ខេត្តត្បួងឃ្មុំ ៖ យុវជនកើតរោគសរសៃប្រសាទម្នាក់ ឈ្មោះ ហ៊ឹម សុខណា អាយុ២២ឆ្នាំ នៅភូមិកញ្ចែរ ឃុំកក់ ស្រុកពញាក្រែក បានចាប់ក្មួយប្រុសរបស់ខ្លួនអាយុ៦ឆ្នាំ ចងទៅនឹងជញ្ជាំងលើផ្ទះតាំងពីវេលាម៉ោងជាង១០ព្រឹកថ្ងៃទី២៩ កក្កដា ២០១៤ រហូតដល់វេលាម៉ោង៨យប់នៅមិនទាន់ដោះលែងទៀត
ខេត្តត្បួងឃ្មុំ ៖ យុវជនកើតរោគសរសៃប្រសាទម្នាក់ ឈ្មោះ ហ៊ឹម សុខណា អាយុ២២ឆ្នាំ នៅភូមិកញ្ចែរ ឃុំកក់ ស្រុកពញាក្រែក បានចាប់ក្មួយប្រុសរបស់ខ្លួនអាយុ៦ឆ្នាំ ចងទៅនឹងជញ្ជាំងលើផ្ទះតាំងពីវេលាម៉ោងជាង១០ព្រឹកថ្ងៃទី២៩ កក្កដា ២០១៤ រហូតដល់វេលាម៉ោង៨យប់នៅមិនទាន់ដោះលែងទៀត ដោយមានកាំបិតចំនួន២គំរាមមិនឲ្យនរណាម្នាក់ចូលមកយកក្មេងនេះទេ តែត្រូវបានលោកឧត្តមសេនីយ៏ត្រី ម៉ៅ ពៅ ស្នងការនគរបាលខេត្ត ដឹកនាំកម្លាំងសមត្ថកិច្ចជាច្រើននាក់ចុះទៅរំដោះចំណាប់ខ្មាំងពីកណ្តាប់ដៃពូវិកលចរិកនោះហើយ ។
លោកអនុសេនីយ៏ឯក អាំ សុផល អធិការស្តីទីនគរបាលស្រុកពញាក្រែក ប្រាប់ឲ្យដឹងថា នៅព្រឹកថ្ងៃកើតហេតុ ក្មេងប្រុសម្នាក់ឈ្មោះ ថា ឆារ៉ាត បានជិះកង់ចេញពីផ្ទះរបស់ខ្លួន នៅភូមិបុសទី មកលេងនៅផ្ទះពូឈ្មោះ សុខណា ដោយបានអង្គុយលេងនៅខាងក្រោមផ្ទះ ។ ពេលនោះពូបានចុះពីលើផ្ទះមកចាប់បីក្មួយឡើងទៅលើផ្ទះចងនឹងជញ្ជាំងផ្ទះ ហើយថែមទាំងមានកាន់កាំបិតចំនួន២ ក្នុងនោះវែងមួយខ្លីមួយ គំរាមមិនឲ្យនរណាចូលមកយកក្មេងនេះទេ ។ ស្របពេលដែលមានហេតុការណ៏ភ្ញាក់ផ្អើលខាងលើនេះ រូបលោកបានដឹកនាំមន្រ្តីក្រោមឪវាទ ចុះទៅដល់ផ្ទះកើតហេតុជាបន្ទាន់មានទាំងមេបញ្ជាការអាវុធហត្ថស្រុកពញាក្រែក កម្លាំងសរុបជាង១០នាក់ ។ ក្រោយពីបានចងទៅនឹងរបារជញ្ជាំងផ្ទះមិនអស់ចិត្តក៏ស្រាយចំណង មកចងនៅសសរកណ្តាលផ្ទះទៀត រហូតដល់វេលាម៉ោង៨យប់ទៅហើយនោះសមត្ថកិច្ចនៅតែមិនទាន់រំដោះចំណាប់ខ្មាំង ចេញពីកណ្តាប់ពូនោះនៅឡើយទេ ។
លោកឧត្តមសេនីយ៏ត្រី ម៉ៅ ពៅ ស្នងការនគរបាលខេត្ត មានប្រសាសន៏ឲ្យដឹងថា រូបលោកបានដឹកកម្លាំងអន្តរាគមន៏ខេត្ត ហើយលោកនាយឧត្តមសេនីយ៏ នេត សាវឿន អគ្គស្នងការនគរបាលជាតិក៏បានបញ្ជូនកម្លាំងពិសេសមកពីរាជធានីភ្នំពេញ ដើម្បីចុះទៅរំដោះក្មេងប្រុសតូចនោះហើយដែរ ។
ព័ត៌មានចុងក្រោយត្រូវបានលោកវរសេនីយ៏ត្រី ចក់ សុខកៅ នាយស្តីទីការិយាល័យព្រហ្មទណ្ឌកំរិតធ្ងន់ខេត្តបានប្រាប់ឲ្យដឹងដែរថា នៅវេលាម៉ោង១១និង៤៥នាទីយប់ សមត្ថកិច្ចបានបាញ់គ្រាប់កាំភ្លើងសណ្តំលើជនវិកលចរិក ដើម្បីឲ្យសន្លប់ គ្រានោះមន្រ្តីនគរបាលម្នាក់ បានឡើងទៅរំដោះក្មេងប្រុសនោះតែទាញមិនបាន ដោយជើងជាប់នឹងសសរផ្ទះ ក៏ត្រូវបានជនវិកលចរិកកាប់ប្រហារត្រូវមន្រ្តីនោះចំដៃម្ខាងបណ្តាលឲ្យរងរបួស ក៏ប្រញាប់ចុះមកដីវិញ ។ ចំណែកក្មេងតូចនោះត្រូវបានពូកាប់ត្រូវ៥ទៅ៦កាំបិតចំ.ក ដៃស្តាំនិងជើងរងរបួសជាធ្ងន់ បន្ទាប់មកពូវិកលចរិកនេះ បានលោតចុះពីលើផ្ទះកាន់កាំបិតបំរុងនឹងកាប់គេឯងទៀត តែត្រូវបានសមត្ថកិច្ចប្រើសិទ្ធិការពារខ្លួន បាញ់លើជននោះបណ្តាលឲ្យស្លាប់ ។
ក្រោយពីកើតហេតុ ក្មេងប្រុសរងគ្រោះត្រូវបានសមត្ថកិច្ច បញ្ជូនទៅសង្រ្គោះជាបន្ទាន់នៅមន្ទីរពេទ្យ តែអកុសលបានស្លាប់តាមផ្លូវ ៕
ចែករំលែកព័តមាននេះ