រាជធានីភ្នំពេញ ៖ សមាសភាពគណៈកម្មាធិការជាតិរៀបចំការបោះឆ្នោត (គ.ជ.ប) ដែលគណបក្សទាំងពីរឯកភាពគ្នាជ្រើសរើសចំនួន៩រូប នោះសម្រាប់សមាជិកទី៩បានឯកភាពគ្នាជ្រើសរើសរួចហើយ ។ ប៉ុន្ដែអ្វីដែលមហាជនចង់ដឹង ចង់ឃើញសមាសភាពដែលគណបក្សដាក់ដើម្បីទទួលបានភាពយុត្ដិធម៌ អព្យាក្រឹត តម្លាភាព ក្នុងការបោះឆ្នោតលើកក្រោយនោះ មិនទាន់ដឹងជាផ្លូវការនៅឡើយទេ ទាំងគណបក្សប្រជាជនកម្ពុជាចំនួន៤រូប និងគណបក្សសង្គ្រោះជាតិចំនួន៤រូប ។
បើតាមការអះអាងរបស់ថ្នាក់ដឹកនាំគណបក្សសង្គ្រោះជាតិធ្លាប់បង្ហើបថា សមាសភាព៤រូបសម្រាប់គណបក្សសង្គ្រោះជាតិជ្រើសរើសជាបេក្ខភាព គ.ជ.ប នោះ មានមន្ដ្រីគណបក្ស២រូប និងសង្គមស៊ីវិល២រូប ក្នុងនោះមួយរូបត្រូវបានគេដឹងហើយគឺលោក គួយ ប៊ុនរឿន ។ ជុំវិញសមាសភាព គ.ជ.ប នេះ ភាគីគណបក្សប្រជាជនកម្ពុជា ក៏ពុំទាន់ទម្លាយឱ្យដឹងនៅឡើយដែរ ចាប់តាំងពីថ្នាក់ដឹកនាំគណបក្សទាំងពីរបានឯកភាពគ្នានោះមក ។ លោក សម រង្សុី ប្រធានគណបក្សសង្គ្រោះជាតិ បានលើកឡើងក្នុងវិទ្យុអាស៊ីសេរី កាលពីយប់ថ្ងៃទី២៩ កក្កដា ថា បេក្ខភាពទី៩ ដែលគណបក្សសង្គ្រោះជាតិ និងគណបក្សប្រជាជនកម្ពុជាឯកភាពជ្រើសរើសគឺលោកស្រី ពុង ឈីវកេក ប្រធានអង្គការលីកាដូ ។
ចំពោះបេក្ខភាព២រូបទៀតដែលចេញពីសង្គមស៊ីវិលនោះ គណបក្សសង្គ្រោះជាតិបានសម្លឹងឃើញរួចហើយ និងធានាថាមិនលក់ឧត្ដមគតិ និងពុករលួយទេ ។ ទោះជាយ៉ាងណាក្ដី លោក សម រង្សុី មិនបានឱ្យដឹងពីសមាសភាពមន្ដ្រីសង្គមស៊ីវិល២រូបនោះទេ។ ចំណែកលោក កឹម សុខា អនុប្រធានគណបក្សសង្គ្រោះជាតិ បានលើកឡើងថា គណបក្សសង្គ្រោះជាតិបានជ្រើសរើសលោក គួយ ប៊ុនរឿន ជាបេក្ខភាព គ.ជ.ប មួយរូបហើយ ។ ចំណែកលោកស្រី ពុង ឈីវកេក ដែលជាបេក្ខភាពទី៩នៃសមាសភាព គ.ជ.ប មិនដឹងថាមានតួនាទីជាប្រធាន ឬសមាជិក អាស្រ័យទៅលើសមាជិកទាំងអស់នៃ គ.ជ.ប បោះឆ្នោតជ្រើសរើស ។
ជុំវិញបញ្ហាសមាសភាព គ.ជ.ប ថ្មីនេះ មហាជនគិតថា ជាប្រធានបទយ៉ាងក្ដៅគគុកសម្រាប់អ្នកតាមដានស្ថានការណ៍នយោបាយនៅប្រទេសកម្ពុជា ជាពិសេសតំណែងជាប្រធាន គ.ជ.ប ថ្មីនេះដែលគណបក្សទាំងពីរឯកភាពគ្នានោះ ។ មហាជនតែងចោទសួរថា តើតំណែងនេះនឹងត្រូវបានទៅសមាជិកមួយណាក្នុងចំណោម៩រូប ដែលមកពីគណបក្សទាំងពីរម្ខាង៤រូប និង១រូបទៀតដែលជាសមាជិកទី៩ គឺលោកស្រី ពុង ឈីវកេក នាយិកាអង្គការលីកាដូនោះ អ្នកណាជាប្រធាន ? ពាក់ព័ន្ធនឹងតំណែងប្រធានគណៈកម្មាធិការជាតិរៀបចំការបោះឆ្នោត នេះដែរ លោក សម រង្សុី បានបង្ហាញពីរបៀបនៃការចាត់ចែងការងារ និងការជ្រើសរើសថ្នាក់ដឹកនាំ និងរចនាសម្ព័ន្ធរបស់ គ.ជ.ប គឺទុកឱ្យគ.ជ.ប ខ្លួនឯងជាអ្នកសម្រេច ។ ដូច្នេះយើងត្រូវរង់ចាំសមាជិកទាំង៩រូបត្រូវបានតែងតាំងហើយសិន ។
លោកប្រធានគណបក្សប្រឆាំងរូបនេះថ្លែងថា ពេលណាដែល គ.ជ.ប ចាប់ផ្ដើមដំណើរការហើយនោះ គឺទុកឱ្យគេសម្រេចខ្លួនគេទៅ មិនត្រូវគណបក្សណាបញ្ជាទេ បើយើងបាននិយាយថាឱ្យ គ.ជ.ប ឯករាជ្យគឺត្រូវទុកឱ្យគេឯករាជ្យ ។
មកដល់ពេលនេះ កុំថាឡើយតំណែងជាប្រធាន គ.ជ.ប នោះ សូម្បីតែតំណែងសមាជិកទាំង៨រូបដែលត្រូវតែងតាំងដោយគណបក្សទាំងពីរក៏គេនៅមិនទាន់ដឹងពីសមាសភាពច្បាស់លាស់នៅឡើយដែរ ក្រៅពីបេក្ខភាព លោក គួយ ប៊ុនរឿន មកពីគណបក្សសង្គ្រោះជាតិដែលត្រូវបង្ហាញជាផ្លូវការថា ជាបេក្ខភាព១រូបក្នុងចំណោម៤រូប ដែលត្រូវស្នើដោយគណបក្សសង្គ្រោះជាតិ ។
យ៉ាងណាក៏ដោយ លោក សម រង្សុី ធ្លាប់បានបង្ហើបឱ្យដឹងថា ក្នុងចំណោមបេក្ខភាព៤រូបដែលស្នើដោយគណបក្សរបស់លោក គឺមាន២រូបនឹងត្រូវជ្រើសរើសចេញពីមេដឹកនាំអង្គការសង្គមស៊ីវិល នៅក្នុងប្រទេសកម្ពុជា ។ តាមប្រភពព័ត៌មានក្រៅផ្លូវការមួយចំនួនបានឱ្យដឹងថា បេក្ខភាព២រូបដែលមកពីសង្គមស៊ីវិលនោះគឺលោក គល់ បញ្ញា ប្រធានអង្គការអ្នកសង្កេតការណ៍បោះឆ្នោតខុមហ្វ្រែល និងលោក យ៉េង វីរៈ ប្រធានមជ្ឈមណ្ឌលអប់រំច្បាប់សម្រាប់សហគមន៍ ៕
ចែករំលែកព័តមាននេះ