រាជធានីភ្នំពេញ ៖ ការប្រកួតកីឡាកាយសម្ព័ន្ធជ្រើសរើសជើងឯកទូទាំងប្រទេសប្រចាំឆ្នាំ២០១៤ ដែលជាកម្មវិធីប្រចាំឆ្នាំរបស់ក្រសួងអប់រំយុវជននិងកីឡា និងបានដំណើរការតាំងពីថ្ងៃទី២៤ កក្កដា មកនោះ បានបញ្ចប់ជាស្ថាពរ ហើយ ។ ពិធីបិទការប្រកួតត្រូវបានគេរៀបចំធ្វើ កាលពីល្ងាចថ្ងៃទី២៩ កក្កដា នៅក្នុងសាលប្រកួតកីឡាកាយសម្ព័ន្ធនាពហុកីឡដ្ឋានជាតិអូឡាំពិក ក្រោមអធិបតីភាពលោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានសហព័ន្ធកីឡាកាយសម្ព័ន្ធកម្ពុជា ដោយមានការចូលរួមពីលោក អ៊ុក សិទ្ធិជាតិ អគ្គនាយកកីឡា លោក វ៉ាត់ ចំរើន អគ្គលេខាធិការនៃគណៈកម្មាធិការជាតិអូឡាំពិកកម្ពុជា និងមន្ត្រីពាក់ព័ន្ធជាច្រើននាក់ទៀត ។
លោករដ្ឋមន្ត្រី ថោង ខុន បានមានប្រសាសន៍ថា កីឡាកាយសម្ព័ន្ធបានរស់ឡើងវិញក្រោយថ្ងៃរំដោះ៧មករា ឆ្នាំ១៩៧៩ ក៏ដូចជាកីឡាដទៃទៀតដែរ ។ យើងទាំងអស់គ្នាបានឆ្លងកាត់ពីបាតដៃទទេ ហើយដោយសារយើងស្រលាញ់ និងចង់ឱ្យកីឡាមួយនេះមានការអភិវឌ្ឍ យើងបានលះបង់កម្លាំងកាយ កម្លាំងចិត្ត សម្ភារ និងថវិកាជំរុញសកម្មភាពការបណ្តុះបណ្តាលធនធានមនុស្ស និងបណ្តុះបណ្តាលអត្តពលិកវ័យក្មេង ដោយធ្វើសកម្មភាពហ្វឹកហាត់ជាប្រចាំទើបទទួលបានការចូលរួម និងគាំទ្រដូចពេលនេះ ។ បច្ចុប្បន្នយើងមានធនធានមនុស្សជំនាញ មានទីលានកាយសម្ព័ន្ធសមស្រប មានឧបករណ៍សម្ភារសមល្មម មានក្លិប កីឡាករ-កីឡាការិនី តែយើងនៅខ្វះតែឆន្ទៈ មនសិការការងារ និងការប្តេជ្ញាចិត្តប៉ុណ្ណោះ នឹងឈានដល់គោលដៅសក្តានុពលកីឡាកាយសម្ព័ន្ធជាក់ជាមិនខាន ជាពិសេសក្នុងឆ្នាំ២០២៣ដែលកម្ពុជាយើងធ្វើជាម្ចាស់ផ្ទះក្នុងការប្រកួតកីឡាស៊ីហ្គេម ។
ចំពោះលទ្ធផលចំណាត់ថ្នាក់លើប្រភេទវិញ្ញាសាអាទីស្ទិក (Artistic) បែងចែកជាពីរក្របខ័ណ្ឌគឺ ៖
ឯកត្តជនក្របខ័ណ្ឌក២ផ្នែកបុរសលេងលើឧបករណ៍ចំនួន៤ (កម្រាល-សេះលោត-សេះកង-កង) លេខ១បានទៅកីឡាករ មួន សិលាពេជ្រ មកពីក្លិបខេមឃីត ឃុំខ្វាវ ។ ផ្នែកនារីលេងលើឧបករណ៍ចំនួន៣ (កម្រាល-សេះលោត-ស្នួលំនឹង) លេខ១បានទៅកីឡាការិនី ហេង រក្សា មកពីក្លិបហ្សាក់កឹះមា៉ញ់ ។
ឯកត្តជនក្របខ័ណ្ឌក១ ផ្នែកបុរសលេងលើឧបករណ៍ចំនួន៥ (កម្រាល-សេះលោត-សេះកង-កង និងរបារស្រប) លេខ១បានទៅកីឡាករ សំ រីម មកពីក្លិប៧មករាសែនជ័យ ។ ផ្នែកនារី លេងលើឧបករណ៍ចំនួន៣ (កម្រាល-សេះលោត-ស្នួលំនឹង) លេខ១បានទៅកីឡាការិនី ហឹុម សុភាព មកពីក្លិបកំពង់ក្តារ ។ វិញ្ញាសាកាយសម្ព័ន្ធអាអេរ៉ូប៊ិក (Aerobic) ឯកត្តជនក្របខ័ណ្ឌក២ផ្នែកបុរស លេខ១បានទៅកីឡាករ វើន ស៊ីថា មកពីក្លិបខេមឃីត ឃុំខ្វាវ ខណៈផ្នែកនារីបានទៅកីឡាការិនី ខេន ស្រីណុច មកពីក្លិបខេមឃីតឃុំខ្វាវដូចគ្នា ។ ចំពោះក្របខ័ណ្ឌក១ លើវិញ្ញាសាខាងលើនេះ ផ្នែកបុរសលេខ១ បានទៅកីឡាករ ង៉ែត វាសនា និងផ្នែកនារីបានទៅកីឡាការិនី ផាន សុភ័ក្រ ដែលពួកគេទាំងពីរនាក់មកពីក្លិប៧មករាសែនជ័យដូចគ្នា ។
សម្រាប់ចំណាត់ថ្នាក់ជាក្រុមបុរស-នារី លើប្រភេទវិញ្ញាសាអាអេរ៉ូប៊ិក (Aerobic) លេខ១បានទៅក្លិប៧មករាសែនជ័យ ដែលមានកីឡាករ ង៉ែត វាសនា និង ជឿន ចាន់បូរី, កីឡាការិនី ផាន សុភ័ក្រ និង មួង យូណាន់ ។ លេខ២បានទៅក្លិបអគារស្ពានឥន្ធនូ ដែលមានកីឡាករ កែវ មករា និង ហេង ឈុនលាង, កីឡាការិនី ហ៊ុយ គីមយី និង ទូច រតនា និងលេខ៣បានទៅក្លិបខេមឃីតត្រពាំងឃ្លោក ដែលមានកីឡាករ ឃុន សុភាស់ និង មុត សុខា, កីឡាការិនី ជឹម ស្រីនិច និង ជឿង ស្រីនិត ។
អ្វីដែលគួរឱ្យកត់សម្គាល់នៅក្នុងឱកាសនោះ លោករដ្ឋមន្ត្រី ថោង ខុន បានឧបត្ថម្ភដល់ក្លិបដែលបានចូលរួមក្នុងមួយក្លិបៗទទួលបានទឹកប្រាក់ចំនួន១០០ដុល្លារ និងលោក សុខ ហុង ដែលជាអនុប្រធានសហព័ន្ធ បានឧបត្ថម្ភក្នុង១ក្លិបៗចំនួន៥០ដុល្លារផងដែរ ។ ជាមួយគ្នានេះ លោក ថោង ខុន បាននាំយកអំណោយដែលជាមូលនិធិកីឡាជាតិនៃគណៈកម្មាធិការជាតិអូឡាំពិកកម្ពុជាចំនួន២លានរៀល ព្រមទាំងអង្ករ ទឹកស៊ីអីុវ មី ត្រីខ និងសម្លៀកបំពាក់មួយចំនួនទៀតប្រគល់ជូនដល់កីឡាករតេក្វាន់ដូ រិន ប៊ុនហួត ដែលកាលពីថ្ងៃទី២៧ កក្កដា កន្លងទៅ ផ្ទះរបស់កីឡាករខាងលើត្រូវបានអគ្គិភ័យលេបត្របាក់អស់ទាំងស្រុង ដែលពេលនេះត្រូវការជំនួយជាចាំបាច់ ។
ដូច្នេះបើសិនជាសប្បុរសជនដែលមានសន្តានចិត្តចង់ផ្តល់ការឧបត្ថម្ភដល់ក្រុមគ្រួសារកីឡាករខាងលើ អាចទំនាក់ទំនងតាមរយៈលេខទូរស័ព្ទ ០៧៨ ៦៥៦ ៦៤៦ ដើម្បីអាចឱ្យកីឡាករដែលធ្លាប់តែទទួលបានមេដាយពីព្រឹត្តិការណ៍នានាកន្លងមក មានលទ្ធភាពក្នុងការហ្វឹកហាត់ និងប្រកួតបន្តទៀត ៕
ចែករំលែកព័តមាននេះ