រាជធានីភ្នំពេញ ៖ ក្រសួងការបរទេសនិងសហប្រតិបត្តិការអន្តរជាតិបានចាត់បញ្ចូនញត្តិតវ៉ារបស់សហព័ន្ឋនិស្សិតបញ្ញវន្តកម្ពុជា និង សហគមន៍ខ្មែរកម្ពុជាក្រោម ទៅកាន់រដ្ឋាភិបាលនៃសាធារណរដ្ឋសង្គមនិយមវៀតណាមរួចរាល់ហើយ ។
នេះបើយោងតាមលោក កុយ គួង អ្នកនំាពាក្យក្រសួងការបរទេស និងសហប្រតិបត្តិការអន្តរជាតិ ដែលបង្ហើបបា្រប់កោះសន្តិភាពនៅព្រឹកថ្ងៃទី៣០ កក្កដា ២០១៤ ។
បើតាមលោក កុយ គួង ញ្ញតិ្តនេះត្រូវបានក្រសួងការបរទេសបញ្ជូនភា្លមៗបន្ទាប់ពីទទួលបានពីសាលារាជធានីភ្នំពេញ ។
គួររំលឹកថា កាលពីថ្ងៃទី២១និង២២កក្កដាកន្លងមកថ្មីៗនេះ ក្រុមសហព័ន្ឋនិស្សិតបញ្ញវន្តកម្ពុជា ដឹកនំាដោយ លោក ម៉ៅ ពិសេស និង សហគមន៍ខ្មែរកម្ពុជាក្រោមប្រចំាប្រទេសកម្ពុជា ដឹកនំាដោយលោក ថាច់ សេដ្ឋា បានទៅប្រមូលផ្តុំគ្នាតវ៉ាដាក់ញ្ញតិ្តនៅមុខស្ថានទូតវៀតណាមប្រចំាប្រទេសកម្ពុជា ប្រយោជន៍ដើម្បីទាមទារឲ្យអ្នកនំាពាក្យស្ថានទូតវៀតណាម លោក ត្រឹង វ៉ាន់ថុង សុំទោសនិងទទួលស្គាល់ប្រវត្តិសាស្រ្តទាក់ទងទៅនឹងដែនដីកម្ពុជាក្រោម ប៉ុន្តែស្ថានទូតវៀតណាមមិនព្រមឹទទួលយក ទើបក្រុមសហព័ន្ឋនិស្សិតបន្តការដង្ហែញ្ញត្តិដាក់តាមស្ថានទូតប្រទេសមហាអំណាចនានាប្រចំាកម្ពុជា និងតវ៉ាដាក់ញ្ញតិ្តនៅស្ថានទូតវៀតណាម រហូតសាលារាជធានីភ្នំពេញកោះប្រជុំជាមួយតំណាងសហព័ន្ឋនិស្សិត និងសហគមន៍ខ្មែរកម្ពុជា និងបានចេញមុខទទួលយកញ្ញត្តិនោះ ដើម្បីសម្របសម្រួលបញ្ជូនទៅក្រសួងការបរទេសនិងសហប្រតិបត្តិការអន្តរជាតិ ចាត់ការបញ្ជូនបន្តទៅរដ្ឋាភិបាលវៀតណាមតាមរយៈស្ថានទូតវៀតណាមប្រចំាកម្ពុជា ។
យ៉ាងណាក៏ដោយ បើតាមអ្នកនំាពាក្យក្រសួងការបរទេសនិងសហប្រតិបត្តិការអន្តរជាតិ មកដល់ព្រឹកថ្ងៃទី៣០ កក្កដា ២០១៤នេះ ក្រសួងការបរទេសមិនទាន់ទទួលបានការឆ្លើយតបណាមួយនៅឡើយទេ ពីរដ្ឋាភិបាលវៀតណាម ៕
ចែករំលែកព័តមាននេះ