រាជធានីភ្នំពេញ ៖ ដោយមានការឧបត្ថម្ភពីស្ថានទូតសហរដ្ឋអាមេរិក ពិព័រណ៌ថ្មីស្តីពី «ដំណើរកាត់វិសាលភាព» នឹងមានបង្ហាញជាសាធារណៈចំនួន៣ថ្ងៃ គឺថ្ងៃទី១ ទី៦ និងទី៩ ខែសីហា នៅរាជធានីភ្នំពេញ ដែលត្រូវបានរៀបចំដោយលោកវុធ លីណូ ពិព័រណ៌នេះបង្ហាញឱ្យឃើញពីស្នាដៃរបស់អ្នកសិល្បៈក្នុងសហគមន៍អាណិកជនខ្មែរនៅសហរដ្ឋអាមេរិក ហើយពិព័រណ៌នេះនឹងប្រព្រឹត្តទៅរហូតដល់ថ្ងៃទី៦ ខែកញ្ញា។ លោក លីណូ គឺជាអ្នកទទួលបានអាហារូបករណ៍សម្រាប់សិក្សាថ្នាក់អនុបណ្ឌិតផ្នែកប្រវត្តិសាស្ត្រសិល្បៈ នៅសាកលវិទ្យាល័យរដ្ឋ New York ក្នុងក្រុង Binghamton នៃសហរដ្ឋអាមេរិក ក្រោមការឧបត្ថម្ភរបស់ក្រសួងការបរទេសសហរដ្ឋអាមេរិក។
ស្នាដៃសិល្បៈយ៉ាងប្រណិតរបស់អ្នកសិល្បៈឈ្មោះ Pete Pin, Amy Lee Sanford និង Soeun Som ដែលប្រើរូបថត ដើម្បីស្វែងយល់ពីបទពិសោធន៍ និងលក្ខណៈស្មុគស្មាញនៃក្រុមអាណិកជនខ្មែរនៅសហរដ្ឋអាមេរិក ដែលកំពុងដាក់តាំងបង្ហាញនៅមជ្ឈមណ្ឌលវិចិត្រសាល បាសាក់ ផ្ទះលេខ១៨ ជាន់ទី២ មហាវិថីសុធារស រាជធានីភ្នំពេញ។ លើសពីនេះទៀត វិចិត្រសាល បាសាក់នឹងមានរៀបចំកម្មវិធីមួយចំនួនជាបន្តបន្ទាប់គ្នាជូនសាធារណជនជាបន្ថែមទៅលើពិព័រណ៌ «ដំណើរកាត់វិសាលភាព» ដែលក្នុងនោះរួមមានការបញ្ចាំងភាពយន្ត បទសំភាសន៍ជាមួយអ្នកសិល្បៈ និងសិក្ខាសាលាស្តីពីរូបថត/គំនូរ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ