ហូជីមិញ ៖ កាលពីថ្ងៃទី២៨ កក្កដា ក្រុមហ៊ុនប្រេងជាតិរបស់វៀតណាម(Petrolimex)បានបញ្ចុះតម្លៃសាំង១,៦សេនដុល្លារស្មើនឹង១,២១ដុល្លារក្នុងមួយលីត្រ ។ នេះគឺជាលើកទីមួយហើយដែលតម្លៃលក់រាយសាំងបានចុះថ្លៃនៅឆ្នាំ២០១៤ បន្ទាប់ពីការបន្តកើនឡើង៥លើក ។ ទោះជាយ៉ាងណាក៏ដោយ ការបញ្ចុះតម្លៃនេះគឺសមហេតុផលធៀបនឹងការកើនឡើងសរុប៧សេន ។
យ៉ាងណាមិញតម្លៃលក់ប្រេងម៉ាស៊ូតក៏មានកម្រិតទាបជាងមុនដែរគឺ១.០៥ដុល្លារក្នុងមួួយលីត្រដែលបានប្រែក្លាយទៅជាការបញ្ចុះតម្លៃលើកទី២នៅក្នុងអំឡុងពេល១០ថ្ងៃ នេះ ។ រីឯតម្លៃប្រេងកាតក៏ចុះថ្លៃមកត្រឹម១.០៧ដុល្លារក្នុងមួយលីត្រដែរ។ តាមការឱ្យដឹងពីក្រសួងឧស្សាហកម្មតម្លៃលក់រាយប្រេងឥន្ធនៈថយចុះ១,៣សេន ធៀបនឹងតម្លៃមូលដ្ឋានដែលគេបានទូទាត់នឹងតម្លៃនាំចូលបូកនឹងពន្ធថ្លៃដើម និងភាគចំណេញសម្រាប់អាជីវកម្ម ។ ជាមួយនឹងការធ្លាក់ចុះនៃតម្លៃសាំងនៅលើពិភពលោកក្រសួងបានកាត់បន្ថយនូវការរក្សាលំនឹងនៃកម្រិតមូលនិធិទំនុកបម្រុងជាប្រាក់២,៩សេនក្នុងមួយលីត្រ ។
ទោះជាយ៉ាងណា តម្លៃលក់រាយប្រេងម៉ាស៊ូតនិងប្រេងកាតនៅតែមានអត្រាខ្ពស់ជាងតម្លៃមូលដ្ឋានគោល១,៦សេន ។ ម្យ៉ាងទៀតតាមស្ថិតិរបស់សមាគមប្រេងវៀតណាមកាលពីថ្ងៃទី២៨ កក្កដា បានបង្ហាញថា តម្លៃប្រេងឥន្ធនៈនៅក្នុងទីផ្សារប្រទេសសិង្ហបុរីដែលជាទីតាំងនៃប្រភពប្រេងវៀតណាមក៏បានបញ្ចុះតម្លៃជាងដែរ ៕
ចែករំលែកព័តមាននេះ