បុរសអាមេរិក២នាក់ប្រដាប់ដោយកាំភ្លើងចូលប្លន់ក្នុងគ្លីនិក «West Side» នៅក្រុងស៊ីកាហ្គោ ទាំងកណ្ដាលថ្ងៃ ដោយទិសដៅចម្បងមិនមែនប្លន់យកប្រាក់ ឬទ្រព្យសម្បត្ដិមានតម្លៃអ្វីទេគឺប្លន់យកថ្នាំបង្កើនថាមពលផ្លូវភេទ «វីយ៉ាក្រា» ។ អំពើប្លន់នេះកើតឡើងនៅថ្ងៃទី២៦ កក្កដា ២០១៤ ។
សារព័ត៌មានបរទេសផ្សាយថា ចោរ២នាក់នោះ មានអាយុប្រហែល៥០ឆ្នាំ បានចូលទៅក្នុងគ្លីនិក ហើយយកកាំភ្លើងភ្ជង់គំរាមបុគ្គលិកឱ្យលើកដៃ និងលត់ជង្គង់ ។ ក្នុងរយៈពេលតែប៉ុន្មាននាទីប៉ុណ្ណោះ ជនល្មើសទាំង២នាក់ប្រមូលយកថ្នាំវីយ៉ាក្រាចំនួន៥៦គ្រាប់មានតម្លៃប្រហែល១.៧០០ដុល្លារ រួមទាំងឱសថបំបាត់ការឈឺចាប់ និងថ្នាំក្អកជាដើម ។នៅពេលជនល្មើសចាកចេញពីកន្លែងកើតេហតុ ឆ្លៀតយកកុំព្យូទ័រយួរដៃតម្លៃ១.៥០០ដុល្លារ រួមទាំងប្រាក់៦៥ដុល្លារ នៅក្នុងកាបូបរបស់បុគ្គលិកម្នាក់ ។
ម្ចាស់គ្លីនិក West Side បញ្ជាក់ប្រាប់អ្នកសារព័ត៌មានថា មិនប្រាកដថា បុរសទាំង២នាក់នោះយកថ្នាំវីយ៉ាក្រាទៅប្រើផ្ទាល់ខ្លួន ឬយ៉ាងណាទេ ប៉ុន្ដែសង្ស័យថា ពួកគេយកទៅលក់នៅក្នុងទីផ្សារខុសច្បាប់ ។ ប៉ូលិសមិនទាន់ចាប់ខ្លួនជនល្មើសបានទេ និងប្រកាសសុំជំនួយពីមហាជនបង្ហាញតម្រុយរបស់ជនល្មើសទាំង២នាក់នោះ ។ ចំណែកគ្លីនិកបានបង្កើតកម្មវិធី«ត្រួតពិនិត្យសុខភាពដោយឥតគិតថ្លៃ» និងផ្ដល់វីយ៉ាក្រា១ឈុតដល់អ្នកដែលផ្ដល់ព័ត៌មានឈានទៅដល់ការចាប់ខ្លួនជនល្មើសទាំង២នាក់នោះ ៕
ចែករំលែកព័តមាននេះ