រាជធានីភ្នំពេញ ៖ កម្មវិធីប្រកួតប្រដាល់របស់កំពូលអ្នកប្រយុទ្ធគុនខ្មែរវគ្គ៣ នៅលើសង្វៀនទូរទស្សន៍ស៊ីធីអុិននារាត្រីថ្ងៃអាទិត្យ ទី៣ សីហាខាងមុខនេះ ឈានចូលដល់សប្តាហ៍ទី៣ហើយ ។ កីឡាករដែលត្រូវឡើងសង្វៀនប្រកួតមានទាំងអស់៥គូ និង៣ប្រភេទទម្ងន់ គឺទម្ងន់៦៥គីឡូក្រាម២គូ ទម្ងន់៦០គីឡូក្រាម២គូ និងទម្ងន់៥៧គីឡូក្រាមមានតែមួយគូបុ៉ណ្ណោះ ។
ក្នុងចំណោមកីឡាករទាំង៥គូនេះ គេចាប់អារម្មណ៍ខ្លាំងជាងគេលើការប្រកួតរវាងកីឡាករចាន់ សំអាត និងកីឡាករឈាន ហំ ដែលសុទ្ធតែជាកីឡាករជើងខ្លាំងដូចគ្នា ។ ប្រភេទទម្ងន់៦៥គីឡូក្រាមមានកីឡាកររ៉ាក់ វិឆ័យ មកពីក្លិបកងពលតូចលេខ៧០ ជួបប្រកួតជាមួយកីឡាករភិន សុទី មកពីក្លិបខេត្តក្រចេះ និងកីឡាករហ៊ុន គីរី មកពីក្លិបតាព្រហ្មមានជ័យបង្ក្រាបគ្រឿងញៀន ប្រកួតជាមួយកីឡាករយុ៉ន សំអាត មកពីក្លិបសំរោងកោងកីឡាខេត្តបាត់ដំបង ។
កីឡាកររ៉ាក់ វិឆ័យ និងយុ៉ន សំអាត ឆ្លងកាត់ការប្រកួតបានមួយលើកម្នាក់រួចមកហើយ បុ៉ន្តែពួកគេទាំងពីរបានទទួលរងនូវការបរាជ័យដូចគ្នា ទើបតែរកបានមួយពិន្ទុម្នាក់បុ៉ណ្ណោះ ។ ចំណែកកីឡាករហ៊ុន គីរី និងយុ៉ន សំអាត វិញ ក៏ឆ្លងកាត់ការប្រកួតបានមួយលើកម្នាក់ និងឈ្នះគូប្រកួតដោយពិន្ទុដូចគ្នា ។ ប្រភេទទម្ងន់៦០គីឡូក្រាមមានកីឡាករចាន់ សំអាត មកពីក្លិបខេត្តព្រះវិហារ ជួបប្រកួតជាមួយកីឡាករឈាន ហំ មកពីសមាគមកីឡាប្រដាល់ក្រសួងការពារជាតិ និងកីឡាករណាម មូ៉រិន មកពីក្លិបពន្លឺសាមគ្គីខេត្តបាត់ដំបង ជួបប្រកួតជាមួយកីឡាករថៃ ប៊ុនតត មកពីក្លិបនាគរាជគុនខ្មែរ ។
រវាងកីឡាករចាន់ សំអាត និងឈាន ហំ គេក៏ទើបប្រកួតបានមួយលើកម្នាក់ដូចគ្នា បុ៉ន្តែលទ្ធផលមិនដូចគ្នាទេ ដោយចាន់ សំអាត ចាញ់ រីឯឈាន ហំ ឈ្នះ ទើបលើកនេះ អាំង សំអាត ត្រូវការឈ្នះដាច់ខាតដើម្បីលុបលាងក្តីអាម៉ាស់ ខណៈឈាន ហំ ក៏ត្រូវការឈ្នះដូចគ្នាដើម្បីបង្កើនក្រេឌីតរបស់ខ្លួន ។ ទោះបីយ៉ាងណា សម្រាប់អ្នកនិយមទស្សនាការប្រដាល់ មិនហ៊ានអះអាងទុកមុនថា រវាងពួកគេទាំង២នាក់នរណាខ្លាំងជាងនរណាទេ ដោយសារកីឡាករទាំងពីរមានបទពិសោធន៍ប្រកួតនៅលើសង្វៀនប្រហាក់ប្រហែលគ្នា ដូច្នេះមិនអាចមើលស្រាលលើខាងណាបានឡើយ ។ យ៉ាងណាក៏ដោយ គូនេះតាមការស្ទាបស្ទង់ទទួលបានការចាប់អារម្មណ៍ខ្លាំងជាងគេក្នុងរឿងវាយតប់នៅលើសង្វៀនតាមរយៈការវាយអស់ដៃអស់ជើងធ្វើឱ្យទស្សនិកជនជក់ចិត្ត ។
ប្រភេទទម្ងន់៥៧គីឡូក្រាមដែលមានតែ១គូនោះ គឺកីឡាករជា សុខចាន់ មកពីក្លិបអមតៈគុនខ្មែរ ប្រកួតជាមួយកីឡាករខុន បូឡា មកពីក្លិបកងពលធំអន្តរាគមន៍លេខ៣ ព្រះវិហារ ។ គូនេះប្រកួតបានមួយលើកម្នាក់ដូចគ្នា ក្នុងនោះ ជា សុខចាន់ ចាញ់ ឯខុន បូឡា ឈ្នះ ៕
ចែករំលែកព័តមាននេះ