រាជធានីភ្នំពេញ ៖ យុវជន២នាក់ជិះម៉ូតូស្មាសមួយគ្រឿងបើកយ៉ាងលឿនបានទៅបុកចំពីមុខរថយន្តកាមរីបាឡែនពេញទំហឹងបណ្តាលឱ្យរថយន្តបែកស្តុប និងកំពិតកាងចំណែកយុវជនទាំងពីរនាក់នោះគ្រាន់រលាត់ស្បែកដៃជើងតិចតូចប៉ុណ្ណោះ។ ហេតុការណ៍នេះកើតឡើងកាលពីវេលាម៉ោង ៩និង៥០នាទី យប់ថ្ងៃទី ៣១ កក្កដា ២០១៤ នៅចំណុចស្តុបសួនបឹងបៃតង ស្ថិតនៅក្នុងសង្កាត់ទឹកល្អក់៣ ខណ្ឌទួលគោក ។
ប្រភពព័ត៌មានពីកន្លែងកើតហេតុបានឱ្យដឹងថា នៅមុនពេលកើតហេតុគេឃើញម៉ូតូស្មាស ពណ៌ខ្មៅ មួយគ្រឿង ពាក់ស្លាកលេខកំពង់ស្ពឺ 1A-7626 ជិះដោយយុវជន២នាក់យ៉ាងលឿនតាមផ្លូវ១៨២ ក្នុងទិសដៅពីលិចមកកើត មកដល់ចំណុចកើតហេតុក៏បានទៅបុកចំពីមុខរថយន្តកាមរីបាឡែន មួយគ្រឿង ពាក់ស្លាកលេខ នគរបាល 2.8782 បើកបរដោយបុរសជាមន្រ្តីក្រសួងមហាផ្ទៃម្នាក់ តាមផ្លូវ២៦១ ក្នុងទិសដៅពីត្បូងទៅជើងពេញទំហឹង បណ្តាលឱ្យរថយន្តកាមរីបែកស្តុប កំពិតកាង ចំណែកយុវជនដែលជិះម៉ូតូស្មាសទាំង២នាក់គ្រាន់ទេរលាត់ស្បែកដៃជើងតែប៉ុណ្ណោះ។
ក្រោយពេលកើតហេតុភាគីខាងម៉ូតូបានសុំសងថ្លៃការខូចខាតទៅម្ចាស់រថយន្តកាមរីបាឡែនចំនួន៥០ដុល្លារហើយម្ចាស់រថយន្តក៏ព្រមទទួលយកដោយមិនចង់មានរឿងវែងឆ្ងាយ។
ចែករំលែកព័តមាននេះ