ខេត្តកណ្តាល ៖ នារីរូបស្រស់សោភាវ័យ១៩ឆ្នាំម្នាក់ ក្រោយពីរួមរស់ជាមួយប្តីអត់ច្បាប់អាយុជាង៦០ឆ្នាំ ជាជនជាតិចិន អស់រយៈពេលជាងមួយឆ្នាំ រងនូវការធ្វើទារុណកម្មផ្លូវចិត្ត ផ្លូវកាយ ក៏បានសុំចែកផ្លូវគ្នាមួយរយៈ ហើយពេលនេះនាងត្រូវម្តាយបង្កើតបង្ខំឱ្យទៅរួមរស់ជាមួយប្តីអត់ច្បាប់នោះវិញ ប៉ុន្តែនាងមិនព្រម ។
ដោយសារតែការបង្ខំពីម្តាយ នាងក៏បានដាច់ចិត្តមករកការអន្តរាគមន៍ ពីអង្គការអាដហុកប្រចាំនៅខេត្តកណ្តាល កាលពីវេលារសៀលថ្ងៃទី៣០ កក្កដា ដើម្បីផ្តល់ជាគំនិតដល់រូបនាង តើត្រូវធ្វើយ៉ាងណា ចំពោះជីវិតរបស់នាងដែលជួបប្រទះរឿងបែបនេះ ។
នារីឈ្មោះ ស.ច.ថ អាយុ១៩ឆ្នាំ បច្ចុប្បន្នរស់នៅភូមិព្រែកសំរោង សង្កាត់តាខ្មៅ ក្រុងតាខ្មៅ បានរៀបរាប់ពីដំណើរឆាកជីវិតរបស់នាងឱ្យដឹងថា ម្តាយរបស់នាងជាកម្មកររោងចក្រ ឪពុកជាកម្មករសំណង់ ស្នាក់នៅក្រុងតាខ្មៅ ។ កាលពីជាង២ឆ្នាំមុន ដោយសារតែជីវភាពទីទ័លក្រ ឪពុកម្តាយរបស់នាង បានណែនាំឱ្យនាងយកប្តីជាជនជាតិចិនម្នាក់ អាយុជាង៦០ឆ្នាំ ។ បុរសនេះស្គាល់ឪពុកម្តាយនាងតាមរយៈអ្នកភូមិណែនាំ ។ ដោយសារតែចង់ឱ្យជីវភាពគ្រួសារធូរធា នាងក៏បានសម្រេចចិត្តយកបុរសចំណាស់ជនជាតិចិននោះ ហើយបុរសនោះក៏បានផ្តល់ជាលុយកាក់ដល់ក្រុមគ្រួសារនាងជាបន្តបន្ទាប់ សរុបប្រហែល៦ពាន់ដុល្លារ ហើយការរស់នៅជាមួយគ្នានេះ មិនបានរៀបការតាមប្រពៃណីនិងស្របច្បាប់ទេ ។ ក្រោយពីមានការព្រមព្រាងគ្នាហើយនោះ រូបនាងបានទៅរស់នៅជាមួយបុរសជនជាតិចិន ដោយជួលផ្ទះស្នាក់នៅម្តុំផ្លូវកម្ពុជាក្រោម រាជធានីភ្នំពេញ ។
នាងឱ្យដឹងទៀតថា ការរស់នៅជាមួយជនជាតិចិននោះ នាងមិនបានដឹងថាគេរកស៊ីអ្វីទេ ហើយសួម្បីតែឈ្មោះក៏នាងមិនបានស្គាល់ដែរ ។ ការរស់នៅជាមួយគ្នា ជាប្តីប្រពន្ធអត់ច្បាប់នេះ មុនដំបូងជនជាតិចិននោះមិនបានធ្វើបាបផ្លូវចិត្ត ផ្លូវកាយនាងទេ ។ តែក្រោយមកទៀត ជនជាតិចិននោះ បានធ្វើបាបផ្លូវកាយនាង មានវាយដំជាដើម នៅពេលគេមិនសប្បាយចិត្តម្តងម្កាល ។ ចំណែកផ្លូវចិត្តវិញ ជនជាតិចិននេះ បានធ្វើបាបខ្លាំងណាស់ សូម្បីតែចេញទៅខាងក្រៅផ្ទះ ដោយគ្មានការអនុញ្ញាត ក៏មិនបានផង និងមិនអាចមានការទាក់ទងជាមួយមិត្តភក្តិ ដែលធ្លាប់ស្គាល់ រាប់អានគ្នាបានទេ បើមិនធ្វើតាមគេទេ កេវាយដំប្រើអំពើហិង្សាលើរូបរាងកាយនាង ៕
ព័ត៌មានលម្អិតនឹងមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ