លោក Bernie Ecclestone ប្រធានហ្វមមូឡាវ័នពិភពលោកបាននិយាយកាលពីពេលថ្មីៗនេះថា ព្រឹត្តិការណ៍ប្រណាំង Indian Grand Prix ដែលតែងតែរៀបចំធ្វើនៅថ្ងៃទី២៧ ខែតុលា មិនមានទេនៅឆ្នាំ២០១៤ បើទោះណាប្រទេសឥណ្ឌាបានចុះកុងត្រាប្រណាំងដល់ឆ្នាំ២០១៥ ក្តី ។
លោក Bernie Ecclestone ប្រធានហ្វមមូឡាវ័នពិភពលោកបាននិយាយកាលពីពេលថ្មីៗនេះថា ព្រឹត្តិការណ៍ប្រណាំង Indian Grand Prix ដែលតែងតែរៀបចំធ្វើនៅថ្ងៃទី២៧ ខែតុលា មិនមានទេនៅឆ្នាំ២០១៤ បើទោះណាប្រទេសឥណ្ឌាបានចុះកុងត្រាប្រណាំងដល់ឆ្នាំ២០១៥ ក្តី ។
ការអះអាងបែបនេះត្រូវលោក Ecclestone បញ្ជាក់ថា ព្រឹត្តិការណ៍ប្រណាំងខាងដើមមានការជ្រៀតជ្រែកពីអ្នកនយោបាយនិងថា Jaypee Group ជាក្រុមហ៊ុនរៀបចំការប្រកួតបរាជ័យមិនអាចបំពេញការងារសាងសង់តាមគម្រោងដែលបានសន្យា ។
យ៉ាងណាក៏ដោយ បុរសវ័យ៨០ឆ្នាំប្លាយរូបនេះសង្ឃឹមថា Indian Grand Prix នឹងបង្ហាញវត្តមានរបស់ខ្លួនសាជាថ្មីក្នុងពិភព F1 ពិភពលោកនាឆ្នាំ២០១៥ ។ «សង្ឃឹមថា អ្វីៗនៅប្រទេសឥណ្ឌានឹងបានល្អប្រសើរឡើងវិញ» ។
ទោះជាយ៉ាងណា លោក Vicky Chandhok ប្រធានសហព័ន្ធប្រណាំងរថយន្តឥណ្ឌាបានថ្លែងប្រាប់ទីភ្នាក់ងារ BBC ថា លោក Ecclestone និងក្រុមហ៊ុនរៀបចំការប្រណាំង Jaypee Group កំពុងព្យាយាមស្វែករកកាលបរិច្ឆេទថ្មីមួយ ។ លោកបញ្ជាក់ថា លោក Ecclestoneចង់ឱ្យព្រឹត្តិការណ៍ប្រណាំងនេះរៀបចំធ្វើនៅដើមរដូវកាលជាជាងនៅខែតុលាដែលជាកាលបរិច្ឆេទបច្ចុប្បន្ន ។ «រៀបចំការប្រណាំងនៅក្នុងខែតុលា ឆ្នាំ២០១៤ នៅខែមីនា ឬមេសា ឆ្នាំ ២០១៥ គឺជារឿងមិនអាចទៅរួចសម្រាប់ពួកយើងដ្បិតវាអាស្រ័យលើប្រភពធនធាន និងហិរញ្ញវត្ថុ» ។
Chandhok បានសម្តែងសុទិដ្ឋិនិយមថា រាល់បញ្ហាទាំងអស់នឹងត្រូវបានដោះស្រាយខណៈដែលការប្រណាំងចំនួន២លើកមុនមានភាពស្មុគស្មាញលើបញ្ហាពន្ធ ។ «វាបានចំណាយពេលវេលាយ៉ាងយូរ ហើយប្រភពធនធានជាច្រើនត្រូវបានចំណាយដោយហ្វមមូឡាវ័ន និងក្រុមហ៊ុន Jaypee Group នាំយកការប្រណាំងមកកាន់ប្រទេសឥណ្ឌា ។ គ្រប់ៗគ្នាពិតជាបានប្រឹងប្រែងយ៉ាងខ្លាំងដើម្បីទទួលបានច្បាប់អនុញ្ញាតរៀបចំការប្រណាំង» ។ លោកបានបន្តថា ៖ «វាបានបង្ហាញថា ឥណ្ឌាមានសមត្ថភាពគ្រប់គ្រាន់រៀបចំការប្រណាំង ។ ដូច្នេះ វាជាការខ្មាសអៀនមួយ ប្រសិនជាព្រឹត្តិការណ៍ប្រណាំង Indian Grand Prix បាត់ឈ្មោះពីប្រតិទិនហ្វមមូឡាវ័នពិភពលោក ។ សង្ឃឹមថា បញ្ហានឹងត្រូវបានដោះស្រាយក្នុងពេលឆាប់ៗ»។
លោក Ecclestone ដែលគេដឹងថា ជាអ្នករៀបចំប្រតិទិនប្រណាំងហ្វមមូឡាវ័នដោយខ្លួនឯងផ្ទាល់ តែងព្យាយាមរៀងរហូតមកដាក់បញ្ចូលព្រឹត្តិការណ៍ប្រណាំងឱ្យបាន២២កម្មវិធីទៅក្នុងតារាងប្រតិទិន F1 ខណៈដែលបណ្តាក្រុម ក៏ដូចជាកីឡាករចង់បានក្រោម២០កម្មវិធីក្នុងមួយឆ្នាំ ៕
ចែករំលែកព័តមាននេះ