ការថែទាំម៉ាស៊ីនទោចក្រយានយន្តបានត្រឹមត្រូវគឺជាគន្លឹះនៃអាយុកាលប្រើប្រាស់របស់យាននោះហើយការថែរក្សាគប្បីអនុវត្តតាមអនុសាសន៍ផ្ទាល់ពីរោងចក្រនឹងនាំឱ្យលោកអ្នកអាចប៉ាន់ប្រមាណបានពីកិច្ចការដែលគួរធ្វើចំពោះទោចក្រយានយន្តរបស់លោកអ្នកនូវអ្វីដែលបានកើតឡើងចំពោះវា ។
ខាងក្រោមនេះគឺជាវិធីសាស្ត្រដែលស្ថិតក្នុងប្រតិទិននៃតំហែទាំផ្ទាល់របស់រោងចក្រផលិតដើម្បីធានាបាននូវលក្ខខណ្ឌល្អនៅក្នុងការធ្វើដំណើរនិងភាពប្រសើរឡើងទាំងប្រតិបត្តិការនិងសំឡេងរបស់វា៖
-ប្រេងម៉ាស៊ីន : ការផ្លាស់ប្ដូរប្រេងម៉ូតូគួរអនុវត្តជារៀងរាល់ចន្លោះពេល៦ខែឬ៤.៨០០គីឡូម៉ែត្រ ។ មុខងារជាបឋមរបស់ប្រេងម៉ាស៊ីនម៉ូតូគឺមាននាទីជាអ្នកផ្ដល់ជាតិរំអិលនៅក្នុងប្រព័ន្ធម៉ាស៊ីនដើម្បីនាំមកនូវប្រតិបត្តិការយ៉ាងរលូន ។ ម្យ៉ាងទៀតប្រេងម៉ាស៊ីនអាចជួយកាត់បន្ថយសំឡេងម៉ាស៊ីនរក្សាបាននូវធាតុត្រជាក់នៅផ្នែកផ្សេងៗរបស់ម៉ាស៊ីនហើយក៏ជាហ្វឺតសម្រាប់ពីស្ដុងផងដែរ ។ ប្រេងរំអិលត្រូវតែមានជាប់ជានិច្ចទើបអាចធ្វើឱ្យប្រតិបត្តិការរបស់ម៉ាស៊ីនដើរស្រួលនិងស្របតាមលក្ខណបច្ចេកទេស ។
មួយវិញទៀតប្រេងរំអិលមិនអាចមានសភាពខាប់ពេកនោះឡើយព្រោះវាមិនអាចជ្រាបនូវជាតិរំអិលទៅនឹងផ្នែកតូចៗរបស់ម៉ាស៊ីនបានល្អ ។ ដូចនេះប្រភេទប្រេងម៉ាស៊ីនដែលប្រើប្រាស់សម្រាប់ម៉ូតូសំខាន់គឺគួរតែផ្លាស់ប្ដូរឱ្យបានទៀងទាត់ទើបជាការល្អ ។
– ប្រេងឥន្ធនៈ : ប្រភេទប្រេងឥន្ធនៈ(សាំងធម្មតា-ស៊ុបពែរ)ដែលលោកអ្នកចាក់បញ្ចូលរេស៊ីវ័រម៉ាស៊ីនម៉ូតូគឺជាកក្តាសំខាន់មួយនៃប្រតិបត្តិការរបស់វា ។ ពីព្រោះការមិនដំណើរការទៀងទាត់របស់ម៉ាស៊ីនគឺពេលខ្លះវាតម្រូវឱ្យលោកអ្នកប្រើប្រាស់ប្រេងឥន្ធនៈដែលមានលំដាប់ថ្នាក់ខ្ពស់ជាងធម្មតាដូចជា សាំងស៊ុបពែរជាដើម ។ សូមចងចាំថា ការប្រើប្រាស់ប្រេងឥន្ធនៈប្រភេទនេះគឺសម្រាប់ជាប្រយោជន៍ដល់ការបង្កើនប្រតិបត្តិការម៉ាស៊ីនមិនមានតម្លៃបន្ថែមក្រៅពីនេះឡើយ ។ គួររំលឹកថា ប្រតិបត្តិការនិងភាពយូរអង្វែងរបស់ម៉ាស៊ីនមិនត្រូវបានបង្កើនឡើយពីព្រោះតែអុកតាននៃប្រេងឥន្ធនៈមានការកើនឡើង ។
– ច្រវាក់ម៉ូតូ : លោកអ្នកគួរពិនិត្យពិច័យច្រវាក់ម៉ូតូតាមការមើលឃើញនិងភ្នែកជារៀងរាល់២ដងក្នុងមួយខែឬ៨០០ទៅ១.១០០គីឡូម៉ែត្រប្រសិនបើម៉ូតូរបស់លោកអ្នកមិនសូវបានជិះទៅណាញឹកញាប់ទេនោះ ។ មុខងាររបស់ច្រវាក់ម៉ូតូគឺផ្ទេរថាមពលពីម៉ាស៊ីនទៅកង់ក្រោយ ។ ដូចនេះវានឹងតម្រូវឱ្យមានការសម្អាតនិងរឹតសម្រួលវាទៅតាមអំឡុងពេលនៃការប្រើប្រាស់ម៉ូតូរបស់លោកអ្នកដើម្បីជាការថែទាំនូវប្រតិបត្តិការឱ្យមានសុវត្ថិភាព។ ភាពធ្វេសប្រហែសនៅត្រង់ចំណុចនេះ(ច្រវាក់ម៉ូតូ)អាចបណ្ដាលឱ្យម៉ូតូរបស់លោកអ្នកមិនដំណើរការឬជួបបញ្ហាធ្ងន់ធ្ងរដែលវាអាចបណ្ដាលឱ្យគ្រោះថ្នាក់បាននៅក្នុងពេលបើកបរ ។
– ប៊ូស៊ី : ប្រព័ន្ធប៊ូស៊ីគឺជាចំណុចពិសេសនិងមានសារសំខាន់នៅក្នុងប្រតិបត្តិការទាំងស្រុងរបស់ម៉ូតូ ។ ដូចនេះកក្តាមានប្រយោជន៍គឺលោកអ្នកដកវាចេញដោយប្រើប្រាស់ឧបករណ៍បាញ់ខ្យល់សម្អាតវាក៏ដូចជារន្ធទីតាំងប៊ូស៊ីនោះឱ្យបានស្អាតទើបផ្ដល់នូវប្រតិបត្តិការល្អក្នុងការបំពេញតួនាទីរបស់វាព្រោះការធ្វើបែបនេះនឹងអាចសម្អាតនូវកម្ទេចធូលីដែលធ្លាក់ទៅក្នុងម៉ាស៊ីន ។
– តម្រងខ្យល់ឬអ៊ែររបស់ម៉ូតូ : ប្រសិនបើតម្រងខ្យល់របស់ម៉ូតូមានសភាពកកកុញទៅដោយធូលីនិងកម្ទេចកម្ទីផ្សេងៗនោះម៉ូតូរបស់លោកអ្នកនឹងមិនអាចដកដង្ហើមឬស្រូបខ្យល់បានត្រឹមត្រូវឡើយ ។ ដូច្នេះវានឹងបណ្ដាលឱ្យខាតបង់ថាមពលនិងប្រតិបត្តិការពុំស្របតាមបទដ្ឋានឡើយ។ដើម្បីជាការប្រសើរគឺដោះវាចេញនិងពិនិត្យនៅត្រង់ចំណុចដែលមានភាពកកស្ទះរន្ធខ្យល់ចេញចូលម៉ាស៊ីន ៕
ចែករំលែកព័តមាននេះ