រាជធានីភ្នំពេញ ៖ ការប្រកួតប្រដាល់ដណ្តើមខ្សែក្រវាត់ស្រាបៀរលីអូក្នុងប្រភេទទម្ងន់៦០គីឡូក្រាមនៅលើសង្វៀន CTN នាថ្ងៃទី២ សីហាខាងមុខនេះ ឈានចូលមកដល់សប្តាហ៍ទី៣ហើយ ។ កីឡាករទេស សំខាន់ មកពីក្លិបកងពលតូចលេខ៧០ ត្រូវជួបប្រកួតជាមួយកីឡាករអុឹង បូរ៉ា មកពីក្លិបព្រះខ័នរាជនៃកងរាជអាវុធហត្ថលើផ្ទៃប្រទេស ។
រវាងគូនេះមានប្រវត្តិខុសគ្នាបន្តិចនៅត្រង់ថា ទេស សំខាន់ មិនធ្លាប់គ្រប់គ្រងតំណែងជាម្ចាស់ខ្សែក្រវាត់ណាមួយឡើយ ។ ចំណែក អុឹង បូរ៉ា ធ្លាប់ដណ្តើមបានខ្សែក្រវាត់ស្រាបៀរលីអូមកគ្រប់គ្រងម្តងហើយលើកនេះគេក៏មានបំណងចង់ក្លាយជាម្ចាស់ខ្សែក្រវាត់មួយជំនាន់ទៀតដែរ ។ អ្នកវាយតម្លៃទូទៅគិតថា អុឹង បូរ៉ា មានលទ្ធភាពមិនក្រោម៨០ភាគរយឡើយក្នុងការក្លាយជាម្ចាស់ខ្សែក្រវាត់ស្រាបៀរលីអូលើកនេះ ។ ចំណែកទេស សំខាន់ វិញ ក៏មិនមែនជាជើងអន់បុ៉ន្មានដែរ ហើយបើគេមានលទ្ធភាពយកឈ្នះ អុឹង បូរ៉ា លើកនេះ គេនឹងមានឱកាសច្រើនក្នុងការស្វែងរកតំណែងជាម្ចាស់ខ្សែក្រវាត់។
បុ៉ន្តែសម្រាប់ការជួបប្រកួតគ្នាជាច្រើនលើកច្រើនសាជាលក្ខណៈមិត្តភាព ក៏ដូចជាដណ្តើមខ្សែក្រវាត់ជាដើម ទេស សំខាន់ ភាគតិចណាស់ដែលអាចយកឈ្នះលើ អុឹង បូរ៉ា បាននោះ ។ ដោយឡែក សម្រាប់ការប្រកួតលើកនេះទៀត ទេស សំខាន់ ក៏មិនសូវមានជំនឿចិត្តបុ៉ន្មានដែរ ដោយសារគេធ្លាប់ដឹងពីល្បិចប្រកួតនៅលើសង្វៀនរបស់ ទេស សំខាន់ រួចមកហើយ។
ទេស សំខាន់ មានស្នៀតកែង និងជង្គង់ល្អគួរសម តែចលនានៃការវាយចេញរបស់គេមិនសូវជារហ័សរហួននោះឡើយ ឯចិត្តក៏តូចថែមទៀត ។ ទម្លាប់របស់ ទេស សំខាន់ ប្រសិនបើគូប្រកួតណាគេមានប្រៀបជាងនោះ គេពិតជាធ្វើបានល្អខ្លាំងណាស់ តែបើចាញ់ប្រៀបគេហើយ ចាំមើលចុះ ស្នៀតកែងនិងជង្គង់របស់គេដែលធ្លាប់ល្អនោះ គឺវាយចេញលែងកើតតែម្តង។ រីឯ អុឹង បូរ៉ា ទោះបីស្នៀតកែងនិងជង្គង់របស់គេមិនសូវជាល្អបុ៉ន្មាន បុ៉ន្តែស្នៀតដៃ និងស្នៀតជើងគេល្អអាចវាយនិងទាត់ចេញត្រូវចំគោលដៅភាគច្រើន និងមានទម្ងន់ធ្ងន់ទៀតផង ទើបជួប ទេស សំខាន់ លើកនេះគេគ្មានបារម្ភបន្តិចសោះឡើយ។ ដូច្នេះចាំមើល២នាក់នេះ នរណាជាអ្នកសម្រេចគោលដៅ៕
ចែករំលែកព័តមាននេះ