រាជធានីភ្នំពេញ ៖ អ្នកស្រី រ័ត្ន សុភាព ដែលគេស្គាល់ថាជាថៅកែផ្សារព្រែកព្នៅ ក្នុងខណ្ឌព្រែកព្នៅ និងជាអ្នកម៉ៅការយកភាស៊ីផ្សារក្នុងខណ្ឌដូនពេញផងដែរ កាលពីវេលាម៉ោង៩និង៣០នាទីព្រឹកថ្ងៃទី១ សីហា ត្រូវបាននគរបាលព្រហ្មទណ្ឌកម្រិតស្រាលរាជធានីភ្នំពេញ ឃាត់ខ្លួន ខណៈអ្នកស្រីកំពុងធ្វើដំណើរតាមរថយន្ត ។
សមត្ថកិច្ចដែលបានចុះទៅឃាត់ខ្លួនអ្នកស្រី រ័ត្ន សុភាព នេះ ដឹកនាំដោយលោកវរសេនីយ៍ទោ ជាវ វិបុល នាយរងការិយាល័យនគរបាលព្រហ្មទណ្ឌកម្រិតស្រាល និងបានឃាត់ខ្លួននៅម្តុំស្តាតចាស់ ខណ្ឌទួលគោក ពេលអ្នកស្រី រ័ត្ន សុភាព កំពុងធ្វើដំណើរតាមរថយន្តម៉ាកកាមរីបាឡែនចេញពីផ្ទះក្នុងគោលបំណងទៅផ្សារព្រែកព្នៅ ដែលជាផ្សាររបស់គាត់ម៉ៅការភាស៊ី ។ លោកវរសេនីយ៍ទោ ជាវ វិបុល ដែលចុះទៅឃាត់ខ្លួនមិនបានធ្វើអត្ថាធិប្បាយទាក់ទងទៅនឹងការឃាត់ខ្លួនថៅកែផ្សារព្រែកព្នៅនេះទេ ដោយលោកគ្រាន់តែបង្ហើបថា ជាការអនុវត្តតាមដីកាឱ្យនាំខ្លួនរបស់លោកស្រី ពេជ ម៉ារ៉ែន ចៅក្រមស៊ើបសួរសាលាដំបូងរាជធានីភ្នំពេញប៉ុណ្ណោះ ។
ទោះបីជាបែបណា ប្រភពព័ត៌មានបានឱ្យដឹងថា ការឃាត់ខ្លួនអ្នកស្រី រ័ត្ន សុភាព នោះ គឺជាប់ចោទក្នុងរឿងរំលោភលើទំនុកចិត្ត ពាក់ព័ន្ធនឹងលុយកាក់ច្រើនម៉ឺនដុល្លារទៅលើភាគីម្ខាងទៀតដែលជាដើមបណ្តឹង ។ នៅវេលាម៉ោង១និង៣០នាទីរសៀលថ្ងៃដដែល អ្នកស្រី រ័ត្ន សុភាព ត្រូវបាននគរបាលនាំខ្លួនទៅកាន់សាលាដំបូងរាជធានីភ្នំពេញ ដើម្បីប្រគល់ជូនលោកស្រីចៅក្រមសាកសួរតាមដំណើររឿង ៕
ចែករំលែកព័តមាននេះ