ប្រទេសរុស្ស៊ីដែលរងការដាក់ទណ្ឌកម្មថ្មីៗរបស់អាមេរិក និងរបស់សហភាពអឺរុ៉បមកពីការចូលរួមរបស់ខ្លួនក្នុងសង្គ្រាមនៅអ៊ុយក្រែននោះបានបរិហារវិធានការប្រឆាំងរុស្ស៊ីទាំងនោះ ហើយគំរាមក្រុងវ៉ាស៊ីនតោន និងសហភាពអឺរុ៉បពីការឡើងថ្លៃថាមពលនៅអឺរុ៉ប។បន្ទាប់ពីសហរដ្ឋអាមេរិក និងសហភាពអឺរុ៉ប ក្រុមប្រទេស G.7 ក៏គំរាមដាក់ទណ្ឌកម្មរុស្ស៊ីដែរ។ ម៉ឺងម៉ាត់ខ្លាំងជាងពេលណាៗទាំងអស់ ទណ្ឌកម្មរបស់អាមេរិក និងរបស់អឺរុ៉បត្រូវបានប្រកាស ខណៈពេលកងទ័ពអ៊ុយក្រែនបង្កើនការវាយលុកប្រឆាំងពួកបះបោរ ។
កាលពីយប់ថ្ងៃទី៣០ កក្កដា កាសែតផ្លូវការរបស់សហភាពអឺរុ៉បបានចេញផ្សាយឈ្មោះរបស់បណ្តាមនុស្សជំនិតរបស់លោកវ្ល៉ាឌីមៀរពូទីន និងបណ្តាក្រុមហ៊ុនដែលត្រូវផ្អឹបទុកទ្រព្យសម្បត្តិ ហើយហាមឃាត់ការធ្វើដំណើរពិសេសសម្រាប់សាខាពីររបស់ធនាគារ ROSSIA ដែលចាត់ទុកថា ជាធនាគាររបស់វិមានក្រឹមឡាំង ។
ទោះបីជាក្រុងមូស្គូខិតខំនិយាយសម្រាលពីផលប៉ះពាល់នៃទណ្ឌកម្មទាំងនេះរបស់ពួកលោកខាងលិចលើសេដ្ឋកិច្ចរុស្ស៊ីក្តី តែវាញ៉ាំឱ្យមានការព្រួយបារម្ភយ៉ាងខ្លាំងក្នុងមជ្ឈមណ្ឌលពាណិជ្ជករដែលខ្លាចចំពោះការស្រុតចុះ និងការនៅឯកោយូរអង្វែងសម្រាប់រុស្ស៊ី ។
ក្រសួងការបរទេសរុស្ស៊ីថ្លែងថា បណ្តាផលវិបាកសម្រាប់ក្រុងវ៉ាស៊ីនតោនចំពោះនយោបាយបំផ្លិចបំផ្លាញនោះនឹងឃើញជាក់ស្តែងបំផុត ។ ចំណែកទណ្ឌកម្មរបស់សហភាពអឺរុ៉បផ្តល់លទ្ធផល គឺការឡើងថ្លៃថាមពលនៅទីផ្សារអឺរុ៉ប ។
ក្រុងមូស្គូរិះគន់សហភាពអឺរុ៉បខ្លាំងៗថា ពុំគិតពីរឿងហេតុជាក់ស្តែងទេ តែដើរតត្រុកតាមនយោបាយរបស់អាមេរិក ។ ទណ្ឌកម្មរបស់សហភាពអឺរុ៉បបង្ហាញពីអសមត្ថភាពរបស់សហភាពអឺរុ៉បក្នុងការដើរតួនាទីស្វយ័តក្នុងកិច្ចការពិភពលោក ។ចំពោះទណ្ឌកម្មទាំងនេះក្រសួងការបរទេសរុស្ស៊ីនិយាយសម្រាលពីផលប៉ះពាល់ដោយអះអាងថា ការលំបាកទាំងឡាយអាចកើតមានក្នុងផ្នែកមួយចំនួននៃសេដ្ឋកិច្ចរុស្ស៊ី តែពិតណាស់នឹងអាចជម្នះបាន ។រុស្ស៊ីប្រកាសកាលពីថ្ងៃទី៣០ កក្កដា ពីការហាមឃាត់នាំចូលផ្លែឈើ និងបន្លែរបស់ប៉ូឡូញចាត់ទុកជាការតបតវិញមួយ ។ រុស្ស៊ី ក៏អាចឆ្លើយតបចំពោះទណ្ឌកម្មទាំងនេះតាមរយៈបញ្ឈប់ការផ្តល់ឧស្ម័ន និងប្រេងកាត ៕
ចែករំលែកព័តមាននេះ