រាជធានីភ្នំពេញ ៖ ក្រសួងការបរទេសសហប្រតិបត្តិការអន្តរជាតិកាលពីថ្ងៃទី១ សីហា បានចេញសេចក្តីថ្លែងការណ៍របស់អ្នកនាំពាក្យឆ្លើយតបនឹងសេចក្តីថ្លែងការណ៍របស់សមាគមអាដហុក ចុះថ្ងៃទី៣០ កក្កដា ស្តីពី «ការជួញដូរមនុស្ស និងការជួញដូរកម្លាំងពលកម្ម ក្រោមរូបភាព អាពាហ៍ពិពាហ៍នារីកម្ពុជាជាមួយបុរសចិន» ដែលត្រូវបានផ្សព្វផ្សាយដោយបណ្តាញសារព័ត៌មានមួយចំនួនបង្ហាញថា មានស្ត្រីខ្មែរ២៩៥នាក់បានរងគ្រោះក្នុងអំពើជួញដូរមនុស្ស និងការជួញដូរកម្លាំងពលកម្ម ក្រោមរូបភាពរៀបការជាមួយជនបរទេស ។
សេចក្តីថ្លែងការណ៍របស់អ្នកនាំពាក្យក្រសួងការបរទេស និងសហប្រតិបត្តិការអន្តរជាតិបានបំភ្លឺថា ៖
១-ក្រសួងការបរទេស និងសហប្រតិបត្តិការអន្តរជាតិ និងស្ថានទូត-ស្ថានអគ្គកុងស៊ុលកម្ពុជានៅប្រទេសចិន តែងយកចិត្តទុកដាក់ជានិច្ច ដោយសហការជាមួយអាជ្ញាធរចិន និងអង្គការទេសន្តរប្រវេសន៍អន្តរជាតិ ក្នុងការជួយសង្គ្រោះទាន់ពេលវេលា ពលរដ្ឋខ្មែរដែលរងគ្រោះទោះក្នុងរូបភាពណាក៏ដោយ ដោយមិនទុកឱ្យនៅបន្តរងគ្រោះ ដូចដែលសមាគមអាដហុក បានធ្វើការចោទប្រកាន់នោះឡើយ ។
២-ក្នុងរយៈពេល៧ខែ ដើមឆ្នាំ២០១៤ ក្រសួងការបរទេស និងសហប្រតិបត្តិការអន្តរជាតិ បានទទួលពាក្យបណ្តឹងមានចំនួនច្រើន ក្នុងនោះក្រសួងការបរទេស និងសហប្រតិបត្តិការអន្តរជាតិ និងស្ថានទូត-ស្ថានអគ្គកុងស៊ុលកម្ពុជា បានដោះស្រាយ និងបញ្ជូនស្ត្រីខ្មែររងគ្រោះចំនួន១៨នាក់ត្រឡប់មកកម្ពុជាវិញ ។ រីឯអ្នកដទៃទៀត ស្ថានតំណាងកម្ពុជាកំពុងដោះស្រាយជាមួយអាជ្ញាធរមានសមត្ថកិច្ចចិន ។ ៣-ក្រសួងការបរទេស និងសហប្រតិបត្តិការអន្តរជាតិ បានធ្វើការងារជាមួយស្ថានឯកអគ្គរដ្ឋទូតចិនប្រចាំកម្ពុជាផងដែរ ដើម្បីទប់ស្កាត់កុំឱ្យមានការជួញដូរស្ត្រីខ្មែរតាមរូបភាពអាពាហ៍ពិពាហ៍នេះ ។ ស្ថានឯកអគ្គរដ្ឋទូតចិនប្រចាំកម្ពុជា បានរឹតបន្តឹងក្នុងការផ្តល់ទិដ្ឋាការដល់ស្ត្រីខ្មែរនៅលីវ ដោយបានកំណត់ឱ្យមានលិខិតអញ្ជើញត្រឹមត្រូវពីភាគីចិនជាមុន ហើយបើទៅប្រទេសចិនជាអ្នកទេសចរ ត្រូវតម្កល់ប្រាក់ចំនួន១០.០០០ ដុល្លារអាមេរិក (មួយមុឺនដុល្លារ) ក្នុងធនាគារចិនជាមុនសិន ។
៤-ដោយកន្លងមកមេខ្យល់មានការលំបាកក្នុងការសុំទិដ្ឋាការចូលប្រទេសចិនឱ្យស្ត្រីខ្មែររងគ្រោះ ពីស្ថានទូតចិនប្រចាំនៅកម្ពុជា មេខ្យល់ទាំងនោះក៏ទៅសុំទិដ្ឋាការពីស្ថានទូត-ស្ថានអគ្គកុងស៊ុលចិននៅបរទេសវិញ ។ ដោយសារមានបញ្ហាបែបនេះទៀត ក្រសួងការបរទេស និងសហប្រតិបត្តិការអន្តរជាតិ បានស្នើក្រសួងការបរទេសចិន ឱ្យស្ថានទូត-ស្ថានអគ្គកុងស៊ុលចិនទាំងអស់ នៅបរទេស ជាពិសេសនៅប្រទេសថៃ វៀតណាម និងឡាវ បញ្ឈប់ការផ្តល់ទិដ្ឋាការដល់ស្ត្រីខ្មែរនៅលីវ ហើយក្រសួងការបរទេស និងសហប្រតិបត្តិការអន្តរជាតិ បានណែនាំស្ថានទូត-ស្ថានអគ្គកុងស៊ុលកម្ពុជានៅប្រទេសចិន មិនឱ្យបញ្ជាក់លិខិតនៅលីវឱ្យស្ត្រីខ្មែរដែលនៅទីនោះ ដើម្បីចៀសវាងកុំឱ្យមេខ្យល់ នាំយកទៅរៀបការជាមួយបុរសជនជាតិចិន ។
មុននេះ តាមសេចក្តីថ្លែងការណ៍របស់សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា ហៅកាត់ថា«អាដហុក» ចុះថ្ងៃទី៣០ កក្កដា បានបង្ហាញថា ក្នុងរយៈពេល៦ខែដើមឆ្នាំ២០១៤ សមាគមមានការចាប់អារម្មណ៍ខ្លាំងចំពោះស្ថានភាពស្ត្រីកម្ពុជា ដែលជារឿយៗតែងតែរងគ្រោះពីការជួញដូរផ្លូវភេទ ក្រោមរូបភាពរៀបអាពាហ៍ពិពាហ៍ ជាមួយបុរសជាជនបរទេស ។ សេចក្តីថ្លែងការណ៍ដដែល បានឱ្យដឹងទៀតថា ក្នុងរយៈពេលនេះ សមាគមទទួលពាក្យបណ្តឹងទាក់ទងនឹងការជួញដូរមនុស្សចំនួន១០៨ករណី ពាក់ព័ន្ធនឹងការជួញដូរទៅប្រទេសផ្សេងៗ ដែលមានជនរងគ្រោះសរុបចំនួន២៩៥នាក់ ក្នុងនោះមាន ប្រទេសចិនចំនួន២៦ករណី មានជនរងគ្រោះ២៩នាក់ ។ សមាគមជួយធ្វើអន្តរាគមន៍ទៅស្ថាប័នពាក់ព័ន្ធ ដូចជាក្រសួងការងារ, ក្រសួងមហាផ្ទៃ, ស្ថាប័នទូត-ស្ថានកុងស៊ុល ប្រចាំប្រទេស ។
សេចក្តីថ្លែងការណ៍ សង្កត់ធ្ងន់ថា ជនរងគ្រោះដែលចាញ់បោកមេខ្យល់ទៅរៀបការជាមួយបុរសជនជាតិចិន បានជួបបញ្ហា មួយចំនួនដូចជា ការធ្វើទារុណកម្ម ផ្លូវកាយ ផ្លូវចិត្ត ផ្លូវភេទ ការបង្អត់អាហារ និងការបង្ខំឱ្យធ្វើការផ្ទះដូចទាសករជាដើម ។ ប្រភពដដែលបញ្ជាក់ថា តាមការសិក្សាលើករណីទាំងនេះ គឺបណ្តាលមកពីកង្វះទីផ្សារការងារ ការបាត់បង់ដីធ្លី និងការជំពាក់បំណុលធនាគារជាដើម ៕
ចែករំលែកព័តមាននេះ