ការព្រួយបារម្ភចំពោះការឆ្លងរាលដាលនៃជំងឺអេបូឡា នៅអាហ្វ្រិកខាងលិចចាប់ផ្តើមកើតមានដល់ពិភពលោកទាំងមូល ដោយអាជ្ញាធរអង់គ្លេស បានប្រកាសអាសន្នកាលពីថ្ងៃទី៣០ កក្កដា ចំពោះការគំរាមកំហែងនោះ ចំណែកក្រុងហុងកុងប្រកាសពីលទ្ធភាពចាត់វិធានការចត្តាឡីសកៈ ។
អង្គការគ្រូពេទ្យគ្មានព្រំដែនបានព្រមានថា វីរុសអេបូឡា ដែលបណ្តាលឱ្យមនុស្សស្លាប់ជាង៦៧០នាក់ហើយ នៅអាហ្វ្រិកខាងលិច តាំងពីដើមឆ្នាំនេះមក ឥឡូវលែងត្រួតត្រាបានហើយវានាំឱ្យមានគ្រោះថ្នាក់ ដ៏ពិតប្រាកដអាចប៉ះពាល់ដល់ប្រទេសថ្មីៗទៀត ។
ជំងឺនោះប៉ះពាល់ដល់ប្រទេសហ្គីណេ លីបេរីយ៉ា ស៊ីរ៉ាឡេអូន ហើយនាំឱ្យមានមនុស្សម្នាក់ស្លាប់នៅនីហ្សេរីយ៉ា ដែលមនុស្សនោះជាអ្នកដំណើរមកកាន់ទីក្រុងឡាហ្គោស តាមយន្តហោះ១គ្រឿងមកពីទីក្រុងម៉ុនរ៉ូ វីយ៉ា កាត់តាមទីក្រុងឡូមេ ដែលបែបនេះញុាំងឱ្យក្រុមហ៊ុនអាកាសចរណ៍អាហ្វ្រិក២ គឺក្រុមហ៊ុន Arik និងក្រុមហ៊ុន Asky ផ្អាកការហោះហើរមកកាន់លីបេរីយ៉ា និងស៊ីរ៉ាឡេអូន ។
សភាពការណ៍នេះ នាំឱ្យអង្គការអាកាសចរណ៍ស៊ីវិលអន្តរជាតិ OACI ពិគ្រោះពិភាក្សាជាមួយអង្គការសុខភាពពិភពលោកក្នុងឱកាសនៃតេឡេខេនហ្វេរេនមួយ កាលពីថ្ងៃទី២៩ កក្កដា តែពុំបានបង្ហាញពីវិធានការនានាជាបន្ទាន់ឡើយ ។ លោក Philip Hammond រដ្ឋមន្ត្រីការបរទេសអង់គ្លេសនិយាយថា នៅទីក្រុងឡុងដ៍ កិច្ចប្រជុំអន្តរជាតិមួយស្តីពីវិបត្តិនោះត្រូវបានរៀបចំធ្វើដោយនាយករដ្ឋមន្ត្រី លោក ដាវីដ កាមឺរ៉ូន ចាត់ទុកជាការគំរាមកំហែងយ៉ាងធ្ងន់ធ្ងរមួយ ៕
ចែករំលែកព័តមាននេះ