ខេត្តមណ្ឌលគីរី ៖ ប្រជាពលរដ្ឋរស់នៅស្រុកកែវសីមាបានរាយការណ៏ថា រថយន្តប្រភេទកាមរីគូទស្វិតនឹងហើមចំនួន១៥គ្រឿង បានដឹកឈើប្រណីតចេញពីតំបន់ព្រៃការពារអភិរក្សជីវចម្រុះសីមា កាលពីវេលាយប់ថ្ងៃទី៣០ ឈានចូល៣១ កក្កដា ២០១៤ តាមផ្លូវជាតិលេខ៧៦ ។ ការចរាចរឈើប្រណីតបែបអនាធិបតេយ្យនេះ ពុំត្រូវបានសមត្ថកិច្ចនឹងមន្រ្តីជំនាញអើពើនោះទេ។
ប្រភពព័ត៌មានបានឲ្យដឹងថា តាំងពីវេលាម៉ោង៩យប់ ថ្ងៃទី៣០ គេបានឃើញរថយន្តដឹកឈើជាច្រើនគ្រឿងបានបើកបន្តកន្ទុយគ្នា សម្រុកដឹកឈើប្រណីតចេញពីស្រុកអូររាំង នឹងផ្លូវសាលាស្រុកចាស់។ដោយក្នុងឡានមួយគ្រឿងៗផ្ទុកឈើប្រណីត ពេញប្រៀបស្ទើរបាក់ឡានជាពីរទៅហើយ ។ សកម្មភាពដឹកជញ្ជូនបទល្មើសព្រៃឈើខាងលើនេះ បានបន្តដឹកជញ្ជូនរហូតដល់ម៉ោងប្រមាណជាង៣ទៀបភ្លឺថ្ងៃទី៣១ កក្កដា។ ចំណែកការដឹកជញ្ជូននោះគឺស្ថិតក្រោមក្រសែភ្នែករបស់មន្រ្តីជំនាញ ព្រោះថារថយន្តដឹកឈើទាំងនោះបានបើកឆ្លងកាត់ទីស្នាក់ការកណ្តាលអភិរក្សជីវចម្រុះសីមា ផ្នែករដ្ឋបាលព្រៃឈើកែវសីមា និងសង្កាត់រដ្ឋបាលព្រៃឈើស្រែព្រះ ។ ឈើប្រណីតទាំងនោះត្រូវបានក្រុមឈ្មួញដឹក យកទៅលក់ឲ្យថៅកែនៅទឹកដីខេត្តក្រចេះ នឹងលក់បន្តឲ្យថៅកែវៀតណាមនៅច្រករបៀង តាមបន្ទាត់ព្រំដែននានារបស់ស្រុកស្នូលដែលជាប់ជាមួយខេត្តមណ្ឌលគិរី។ មជ្ឈដ្ឋានមហាជនបានលើកឡើងថា ប្រសិនបើមន្រ្តីជំនាញនឹងមន្រ្តីដែលមានការពាក់ព័ន្ឋនៅតែបណ្តែតបណ្តោយ ឲ្យសកម្មភាពកាប់បំផ្លាញ នឹងសកម្មភាពដឹកជញ្ជូនបទល្មើសព្រៃឈើ មានជារៀងរាល់ថ្ងៃបែបនេះ ព្រៃឈើនៅខេត្តមណ្ឌលគិរី ច្បាស់ជារលាយ ហិនហោចនៅពេលឆាប់ៗខាងមុខនេះជាក់ជាមិនខាន។ មិនត្រឹមតែប៉ុណ្ណោះផ្លូវថ្នល់មួយចំនួនក៏បានរងនូវការខូតខាតធ្ងន់ធ្ងរ ដោយ សារតែក្រុមឈ្មួញបានប្រើប្រាស់រថយន្តធុនធំ ប្រភេទដំរីទឹកនឹងប្រភេទបង្កុក ជាដើមក្នុងការដឹកជញ្ជូនបទល្មើសព្រៃឈើ ទាំងនេះហើយជាផលលំបាករបស់ប្រជាពលរដ្ឋ ត្បិតអីស្ថានភាពដីនៅខេត្តមណ្ឌគិរីជាប្រភេទដីក្រហម ងាយនឹងជាប់ផុង។
ក្នុងនោះផងដែរ បទល្មើសព្រៃឈើនៅស្រុកអូររាំងក៏មានសេចក្តីរាយការណ៏មកថា ការដឹកជញ្ជូនឈើប្រណីតតាមរថយន្តធុនតូចកាមរីគូទហើម កាមរីគូទស្វិត នឹងឡង់គ្រីស័រ នៅស្រុកអូររាំង ត្រូវបានប្រជាពលរដ្ឋនឹងមន្ត្រីអាជ្ញាធរមួយចំនួនរាយការណ៏ថា ក្នុងមួយថ្ងៃមានមិនតិចជា២០ទៅ៣០គ្រឿងឡើយ ។ ហើយភាគច្រើនឈើប្រណិតទាំងនោះគេបាន ដឹកចេញពី ដីព្រៃតំបន់ការពារភិរក្សជីវចម្រុះអូររាំង ដូចជាភូមិអណ្តូងក្រឡឹង ភូមិពូជូ ភូមិពូឡា ភូមិរកានឹងភូមិពូព្យាម ដែលកាត់តាមផ្លូវជិតវត្តអូររាំង ស្ថិតនៅក្នុងឃុំសែនមនោរម្យ ស្រុកអូររាំង។ សេចក្យការណ៏បានឲ្យដឹងថា ឈើប្រណីតដែលក្រុមឈ្មួញកំពុងដឹកគគ្រឹងគគ្រេងទាំងយប់ថ្ងៃនោះ ភាគច្រើនជាប្រភេទឈើធ្នង់ បេង នឹងនាងនួន គឺដឹកបន្តកន្ទុយគ្នាតែម្តង ។ ការចរាចរឈើប្រណីតតាមផ្លូវជាតិដ៏រលោងស្រិលយ៉ាងរលូនបែបនេះ ពុំមែនមន្រ្តីជំនាញមិនដឹងនោះទេ។ ត្បិតអីស្នាក់ការដែលក្រុមមេព្រៃស្នាក់នៅនឹងធ្វើការ សុទ្ឋសឹងនៅតាមបណ្តោយផ្លូវជាតិលេខ៧៦ទាំងអស់ ហើយផ្លូវដែលគេអាចដឹកឈើបានមានតែផ្លូវមួយខ្សែនេះ។ប្រជាពលរដ្ឋបាលើកឡើងថា ប្រសិបើមន្រ្តីជំនាញទាំងនោះមានឆន្ទៈក្នុងការបង្ក្រាបនឹងទប់ស្តាត់ពិតមែននោះ កុំថាឡើយ២០ទៅ៣០ គ្រឿង សូម្បីរថយន្តដឹកឈើមួយគ្រឿងក៏ឈ្មួញមិនអាចដឹកឈើឆ្លងកាត់មុខបានឡើយ។ តែធាតុពិតអស់លោករាប់បានតែក្បាលឡានចេញនឹងចូល ដឹកឈើដើម្បីយកលុយសំនូកប៉ុណ្ណោះ។ ក្នុងនោះដែរប្រភពដាច់ដោយឡែកមួយទៀតបាននិយាយថា បើមេព្រៃត្រូវថ្នាំសណ្តំទៅហើយ ចុះសមត្ថកិច្ចជាច្រើនស្ថាប័នដែលបានដាក់ឡានតាមដងផ្លូវ ម្តេចមិនជួយទប់ស្តាត់បទល្មើសព្រៃឈើគ្នាខ្លះផង ឬត្រូវថ្នាំទាំងអស់គ្នា។ គេតែងឃើញរថយន្តជាច្រើនប្រភេទបានឈប់តាមផ្លូវដូចជាវាលម្រិច កែងផ្លូវច្រកចូលភូមិអណ្តូងក្រឡឹង កែងផ្លូវច្រកចូលភូមិរកា ជាដើម។ចំណែកកម្ចាស់រថយន្តដែលដេកចាំផ្លូវទាំងអស់នោះ ត្រូវបានអ្នករកស៊ីដឹកឈើលបប្រាប់ថា មានមន្រ្តីខិលខូចមួយចំនួនដូចជា ប៉ូលិសសេដ្ឋកិច្ចក្រសួង ប៉ូលិសសេដ្ឋកិច្ចខេត្ត ប៉េអឹមផ្ទៃប្រទេស ប៉េអឹមខេត្ត ទារហានដឺបេ មេព្រៃ ។
ទាក់ទិនព័ត៌មានខាងលើមន្រ្តីខណ្ឌរដ្ឋបាលព្រៃឈើមណ្ឌលគិរីម្នាក់ បានអះអាងប្រាប់កោះសន្តិភាពថា ពុំមានបទល្មើសដឹកជញ្ជូនឈើប្រណីតណាមួយឆ្លងកាត់ស្នាក់ការផ្នែករដ្ឋបាលព្រៃឈើកែវសីមា សូម្បីមួយគ្រឿងឡើយ។ចំណែកលោក រឿង សុផាត នាយផ្នែករដ្ឋបាលព្រៃឈើកែវសីមា កោះសន្តិភាពបានព្យាយាមទាក់ទងសុំការបំភ្លឺពីលោក តាមរយៈប្រព័ន្ឋទូរស័ព្ទនៅព្រឹកថ្ងៃទី៣១ កក្កដា ២០១៤ តែពុំអាចភ្ជាប់ប្រព័ន្ឋបានឡើយ។ ប្រជាពលរដ្ឋបានអំពាវនាវសុំការអន្តរាគមន៏ពីលោក កែប កត់ នាយខណ្ឌរដ្ឋបាលព្រៃឈើមណ្ឌលគីរី ជួយដាស់តឿន ដល់មន្រ្តីក្រោមឱវាទរបស់ខ្លួនខ្លះផង ដែលកំពុងដើរចោលកន្លែងធ្វើការរហូត មិនដែលឃើញវត្តមាននៅស្នាក់ការ សង្កាត់ រដ្ឋបាលព្រៃឈើអូររាំងឡើយ។ ការសំនូមពរបែបនេះព្រោះពួកគាត់ពិបាកក្នុងការផ្តល់ព័ត៌មានដល់មន្រ្តីជំនាញ ដោយសារ ពុំមានអ្នកប្រចាំកាតនៅកន្លែងមេព្រៃ។
ចែករំលែកព័តមាននេះ