រាជធានីភ្នំពេញ ៖ ការជួញដូរមនុស្ស និងជួញដូរកម្លាំងពលកម្ម ក្រោមរូបភាពរៀបអាពាហ៍ពិពាហ៍ នៅតែជាបញ្ហាក្តៅសម្រាប់កម្ពុជានៅឡើយ ។
តាមសេចក្តីថ្លែងការណ៍របស់សមាគមការពារសិទ្ធិមនុស្ស និងអភិវឌ្ឍន៍នៅកម្ពុជា ហៅកាត់ថា«អាដហុក» ចុះថ្ងៃទី៣០ កក្កដា ថា ក្នុងរយៈពេល៦ខែដើមឆ្នាំ២០១៤ សមាគមមានការចាប់អារម្មណ៍ខ្លាំងចំពោះស្ថានភាពស្ត្រីកម្ពុជា ដែលជារឿយៗតែងតែរងគ្រោះពីការជួញដូរផ្លូវភេទ ក្រោមរូបភាពរៀបអាពាហ៍ពិពាហ៍ ជាមួយបុរសជាជនបរទេស ។
សេចក្តីថ្លែងការណ៍ដដែល បានឱ្យដឹងទៀតថា ក្នុងរយៈពេលនេះ សមាគមទទួលពាក្យបណ្តឹងទាក់ទងនឹងការជួញដូរមនុស្សចំនួន១០៨ករណី ពាក់ព័ន្ធនឹងការជួញដូរទៅប្រទេសផ្សេងៗ ដែលមានជនរងគ្រោះសរុបចំនួន២៩៥នាក់ ក្នុងនោះមាន ប្រទេសចិនចំនួន២៦ករណី មានជនរងគ្រោះ២៩នាក់ ។ សមាគមជួយធ្វើអន្តរាគមន៍ទៅស្ថាប័នពាក់ព័ន្ធ ដូចជាក្រសួងការងារ, ក្រសួងមហាផ្ទៃ, ស្ថាប័នទូត-ស្ថានកុងស៊ុល ប្រចាំប្រទេស ។ សេចក្តីថ្លែងការណ៍ សង្កត់ធ្ងន់ថា ជនរងគ្រោះដែលចាញ់បោកមេខ្យល់ទៅរៀបការជាមួយបុរសជនជាតិចិន បានជួបបញ្ហា មួយចំនួនដូចជា ការធ្វើទារុណកម្ម ផ្លូវកាយ ផ្លូវចិត្ត ផ្លូវភេទ ការបង្អត់អាហារ និងការបង្ខំឱ្យធ្វើការផ្ទះដូចទាសករជាដើម ។
ប្រភពដដែលបញ្ជាក់ថា តាមការសិក្សាលើករណីទាំងនេះ គឺបណ្តាលមកពីកង្វះទីផ្សារការងារ ការបាត់បង់ដីធ្លី និងការជំពាក់បំណុលធនាគារជាដើម ។ ក្នុងព្រឹត្តិការណ៍ដោយឡែកទាក់ទិននឹងករណីខាងលើ ស្ត្រីជាប់ចោទម្នាក់ ជាមេអណ្តើកនាំស្ត្រីខ្មែរទៅលក់ផ្លូវភេទនៅចិន ក្រោមរូបភាពរៀបអាពាហ៍ពិពាហ៍ ត្រូវចៅក្រមសាលាដំបូង រាជធានីភ្នំពេញ ប្រកាសសាលក្រម កាលពីថ្ងៃទី៣០ កក្កដា ផ្តន្ទាទោសដាក់ពន្ធនាគារ២ឆ្នាំ ពីបទ សមគំនិតក្នុងការជ្រើសរើសមិនស្របច្បាប់សម្រាប់កេងប្រវ័ញ្ច យោងតាមមាត្រា១២ កថាខណ្ឌទី២ នៃច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ និងមាត្រា ២៩, ៩៣, ៩៤ នៃក្រមព្រហ្មទណ្ឌ ។
សាលក្រមដដែលបង្គាប់ឱ្យជនជាប់ចោទ សងជម្ងឺចិត្តដល់ជនរងគ្រោះ២នាក់ ក្នុងម្នាក់ៗ ៥.០០០ដុល្លារអាមេរិក ។ ស្ត្រីជាប់ចោទឈ្មោះ បូ ស៊ីណា អាយុ៣៧ឆ្នាំ ទីលំនៅមុនពេលចាប់ខ្លួន នៅផ្ទះលេខ៦២១ ភូមិប៉ប្រកខាងជើង តាមបណ្តោយផ្លូវរទេះភ្លើង សង្កាត់កាកាប ខណ្ឌពោធិ៍សែនជ័យ ត្រូវសមត្ថកិច្ចនគរបាលនាយកដ្ឋានចារកម្មក្រសួងមហាផ្ទៃ ឃាត់ខ្លួនកាលពីថ្ងៃទី២០ វិច្ឆិកា ២០១៣ យោងលើពាក្យបណ្តឹងរបស់ដើមបណ្តឹង ។ ក្នុងពាក្យបណ្តឹង បញ្ជាក់ថា កាលពីជាង៣ខែកន្លងទៅ ឈ្មោះ បូ ស៊ីណា ទៅទាក់ទងកូនស្រី នាំយកទៅរៀបការជាមួយបុរសជនជាតិចិន ដែលរស់នៅប្រទេសចិន រួមជាមួយនារីខ្មែរ២នាក់ទៀត ។
ពេលទៅដល់ប្រទេសចិន កូនស្រីពិតជាបានរៀបការជាមួយបុរសចិនពិតមែន តែបានត្រឹមមួយរយៈ កូនស្រីនិងនារីខ្មែរ២នាក់ទៀតនោះ ត្រូវគេលក់ពីម្នាក់ទៅម្នាក់ ដើម្បីបម្រើផ្លូវភេទនៅប្រទេសចិន ។ ដោយសារអត់ទ្រាំនឹងអំពើព្រៃផ្សៃ លំបាកទាំងផ្លូវកាយ និងផ្លូវចិត្តពុំបាន ពួកនាងក៏ទូរស័ព្ទទាក់ទងមកឪពុកម្តាយនៅស្រុកខ្មែរ ឱ្យសមត្ថកិច្ចចាប់ក្រុមជនបោកប្រាស់យកពួកនាងទៅលក់នៅប្រទេសចិន ទើបឪពុកម្តាយជនរងគ្រោះក៏បានដាក់ពាក្យប្តឹងដើម្បីឱ្យសមត្ថកិច្ចជួយស្រាវជ្រាវចាប់ជនល្មើស និងរំដោះពួកនាងមកវិញ ៕
ចែករំលែកព័តមាននេះ