សារព័ត៌មាន «ញូវ១៦៣» របស់ចិនផ្សាយថា នាងសៀង វ៉ា អាយុ២៤ឆ្នាំ ជានិស្សិតផ្នែកស្រាវជ្រាវ រស់នៅខេត្ដហ៊ូណាន របស់ចិន បានសម្រេចចិត្ដចំណាយប្រាក់បង់ថ្លៃសិក្សាចំនួន១.៥០០ដុល្លារ ដើម្បីព្យាបាលលោកលី ចើន អាយុ ២៤ឆ្នាំ ជាគូស្នេហ៍ដែលមានជំងឺមហារីកឈាមសស៊ីឈាមក្រហម ។ គូស្នេហ៍នេះរៀននៅមហាវិទ្យាល័យជាមួយគ្នា ។
ក្ដីប្រាថ្នារបស់លោកលី ចើន គឺចង់ឃើញនាងសៀង វ៉ា ស្ថិតក្នុងឈុតអាពាហ៍ពិពាហ៍ ដូច្នេះកាលពីថ្ងៃទី១៧ កក្កដា ២០១៤ នាងបានទៅមន្ទីរពេទ្យមហាវិទ្យាល័យសៀងយ៉ា ក្នុងខេត្ដហ៊ូណាន ស្ថិតក្នុងឈុតអាពាហ៍ពិពាហ៍ដើម្បីបំពេញបំណងរបស់គូស្នេហ៍ ហើយបានសុំរៀបការជាមួយគ្នានាគ្រានោះ ។ លោកលី ចើន ដែលកម្លាំងកាយចុះខ្សោយដោយសារជំងឺខំប្រឹងញញឹមចំពោះអាពាហ៍ពិពាហ៍ដ៏គួរឱ្យរំភើបរបស់ពួកគេទាំងពីរ ។
នាងសៀង វ៉ា បានចំណាយប្រាក់ដែលខំសន្សំទុក និងសម្រាប់បង់ថ្លៃសិក្សាយកទៅព្យាបាលគូស្នេហ៍របស់ខ្លួនដោយមិនបានប្រាប់ក្រុមគ្រួសារឱ្យដឹងទេ ។ នាងសៀង វ៉ា និយាយទាំងក្ដុកក្ដួលថា នាងគ្មានប្រាក់សម្រាប់បង់ថ្លៃចូលរៀននៅឆមាសថ្មីទេ ប៉ុន្ដែអ្វីដែលនាងធ្វើគឺមានតម្លៃបំផុត ព្រោះកាលពីមុនលោកលី ចើន ធ្លាប់មើលថែរូបនាងយ៉ាងល្អ ដូច្នេះពេលនេះនាងមានភារៈត្រូវមើលថែគេវិញម្ដង ។
នាងសៀង វ៉ា សង្ឃឹមថា លោកលី ចើន នឹងជាសះស្បើយ និងអាចទៅរៀនជាមួយគ្នាវិញ ទោះបីជាក្ដីសង្ឃឹមមានភាពមិនប្រាកដប្រជា ព្រោះជម្ងឺស្ថិតក្នុងកម្រិតធ្ងន់ក្ដី ៕
ចែករំលែកព័តមាននេះ