ខេត្តកណ្តាល ៖ បុរសម្នាក់បានទៅរាយមងយកត្រីនៅក្នុងទឹកព្រែកក្បែរផ្ទះ ហើយបានវ័ណ្ឌជាមួយមងលង់ស្លាប់ កាលពីវេលាល្ងាចថ្ងៃទី៣០ កក្កដា ដោយមិនមានអ្នកដឹងឡើយ លុះដល់ព្រឹកថ្ងៃទី៣១ ទើបក្មួយជនរងគ្រោះប្រទះឃើញ ។
នគរបាលប៉ុស្តិ៍រដ្ឋបាលឃុំខ្ពបដែលចុះទៅសាកសួរនិងធ្វើកំណត់ហេតុ ប្រាប់ឱ្យដឹងថា ជនរងគ្រោះដោយសារលង់ទឹកឈ្មោះ សួង សឿង ភេទប្រុស អាយុ៦៣ឆ្នាំ មានទីលំនៅភូមិរកាលើ ឃុំខ្ពប ស្រុកស្អាង មុខរបរកសិករ ។
នគរបាលបានដកស្រង់សម្តីសាច់ញាតិជនរងគ្រោះថា នៅល្ងាចថ្ងៃកើតហេតុ ជនរងគ្រោះបានផឹកស្រា មានសភាពស្រវឹងផងដែរ ហើយបានយកមងទៅរាយនៅក្នុងទឹកព្រែក ខាងក្រោយផ្ទះ ពេលនោះមិនមានអ្នកណាបានឃើញជនរងគ្រោះរាយមងនោះទេ ហើយគេសង្ស័យថា ពេលដែលកំពុងរាយមងក្នុងព្រែកមានទឹកជ្រៅនោះ ជនរងគ្រោះក៏បានវ័ណ្ឌជាមួយមងលង់ស្លាប់តែម្តង ដោយមិនមានអ្នកណាបានឃើញឡើយ ។ ចំណែកក្រុមគ្រួសារជនរងគ្រោះ បាត់មិនឃើញជនរងគ្រោះត្រឡប់មកផ្ទះវិញ ពេលយប់ជ្រៅក៏បានដើរសួររកតាមផ្ទះអ្នកជិតខាង ដែលជនរងគ្រោះធ្លាប់ទៅលេង តែមិនមានអ្នកណាបានឃើញ ៕
ចែករំលែកព័តមាននេះ