ខេត្តកំពង់ឆ្នាំង ៖ សាលាដំបូងខេត្ត បានសម្រេចឃុំខ្លួនជនជាប់ចោទម្នាក់ដាក់ពន្ធនាគារខេត្ត កាលពីល្ងាចថ្ងៃទី៣១ កក្កដា ក្នុងបទចោទប្រកាន់រំលោភប្រពន្ធមិត្តភក្តិរបស់ខ្លួន កាលពីវេលាម៉ោង១០និង៣០នាទីយប់ ថ្ងៃទី២៩ កក្កដា នៅឃុំកំពង់ត្រទ្បាច ស្រុកកំពង់ត្រទ្បាច ។
លោកវរសេនីយ៍ត្រី ឌុច ចំរើន នាយការិយាល័យនគរបាលព្រហ្មទណ្ឌកម្រិតធ្ងន់ នៃស្នងការដ្ឋាននគរបាលខេត្ត បានឱ្យដឹងថា ជនដែលតុលាការសម្រេចឃុំខ្លួននេះ ឈ្មោះ ជឹម បឿន អាយុ២៩ឆ្នាំ មានទីលំនៅក្នុងខេត្តកណ្តាល តែមានប្រពន្ធនៅភូមិឃុំកន្លែងកើតហេតុខាងលើ ខណៈមកធ្វើជាកម្មករទ្បឥដ្ឋនៅទីនោះ ។ ចំណែកស្ត្រីរងគ្រោះអាយុ២៤ឆ្នាំ មានប្តីនិងកូន២នាក់ ដែលកូនប្អូនទើបមានអាយុ៤ខែប៉ុណ្ណោះ។
លោកវរសេនីយ៍ត្រីបន្តថា នៅមុនពេលកើតហេតុ ជនឈ្មោះ ជឹម បឿន បានផឹកស៊ីជាមួយមនុស្ស៤-៥នាក់ អស់ស្រាចំនួន៤លីត្រ ។ ក្រោយពេលស្រវឹង ជននេះបានត្រទ្បប់ទៅផ្ទះវិញ ពេលទៅដល់ផ្ទះបានប្រើប្រពន្ធកោសខ្យល់ឱ្យ តែប្រពន្ធមិនកោសខ្យល់ឱ្យទេ ព្រោះទើបឈ្លោះគ្នាកាលពីថ្ងៃ ។ បន្ទាប់មក បុរសរូបនេះបានដើរទៅផ្ទះស្ត្រីរងគ្រោះ ខណៈដែលប្តីនាងមិននៅ គឺទៅដេកយាមនៅទ្បឥដ្ឋ ហើយលបទ្បើងចូលមុងរំលោភរហូតបានសម្រេច ព្រោះស្ត្រីរងគ្រោះច្រទ្បំស្មានថា ជាប្តីរបស់ខ្លួន ។ ប៉ុន្តែមុនពេលចេញទៅវិញ ស្ត្រីរងគ្រោះមានការសង្ស័យបើកភ្លើងអាគុយមើល ទើបដឹងថា មិនមែនជាប្តីរបស់ខ្លួន តែក៏មិនហា៊នមាត់កអ្វីដែរ ព្រោះយល់ថា ចាំស្អែកនឹងប្តឹងសមត្ថកិច្ច ។ លុះប្រហែលជាង១ម៉ោងក្រោយមក ស្រាប់តែឃើញជននេះមកលបបើកមុងចូលបម្រុងរំលោភម្តងទៀត ទើបស្ត្រីរងគ្រោះស្រែកផ្អើលដល់អ្នកជិតខាង ហើយមានមនុស្សជាច្រើននាក់ ស្ទុះចូលមកឃើញជនសង្ស័យចេញពីក្នុងមុងស្ត្រីរងគ្រោះរត់ត្រទ្បប់ទៅផ្ទះវិញ ។
ស្អែកទ្បើងថ្ងៃទី៣០ កក្កដា ជនឈ្មោះ ជឹម បឿន ត្រូវបានចាប់ខ្លួនតាមពាក្យបណ្តឹងរបស់ស្ត្រីរងគ្រោះ រួចបញ្ជូនមកស្នងការដ្ឋាននគរបាលខេត្ត ហើយកសាងសំណុំរឿងបញ្ជូនទៅសាលាដំបូងខេត្ត និងបានសម្រេចឃុំខ្លួននៅវេលាម៉ោង៥ល្ងាច ថ្ងៃទី៣១ កក្កដា។ លោកនាយការិយាល័យបន្តថា តាមចម្លើយសារភាពរបស់ជននេះ ក្រៅពីប្រព្រឹត្តអំពើមិនគប្បីជាមួយប្រពន្ធមិត្តភក្តិជាកម្មករជាមួយគ្នា ហើយនោះ កាលពីនៅខេត្តកណ្តាលធ្លាប់មានទោសពីបទរំលោភដូចគ្នានេះដែរ ហើយបានគេចមកធ្វើជាកម្មករទ្បឥដ្ឋនៅខេត្តកំពង់ឆ្នាំង និងនៅមិនចោលមារយាទចាស់ត្រូវចាប់ចូលគុកម្តងទៀត ៕
ចែករំលែកព័តមាននេះ