ម្ចាស់ជើងឯកពិភពលោកស្ថាប័ន WBC ហ្វ្លយ មេវេដឌ័រ ក្នុងឱកាសធ្វើសន្និសីទកាសែតនៅស៊ីកាហ្គោកាលពីពេលថ្មីៗកន្លងទៅនេះ បានប្រកាសក្តែងៗថា ខ្លួនមិនត្រឹមតែផ្តួលកីឡាករអាហ្សង់ទីន ម៉ាកូស មេដាណា ឱ្យសន្លប់នៅក្នុងជំនួបលើកទី២ នាខែកញ្ញាខាងមុខនេះទេ ប៉ុន្តែគឺត្រូវតែវាយឱ្យលោក Robert Garcia ដែលជាគ្រូបង្ហាត់មេដាណា ឱ្យសន្លប់ផងដែរ ។
ដំបៅចាស់រវាងកីឡាករអាមេរិករូបនេះជាមួយលោក Garcia បានរើឡើងវិញ ខណៈមានការជជែកប្រកែកគ្នាពីប្រភេទហ្គង់ដែលត្រូវពាក់ប្រកួតនៅថ្ងៃទី១៣ ។ គេនៅចាំបានថា នៅមុនជំនួបលើកទី១របស់គេ មេវេដឌ័រ បានជំទាស់ទៅនឹងជម្រើសរបស់មេដាណា ប៉ុន្តែនៅក្នុងសន្និសីទកាសែតកាលពីថ្ងៃអង្គារ រូបគេបដិសេធថាមិនធ្លាប់បានធ្វើដូច្នោះឡើយ ។ យ៉ាងណាក៏ដោយ លោក Garcia បានផ្តល់ឱ្យរូបគេនូវហ្គង់ពណ៌ផ្កាឈូកសម្រាប់ជំនួបលើកនេះ ។
ថ្លែងនៅចំពោះមុខអ្នកចូលរួម មេវេដឌ័រ បានបញ្ជាក់ថា ៖ «ខ្ញុំបានក្លាយជាជើងឯកនៅពេលដែលលោក Garcia ជាជើងឯក ។ គាត់បានចាកឆ្ងាយពីការប្រកួតអស់ពេលជាយូរមកហើយ ឯខ្ញុំវិញនៅតែជាជើងឯកដល់បច្ចុប្បន្ន ។ នៅថ្ងៃទី១៣ ខែកញ្ញាខាងមុខ ខ្ញុំនៅតែជាជើងឯកដដែល ។ ខ្ញុំគឺជាប្រភេទកីឡាករដែលអាចវ៉ៃគូប្រកួត និងគ្រូរបស់គេក្នុងពេលតែមួយបាន» ។
នៅពេលលោក Garcia ឡើងលើរេញ មេវេដឌ័រឈរពីក្រោយលើកទឹកចិត្តឱ្យមហាជនស្រែកចំអក ។ Garcia បានថ្លែងក្នុងពេលនោះថា ៖ «អ្នក (មេវេដឌ័រ) គួរតែត្រៀមខ្លួនឱ្យបានត្រឹមត្រូវដ្បិត ថ្ងៃទី១៣ កញ្ញា គឺជាការប្រកួតដ៏លំបាកសម្រាប់អ្នក» ។ គ្រូបង្ហាត់វ័យ៣៩ឆ្នាំរូបនេះបានបន្តថា ៖ «មេវេដឌ័រ តើលោកហ៊ានភ្នាល់ដែរឬទេ ។ លោកមានលុយច្រើនណាស់ អ្នកឈ្នះគឺយកទាំងអស់»។
សូមរំលឹកថា ការជួបគ្នាលើកទី១ នៅសង្វៀនក្រុងឡាសវេហ្គាសកាលពីថ្ងៃទី៣ ខែឧសភា មេវេដឌ័រ បានយកឈ្នះមេដាណាដោយពិន្ទុជាឯកច្ឆ័ន្ទគឺ១១៧-១១១, ១១៦-១១២ និង ១១៤-១១៤ ។ យ៉ាងណាក៏ដោយ មេវេដឌ័រ នាពេលនោះត្រូវគេមើលឃើញថា បានរងកណ្តាប់ដៃគូមេដាណារាប់មិនអស់ ។ ទោះជា៤៦ប្រកួតគេមិនធ្លាប់ចាញ់ ប៉ុន្តែវាជាការប្រកួតដ៏ពិបាកបំផុតនៅក្នុងអាជីពរបស់គេ ។ មួយសប្តាហ៍មុនការប្រកួតចូលមកដល់ មេវេដឌ័រ ថ្លែងថា ៖ «នេះជាការប្រកួតដ៏អស្ចារ្យមួយផ្សេងទៀតសម្រាប់ខ្ញុំ ហើយរូបគ េ(មេដាណា)សមនឹងទទួលបានឱកាសលើកនេះដើម្បីមើលថា តើគេអាចធ្វើបានទេនូវអ្វីដែលអ្នកដទៃទៀតចំនួន៤៥នាក់បានព្យាយាមធ្វើពីមុនមក ។ បច្ចេកទេសប្រកួតចុងក្រោយរបស់កីឡាករមេដាណាបានទាក់ទាញចំណាប់អារម្មណ៍ខ្ញុំភ្លាមមួយរំពេច ។ គេជាអ្នកប្រយុទ្ធពេញទៅដោយជំនាញដែលអាចនាំមកនូវគ្រោះថ្នាក់ចាញ់ដោយសន្លប់ចំពោះដៃគូនៅលើរេញ» ។
គួរកត់សម្គាល់ថា កេរ្តិ៍ឈ្មោះរបស់មេដាណាបានល្បីរន្ទឺកាន់តែខ្លាំងឡើង ខណៈកាលពីខែធ្នូ ឆ្នាំ២០១៤ រូបគេបានបំបាក់ម្ចាស់ជើងឯកពិភពលោក៣ជំនាន់ដែលពុំស្គាល់ពាក្យថាចាញ់ Adrien Broner ។
ចំពោះឱកាសជួបជាមួយមេវេដឌ័រលើកទី២នេះ មេដាណា បានសម្តែងនូវក្តីរីករាយយ៉ាងខ្លាំង ។ កីឡាករវ័យ៣០ឆ្នាំរូបនេះថ្លែងថា ៖ «ខ្ញុំសប្បាយចិត្តរកអ្វីផ្ទឹមពុំបានដែលទទួលបានឱកាសឡើងវ៉ៃជាមួយកីឡាករហ្វ្លយ មេវេដឌ័រ ជាលើកទី២ ។ ការប្រកួតនេះនឹងផ្តល់ឱកាសឱ្យខ្ញុំបានបង្ហាញប្រាប់ពិភពលោកថា ខ្ញុំក៏ជាកំពូលជើងខ្លាំងម្នាក់ផងដែរក្នុងប្រភេទទម្ងន់ Welterweight ។ ខ្ញុំបានផ្តួលជើងខ្លាំងម្នាក់ឱ្យចាញ់ជាលើកទី១ ក្នុងអាជីព ហើយខ្ញុំនឹងធ្វើឱ្យដូចគ្នានេះដែរពេលជួបជាមួួយមេវេដឌ័រលើកទី២នេះ» ។
សូមបញ្ជាក់ថា មេដាណា នៅក្នុងចំនួនឡើងសង្វៀនសរុប៣៩លើក គេចាញ់៤លើក មិនដែលស្មើ និងធ្លាប់ផ្តួលដៃគូឱ្យសន្លប់៣១លើក ។ ដោយឡែក មេវេដឌ័រវិញ នៅក្នុង៤៦ប្រកួតគឺគេមិនដែលចាញ់ម្តងណាឡើយ ។ គេធ្លាប់ទាំងផ្តួលដៃគូឱ្យសន្លប់បាន២៦លើកទៀតផង ។ ទោះជាយ៉ាងណា ប្រកួតលើកចុងក្រោយកាលពីថ្ងៃទី៣ខែឧសភា គេឈ្នះយ៉ាងត្រដាបត្រដួស ៕
ចែករំលែកព័តមាននេះ