សារព័ត៌មានបរទេស កាលពីថ្ងៃទី៣០ កក្កដា ២០១៤ ផ្សាយថា លោក Theodore Van Kirk អតីតអាកាសយានិករបស់កងទ័ពអាកាសអាមេរិក ដែលយកគ្រាប់បែកបរមាណូ Little Boy ទៅទម្លាក់លើក្រុងហ៊ីរ៉ូស៊ីម៉ា ប្រទេសជប៉ុន នៅថ្ងៃទី៦ សីហា ១៩៤៥ បានស្លាប់ហើយ ក្នុងវ័យ៩៣ឆ្នាំ នៅរដ្ឋជ័រចៀ សហរដ្ឋអាមេរិក ។
អតីតអាកាសយានិក Enola Gay ជាមនុស្សចុងក្រោយធ្លាប់បានផ្តល់បទសម្ភាសន៍ថា ក្រោយពីបានឃើញអានុភាពរបស់គ្រាប់បែកបរមាណូជាលើកដំបូង រូបលោកមិនចង់ឱ្យមានអាវុធមហាប្រល័យលោកប្រភេទនេះ ត្រូវយកទៅទម្លាក់នៅកន្លែងណាទៀតឡើយ ។
លោក Theodore Van Kirk ទទួលស្គាល់ថា ការទម្លាក់គ្រាប់បែកបរមាណូ គឺជាជម្រើសចុងក្រោយរបស់អាមេរិក បើប្រៀបធៀបនឹងការវាយប្រហារតាមផ្លូវអាកាសជាច្រើនលើកដាក់ប្រជុំកោះ ធំៗរបស់ជប៉ុន ។ លោកបញ្ជាក់ពីហេតុការណ៍ជាប្រវត្តិសាស្ត្រតាមស្ថានីយទូរទស្សន៍ Georgia Public Broadcasting ថា ទោះបីជាបរមាណូបានបង្កឱ្យមនុស្សនៅហ៊ីរ៉ូស៊ីម៉ា ស្លាប់យ៉ាងច្រើនក៏ដោយ ប៉ុន្តែធាតុពិតវាជួយការពារជីវិតជនជាតិជប៉ុនដ៏មហាសាល ប្រសិនបើមិនដូច្នោះទេជប៉ុនអាចទទួលការបំផ្លិចបំផ្លាញដ៏ច្រើនលើសលុប ។ យន្តហោះ B-29 ប្រភេទ Enola Gay របស់អាមេរិក រួមជាមួយកងនាវិកចំនួន១២នាក់ បាននាំយកគ្រាប់បែកបរមាណូ Little Boy ទៅទម្លាក់លើក្រុងហ៊ីរ៉ូស៊ីម៉ា ក្នុងថ្ងៃចុងក្រោយមុនសង្គ្រាមលោកលើកទី២ បានបញ្ចប់ ។ អានុភាពរបស់វាបានបំផ្លាញជីវិតមនុស្សក្នុងទីក្រុងប្រហែល១៤០.០០០នាក់ ពីចំនួនប្រជាជនសរុប៣៥០.០០០នាក់ នៅក្នុងខេត្ត ។
ក្នុងរយៈពេល៣ថ្ងៃក្រោយពីហ៊ីរ៉ូស៊ីម៉ា ត្រូវបំផ្លាញ អាមេរិកបញ្ជូនយន្តហោះទៅទម្លាក់គ្រាប់បែកបរមាណូដាក់ក្រុងកំពង់ផែណាង៉ាសាគី បន្តទៀតធ្វើឱ្យរដ្ឋាភិបាលជប៉ុន ប្រកាសចុះចាញ់នៅថ្ងៃទី១៥ សីហា ១៩៤៥ ។លោក Van Kirk រស់នៅរដ្ឋផេនស៊ីល វេនៀ និងធ្លាប់ធ្វើជាអាកាសយានិកក្នុងតំបន់អឺរ៉ុបប្រហែល២ទៅ៣លើក និងបានធ្វើទស្សនកិច្ចក្រុងណាង៉ាសាគី ក្រោយពីសង្គ្រាមលោកលើកទី២បានបញ្ចប់ ។ លោកបានចូលសិក្សាបន្តក្នុងសាលាវិស្វកម្មគីមី និងជាប្រធានក្រុមហ៊ុន Dupont ។
អតីតអាកាសយានិករូបនេះបញ្ជាក់ថា ភារកិច្ចនៅហ៊ីរ៉ូស៊ីម៉ា គ្មានអ្វីលំបាកទេ ប៉ុន្តែអ្វីដែលរូបលោកបារម្ភបំផុត គឺអានុភាពរបស់បរមាណូ អាចធ្វើឱ្យយន្តហោះដែលដឹកទៅវាទម្លាក់ក្លាយជាផេះផង់ជាមួយគ្នាដែរ ។ ប្រហែល៤៣វិនាទី ក្រោយពីទម្លាក់បរមណូទៅលើដី លោកមើលឃើញផ្សែង និងស្នូរកក្រើក ធ្វើឱ្យយន្តហោះញ័ររញ្ជួយ ។ បន្ទាប់ពីសពតម្កល់ទុកនៅមន្ទីរពេទ្យ ពិធីបុណ្យសពរបស់លោក Van Kirk រៀបចំឡើងនៅគេហដ្ឋានរបស់លោកក្នុងទីក្រុងន័រថាមប៊ើលែន រដ្ឋជ័រចៀ សហរដ្ឋអាមេរិក នៅថ្ងៃទី៥ សីហា មុនមួយថ្ងៃ នៃខួបទី៦៩នៃការទម្លាក់គ្រាប់បែកបរមាណូលើប្រទេសជប៉ុននៅថ្ងៃទី៦ សីហា នៃឆ្នាំ១៩៤៥ ៕
ចែករំលែកព័តមាននេះ