១៤ ជនសង្ស័យឈ្មោះ ព្រំ សំអុល ត្រូវសមត្ថកិច្ច កសាងសំណុំរឿងបញ្ជូនទៅកាន់សាលាតំបូងខេត្តចាត់ការតាមនីតិវិធី ៕
ចែករំលែកព័តមាននេះ