សភាអាមេរិកកាលពីថ្ងៃទី៣០ កក្កដា បានអនុម័តនីតិវិធីប្តឹងប្រធានាធិបតី លោក បារ៉ាក់ អូបាម៉ា ពីបទរំលោភបំពានអំណាចជ្រុលហួសហេតុ ។ វិធានការនោះត្រូវបានអនុម័តដោយ២២៥សំឡេងទល់នឹង២០១សំឡេងប្រឆាំង ។ សមាជិកសភាគណបក្សសាធារណរដ្ឋ៥រូប បានបោះឆ្នោតប្រឆាំង ហើយពុំមានអ្នកតំណាងរាស្ត្រគណបក្សប្រជាធិបតេយ្យណាម្នាក់បោះឆ្នោតគាំទ្រឡើយ។
កាលពីថ្ងៃទី២៤ កក្កដា កន្លងមកនេះ គណៈកម្មាធិការបទបញ្ជាផ្ទៃក្នុងរបស់សភាអាមេរិក បានអនុម័តដោយ៧សំឡេងគាំទ្រ និង៤សំឡេងប្រឆាំងការសម្រេចចិត្តមួយ ដែលអនុញ្ញាតឱ្យមានការបោះឆ្នោតអនុម័តនីតិវិធីប្តឹងចោទប្រកាន់លោក អូបាម៉ា ពីបទរំលោភបំពានអំណាចជ្រុលហួសហេតុ ។ នេះជានីតិវិធីមួយខុសពីទម្លាប់ ដែលពួកអ្នកប្រជាធិបតេយ្យបានបរិហារ ។ លោក អូបាម៉ា ត្រូវគេចោទថាពុំបំពេញការទទួលខុសត្រូវរបស់លោក ចំពោះរដ្ឋធម្មនុញ្ញ ដោយពុំអនុវត្តដោយស្មោះស នូវច្បាប់កែទម្រង់ប្រព័ន្ធសុខាភិបាលឆ្នាំ២០១០ ។
ការផ្តួចផ្តើមគំនិតប្តឹងលោក អូបាម៉ា នោះត្រូវបានពួកប្រជាធិបតេយ្យចាត់ទុកថាមានចរិតនយោបាយដែលពួកសាធារណរដ្ឋលើកឡើងមុនការបោះឆ្នោតសភា នាខែវិច្ឆិកា ខាងមុននេះ ។ លោក John Boehner ប្រធានសភាមកពីគណបក្សសាធារណរដ្ឋដែលមានចំនួនភាគច្រើនអះអាងថា លោកប្រធានាធិបតីអូបាម៉ា ប្រែក្លាយខ្លួនលោកទៅជាអធិរាជ ដោយដឹកនាំប្រទេសតាមរយៈក្រិត្យ ហើយធ្វើការបកស្រាយដោយសេរី បណ្តាច្បាប់ទាំងឡាយដែលសភាជាតិអនុម័ត ។ លោកប្រធានាធិបតីដើរហួសពីអំណាចដែលរដ្ឋធម្មនុញ្ញប្រគល់ឱ្យ ហើយវាជាការទទួលខុសត្រូវរបស់សភាដែលត្រូវការពាររដ្ឋធម្មនុញ្ញ ៕
ចែករំលែកព័តមាននេះ