រាជធានីភ្នំពេញ ៖ គ្រាប់ផ្លោងធុន៦០មីល្លីម៉ែត្រ១គ្រាប់ ត្រូវបានជនមិនស្គាល់មុខជីកដីកប់ក្បាលចុះទុកកន្ទុយសល់ផុតពីដីដូចគេដោតបញ្ឈរបង្កៃតាមផ្លូវលំមួយកន្លែង ជាហេតុធ្វើឱ្យមានការភ្ញាក់ផ្អើលទាំងព្រឹក ហើយភ្លាមៗនោះមិនមាននរណាម្នាក់ហ៊ានប៉ះពាល់គ្រាប់នោះឡើយ ព្រោះគ្មានជំនាញខ្លាចផ្ទុះ បណ្តាលឱ្យមានគ្រោះថ្នាក់ ។
រាជធានីភ្នំពេញ ៖ គ្រាប់ផ្លោងធុន៦០មីល្លីម៉ែត្រ១គ្រាប់ ត្រូវបានជនមិនស្គាល់មុខជីកដីកប់ក្បាលចុះទុកកន្ទុយសល់ផុតពីដីដូចគេដោតបញ្ឈរបង្កៃតាមផ្លូវលំមួយកន្លែង ជាហេតុធ្វើឱ្យមានការភ្ញាក់ផ្អើលទាំងព្រឹក ហើយភ្លាមៗនោះមិនមាននរណាម្នាក់ហ៊ានប៉ះពាល់គ្រាប់នោះឡើយ ព្រោះគ្មានជំនាញខ្លាចផ្ទុះ បណ្តាលឱ្យមានគ្រោះថ្នាក់ ។
ករណីនេះបានកើតឡើង កាលពីវេលាម៉ោង៩ព្រឹក ថ្ងៃទី៣១ កក្កដា នៅតាមផ្លូវលំមួយ ស្ថិតនៅក្នុងភូមិប្រាសាទ សង្កាត់ស្នោខណ្ឌពោធិ៍សែនជ័យ ។
តាមប្រភពព័ត៌មានបានឱ្យដឹងថា គ្រាប់ផ្លោងធុន៦០មីល្លីម៉ែត្រ១គ្រាប់នោះ ជាគ្រាប់បន្សល់ទុកតាំងពីសម័យសង្គ្រាម ហើយត្រូវជនមិនស្គាល់មុខជីកដីកប់ដាក់ក្បាលចុះក្រោម និងកន្ទុយឡើងលើ និងលុបដីទុកតែកន្ទុយបន្តិចប៉ុណ្ណោះ ទាល់តែដើរទៅជិតទើបឃើញ ហើយរណ្តៅដែលគេជីកកប់គ្រាប់នោះមានទំហំមុខកាត់ប្រមាណ៣តឹក ។ ក្រៅពីគ្រាប់ខាងលើ មិនដឹងថា គេដាក់អ្វីនៅពីក្រោមនោះទៀតឡើយ ដោយអ្នកខ្លះសន្និដ្ឋានថា មានគ្រាប់ធុនធំកប់នៅពីក្រោមទៀត តែក៏មានអ្នកខ្លះសង្ស័យថា ជាគ្រាប់អត់ក្បាល គ្រាន់តែគេកប់លេង ។
ប៉ុន្តែទោះបីជាបែបណា ទាល់តែមន្ត្រីជំនាញស៊ីម៉ាក់ចុះទៅពិនិត្យជាក់ស្តែងទើបអាចដឹងប្រាកដបានថា គ្រាប់នោះបែបណា ។ មន្ត្រីនគរបាលប៉ុស្តិ៍ស្នោ បានចុះទៅកាន់ទីនោះភ្លាមៗ យកឈើចងខ្វែង ព្រមទាំងយកមែកឫស្សីងាប់ៗទៅដាក់ធ្វើជាតម្រុយ និងជាសញ្ញាសម្រាប់ជាការប្រុងប្រយ័ត្ន ខ្លាចក្រែងមានរថយន្តឬគោយន្តដែលបើកឆ្លងកាត់ទីនោះកិន អាចបណ្តាលឱ្យផ្ទុះមានគ្រោះថ្នាក់កើតឡើងបាន ។ មន្ត្រីនគរបាលប៉ុស្តិ៍ដែលទៅត្រួតពិនិត្យបានឱ្យដឹងថា គ្រាប់នោះពិតជាត្រូវបានជីកកប់ថ្មីៗ គឺកប់នៅវេលាយប់ថ្ងៃទី៣០ កក្កដា និងបានកប់មុនពេលមានភ្លៀងធ្លាក់ថែមទៀត ។ មិនមាននរណាម្នាក់បានដឹងពីគោលបំណងរបស់ជនមិនស្គាល់មុខកប់គ្រាប់ខាងលើនោះទេ ។
គេធ្វើបែបនេះពិតជាបានបង្កឱ្យមានការភ្ញាក់ផ្អើល និងភ័យខ្លាចសម្រាប់អ្នកភូមិជិតនោះ ។ ម្យ៉ាងទៀត គ្រាប់នោះត្រូវបានអ្នកដែលធ្វើដំណើរឆ្លងកាត់ទីនោះប្រទះឃើញ និងបានរាយការណ៍ប្រាប់លោកមេភូមិខាងលើ ទើបលោកមេភូមិរាយការណ៍បន្តដល់កម្លាំងនគរបាលប៉ុស្តិ៍ ហើយពេលនេះក៏បានរាយការណ៍បន្តទៅខាងមន្ត្រីស៊ីម៉ាក់ឱ្យចុះទៅពិនិត្យមើលជាក់ស្តែង និងបានដកយកចេញពីកន្លែងនោះហើយ ។ ផ្លូវខាងលើនេះគឺជាផ្លូវលំតភ្ជាប់ពីភូមិមួយទៅភូមិមួយទៀត ដែលមានរថយន្តគ្រប់ប្រភេទបើកឆ្លងកាត់រាល់យប់ថ្ងៃ ដូចជារថយន្តដឹកកម្មករ រថយន្តដឹកទំនិញ និងរថយន្តដឹកដី ហើយក៏មានគោយន្តផងដែរ ។ ប៉ុន្តែហាក់ដូចជាសំណាងល្អខ្លាំងណាស់ដែលនៅពេលនោះពុំមានរថយន្តណាបើកកិនចំគ្រាប់បង្កៃនេះទេ ។ ប្រសិនជាកិនអាចនឹងផ្ទុះឡើងបណ្តាលឱ្យមានគ្រោះថ្នាក់ជាមិនខានឡើយ ។
បុរសម្នាក់ជាអ្នកភូមិនៅក្បែរនោះ និងជាអតីតទាហានសម័យ លន់ នល់ បានឱ្យដឹងថា នៅក្នុងតំបន់នោះ កាលពីសម័យសង្គ្រាមក្នុងទសវត្សឆ្នាំ១៩៧០ដល់១៩៧៥ គឺជាសមរភូមិមុខ និងជាទីលានប្រយុទ្ធគ្នាយ៉ាងស៊ីសាច់ហុតឈាមរវាងកងទាហានលោកសេនាប្រមុខ លន់ នល់និងកងទ័ពខ្មែរក្រហម ហើយគ្រាប់គ្រប់ប្រភេទបានបន្សល់ទុកយ៉ាងច្រើនរាប់មិនអស់ក្នុងពេលកន្លងមក ។ ប៉ុន្តែសព្វថ្ងៃនេះមាននៅសល់តិចតួចដែរ ព្រោះខាងមន្ត្រីស៊ីមា៉ក់បានចុះទៅបោសសម្អាតប្រមូលយកជាបន្តបន្ទាប់ ។
បុរសរូបនោះបានរំលឹកផងដែរថា កាលពីអំឡុងឆ្នាំ២០១២កន្លងទៅមានការបង្កៃគ្រាប់បែកចង្កោមនៅក្នុងចម្ការប្រេងខ្យល់មួយ ស្ថិតនៅក្បែរនោះចម្ងាយពីគ្នាប្រមាណ១០០ម៉ែត្រពីកន្លែងកើតហេតុនោះ ដែលខណៈនោះក្មេងប្រុស២នាក់ទៅឃ្វាលគោប្រទះឃើញអត់ស្គាល់ ស្មានថាជាកណ្តឹងគោ ក៏បានរើសយកទៅពាក់ក និងកាន់រលាស់លេង ហើយក៏ផ្ទុះលាន់កក្រើកព្រៃ បណ្តាលឱ្យស្លាប់ម្នាក់នៅនឹងកន្លែង និងម្នាក់ទៀតរងរបួសដាច់ដៃ និងពិការភ្នែកម្ខាងរហូតដល់សព្វថ្ងៃនេះ ។
ករណីបង្កៃគ្រាប់នេះ ត្រូវបានគេសង្ស័យថា ជនល្មើសគឺជាម្ចាស់ចម្ការប្រេងខ្យល់ដាក់បង្កៃ ព្រោះខឹងគេលួចកាប់ដើមប្រេងខ្យល់ធ្វើអុសដុត ។ ប៉ុន្តែទោះបីបែបណា ខាងសមត្ថកិច្ចនៅតែមិនអាចរកឃើញម្ចាស់គ្រាប់នេះដដែល ។(នៅត)
ចែករំលែកព័តមាននេះ