ខេត្តពោធិ៍សាត់ ៖ មនុស្សម្នាក់ស្លាប់ ខណៈពេលបញ្ជូនទៅដល់មន្ទីរពេទ្យ និង៤នាក់ទៀតរងរបួសធ្ងន់-ស្រាល ក្នុងហេតុការណ៍គ្រោះថ្នាក់ចរាចរណ៍មួយដែលបង្កឡើងដោយរថយន្ត២គ្រឿងបើកបុកគ្នាយ៉ាងពេញទំហឹង កាលពីវេលាម៉ោង០២ និង៥៥នាទីរសៀលថ្ងៃទី៣០ កក្កដា ២០១៤ ស្ថិតនៅលើកំណាត់ផ្លូវជាតិលេខ៥ ត្រង់ចំណុចខាងមុខផ្សារក្បាលត្រាច ក្នុងភូមិកំពង់លើ ឃុំក្បាលត្រាចស្រុកក្រគរ ខេត្តពោធិ៍សាត់ ។
ប្រភពបានឱ្យដឹងថា ជនរងគ្រោះដែលស្លាប់ឈ្មោះអេម ណា ភេទស្រី អាយុ៥២ឆ្នាំ និង៤នាក់ទៀតរងរបួស ១-ឈ្មោះខៀវ មួន អាយុ៥៣ឆ្នាំ (របួសស្រាល) ២-ឈ្មោះខាត់ ស្រីកា អាយុ២៣ឆ្នាំ (របួសធ្ងន់) ទាំង៣នាក់ជាប្តីប្រពន្ធនិងកូន មានទីលំនៅក្នុងភូមិស្រែព្រៃ ឃុំស្រែព្រៃ ស្រុកទូកមាស ខេត្តកំពត ៣-ឈ្មោះឈឹម សាវុធ អាយុ៤២ឆ្នាំ ជាអ្នកបើករថយន្តហ៊ីយ៉ាន់ដាយរបស់សហគ្រាសផលិតឱសថប៊ីអេហ្វ (របួសស្រាល) និង៤-ឈ្មោះពេញ ជាទៀង ភេទស្រី អាយុ៣២ឆ្នាំ (របួសធ្ងន់) ទាំង២នាក់ប្តីប្រពន្ធ មានទីលំនៅក្នុងភូមិព្រែកព្នៅ សង្កាត់ព្រែកព្នៅ ខណ្ឌប្ញស្សីកែវ រាជធានីភ្នំពេញ ។
តាមប្រភពពីនគរបាលស្រុកក្រគរឱ្យដឹងថា គ្រោះថ្នាក់ចរាចរណ៍នេះ បង្កឡើងដោយរថយន្តហ៊ីយ៉ាន់ដាយ ពណ៌.ស ពាក់ស្លាកលេខភ្នំពេញ 3C4216 របស់សហគ្រាសផលិតឧិសថ ប៊ីអេហ្វ ជិះគ្នា២នាក់ (ជាប្ដីប្រពន្ធនឹងគ្នា) និងមួយគ្រឿងទៀត ម៉ាកកាមរីបាឡែន ពណ៌.ស ពាក់ស្លាកលេខបាត់ដំបង 2A8861 ជិះគ្នា៣នាក់ប្ដីប្រពន្ធ និងកូនស្រី ។ តាមការសាកសួរពីប្រជាពលរដ្ឋនៅកន្លែងកើតហេតុឱ្យដឹងថា នៅរសៀលនោះ ពេលមេឃកំពុងភ្លៀង គេឃើញរថយន្តហ៊ីយ៉ាន់ដាយរបស់សហគ្រាសផលិតឧិសថប៊ីអេហ្វ ធ្វើដំណើរពីលិចទៅកើត ឯរថយន្តកាមរីបាឡែនធ្វើដំណើរពីកើតទៅលិចបញ្ច្រាសទិសគ្នា ដែលរថយន្តទាំង២គ្រឿងសុទ្ធតែបើកក្នុងល្បឿនលឿនដូចគ្នា ។
លុះទៅដល់កន្លែងកើតហេតុ ត្រង់ចំណុចខាងមុខផ្សារក្បាលត្រាចមិនដឹងជាយ៉ាងម៉េច ស្រាប់តែរថយន្តហ៊ីយ៉ាន់ដាយ រេចង្កូតទៅឆ្វេងដៃទៅបុករថយន្តបាឡែនយ៉ាងពេញទំហឹង បណ្ដាលឱ្យរថយន្តទាំង២គ្រឿងខ្ទេចមុខដូចគ្នា។ រីឯអ្នកជិះក្នុងរថយន្តរបួសធ្ងន់៣នាក់ ស្រាល២នាក់ ក្រោយមកបានស្លាប់ម្នាក់នៅមន្ទីរពេទ្យ ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ