យោងតាមទីភ្នាក់ងារព័ត៌មានកូរ៉េខាងត្បូង YONHAP ថា ក្នុងឱកាសកិច្ចប្រជុំលើកទី៤ ថ្នាក់រដ្ឋមន្ត្រីការបរទេសរបស់បណ្តាប្រទេសនៅជាប់ទន្លេមេគង្គ និងកូរ៉េខាងត្បូង ក្រុងសេអ៊ូលបានអនុម័តផែនការសកម្មភាពមួយដើម្បីអភិវឌ្ឍតំបន់ទន្លេមេគង្គជាមួយប្រទេស៥ ដែលមានទន្លេនេះឆ្លងកាត់នៅអាស៊ីអាគ្នេយ៍ ។
កិច្ចប្រជុំលើកទី៤ ថ្នាក់រដ្ឋមន្ត្រីការបរទេសនេះប្រព្រឹត្តទៅកាលពីថ្ងៃទី២៩ កក្កដា នៅសណ្ឋាគារ SHILA ក្រុងសេអ៊ូល ។ កិច្ចប្រជុំនោះផ្តោតលើបញ្ហាកិច្ចសហប្រតិបត្តិការដើម្បីការអភិវឌ្ឍតំបន់ទន្លេមេគង្គ លើបញ្ហាសេដ្ឋកិច្ច និងកិច្ចការនយោបាយ ។យោងតាមក្រសួងការបរទេសកូរ៉េខាងត្បូងថា ក្នុងកិច្ចប្រជុំបណ្តាប្រទេសដែលចូលរួមបានអនុម័តជាលើកដំបូងនូវផែនការសកម្មភាពលម្អិតមួយសម្រាប់កិច្ចសហប្រតិបត្តិការសំដៅអភិវឌ្ឍតំបន់ទន្លេមេគង្គរយៈពេល៣ឆ្នាំខាងមុខនេះ ។
ទន្លេមេគង្គជាទន្លេធំមួយហូរកាត់តំបន់អាស៊ីអាគ្នេយ៍ជាទន្លេធំជាងគេទី១០ លើពិភពលោក និងទី៤ នៅអាស៊ី បើគិតពីទំហំ ។ ទន្លេនេះមានប្រភពពីចិន ហើយហូរកាត់ប្រទេស៥ គឺឡាវ ភូមា ថៃ កម្ពុជា និងវៀតណាម ។ក្នុងផ្នែកហេដ្ឋារចនាសម្ព័ន្ធប្រទេសទាំង៦ ដែលចូលរួមប្រជុំបានព្រមព្រៀងគ្នាបង្កើតវិទ្យាស្ថានស្រាវជ្រាវមួយខាងការដឹកជញ្ជូនក្នុងតំបន់មេគង្គ ដើម្បីផ្តល់នយោបាយខាងការដឹកជញ្ជូនរបស់កូរ៉េខាងត្បូង ។ ប្រទេសទាំងនោះសម្រេចផងដែរអនុវត្តគម្រោងនានាខាងស្តារព្រៃឈើ និងដាំដើមឈើឡើងវិញតាមរយៈអង្គការកិច្ចសហប្រតិបត្តិការព្រៃឈើអាស៊ី AFOCO ក្នុងតំបន់មេគង្គ ហើយកូរ៉េខាងត្បូង ក៏សន្យាផងដែរពង្រីកជំនួយសាធារណៈសម្រាប់ការអភិវឌ្ឍ APD ដើម្បីអភិវឌ្ឍតំបន់នោះ ។
ដើម្បីពង្រឹងទំនាក់ទំនងសេដ្ឋកិច្ច បណ្តារដ្ឋមន្ត្រី ក៏ព្រមព្រៀងគ្នាដែរពង្រឹងវិស័យអាទិភាព៦ ដែលរួមមាន វិស័យហេដ្ឋារចនាសម្ព័ន្ធ ការអភិវឌ្ឍធនធានមនុស្ស បច្ចេកវិទ្យាព័ត៌មានវិទ្យា កំណើនបៃតង និងការអភិវឌ្ឍខាងកសិកម្ម។ក្នុងកិច្ចប្រជុំនោះប្រទេសទាំង៥ នៃតំបន់មេគង្គ ក៏សម្តែងផងដែរពីការព្រួយបារម្ភលើការបង្កហេតុនាពេលថ្មីៗនេះរបស់កូរ៉េខាងជើង ៕
ចែករំលែកព័តមាននេះ