ក្រុមមេធាវីការពារក្តីរបស់លោកបឺនី អេឡេស្តូន បាននិយាយថា ប្រធានហ្វមមូឡាវ័នរូបនេះបានត្រៀមខ្លួនរួចជាស្រេចបង់ប្រាក់៣៤លានដុល្លារអាមេរិកឱ្យទៅធនាគារអាល្លឺម៉ង់មួយដើម្បីបញ្ចប់ករណីក្តីក្តាំប្រឆាំងរូបគាត់ ។ កាលពីខែមេសាកន្លងទៅ បុរសវ័យ៨៣ឆ្នាំរូបនេះបានឡើងតុលាការក្រុងមុយនិច ប្រទេសអាល្លឺម៉ង់ក្នុងបទចោទពីការសូកប៉ាន់ និងញុះញង់បំបែកសេចក្តីទុកចិត្ត ។ មានការចោទប្រកាន់មិនជាផ្លូវការថា បុរសរូបនេះបានចំណាយប្រាក់៣៣លានអឺរ៉ូដើម្បីធានាឱ្យក្រុមហ៊ុនមួយដែលគាត់គាំទ្រ អាចទិញភាគហ៊ុនក្នុងហ្វមមូឡាវ័ន ។
ក្នុងករណីតុលាការរកឃើញថា មានកំហុសដូចការចោទប្រកាន់ លោកអេឡេស្តូន អាចនឹងត្រូវជាប់គុក១០ឆ្នាំ ហើយភាពជាអ្នកដឹកនាំកីឡាប្រណាំងរថយន្តហ្វមមូឡាវ័នរយៈពេលរាប់ទសវត្សរ៍របស់គាត់ ក៏ត្រូវបញ្ចប់ផងដែរ ។ កាលពីថ្ងៃអង្គារសប្តាហ៍នេះ ក្រុមមេធាវីការពារក្តីរបស់គាត់បានអំពាវនាវឱ្យបញ្ឈប់ការចោទប្រកាន់ដ្បិតពុំមានភស្តុតាងច្បាស់លាស់ ហើយថា ប្រធានហ្វមមូឡាវ័នរូបនេះបានត្រៀមខ្លួនរួចជាស្រេចដើម្បីបង់ប្រាក់ ។
លោក Sven Thomas ម្នាក់ក្នុងចំណោមមេធាវីរបស់លោក អេឡេស្តូនបាននិយាយថា រដ្ឋអាជ្ញាព្រមទទួលយកសំណើខាងលើរួចហើយ ប៉ុន្តែថា សូមទុកពេលឱ្យពួកគេពិនិត្យមើលឱ្យបានពិស្តារសិន ។ យោងតាមច្បាប់របស់អាល្លឺម៉ង់ រដ្ឋអាជ្ញាអាចនឹងដកយកការចោទប្រកាន់អំឡុងការកាត់ក្តីបទឧក្រិដ្ឋពិតប្រាកដណាមួយ ប្រសិនជារាល់ភាគីមានជម្លោះព្រមព្រៀងដោះស្រាយគ្នា ។
នៅក្នុងសេចក្តីប្រកាសមួយ តុលាការបានបញ្ជាក់ថា ការជជែកគ្នារវាងក្រុមរដ្ឋអាជ្ញា និងមេធាវីការពារក្តីពីការបញ្ចប់នីតិវិធីមិនបានឈានដល់កិច្ចព្រមព្រៀងគ្នារួមនៅឡើយទេ ។ ក្រុមរដ្ឋអាជ្ញាបាននិយាយថា លោកអេឡេស្តូនចង់ឱ្យភាគហ៊ុន F1ត្រូវបានទិញដោយក្រុមហ៊ុនដែលគាត់ជួយជ្រោមជ្រែងដើម្បីធានាឱ្យរូបគាត់បានស្ថិតនៅក្នុងតួនាទីជាប្រធានកីឡាមួយនេះច្រើនឆ្នាំទៅមុខទៀត។ សូមបញ្ជាក់ថា លោកអេឡេស្តូនបានកាន់កាប់ F1 អស់ជិត៤០ឆ្នាំមកហើយ ៕
ចែករំលែកព័តមាននេះ