រាជធានីភ្នំពេញ ៖ ថ្លែងនៅក្នុងពិធីបិទវគ្គប្រគល់វិញ្ញាបនបត្រសម្បទាខាងវិជ្ជាជីវៈមេធាវីដល់សិស្សមេធាវីជំនាន់ទី១០ ទី១១ និងទី១២និងពិធីបើកវគ្គសិក្សាវិជ្ជាជីវៈមេធាវីដល់សិស្សមេធាវីជំនាន់ទី១៣ កាលពីថ្ងៃទី២៩ កក្កដា នៅសាលាភូមិន្ទរដ្ឋបាលលោក ប៊ុន ហុន ប្រធានគណៈមេធាវីនៃព្រះរាជាណាចក្រកម្ពុជា បានបញ្ជាក់ថា គិតមកដល់ថ្ងៃទី២៩ កក្កដា គណៈមេធាវីមានមេធាវីពេញសិទ្ធិដែលកំពុងប្រកបវិជ្ជាជីវៈមេធាវីមានចំនួន៧២៥រូប ក្នុងនោះស្ត្រីចំនួន១៣៤រូបដែលចំនួននេះមិនគិតពីមេធាវីដែលសុំមិនប្រកបវិជ្ជាជីវៈមេធាវី សុំនៅក្រៅបញ្ជី និងមេធាវីដែលបានលុបឈ្មោះចេញពីគណៈមេធាវីនោះទេ ។
គួរបញ្ជាក់ថា នៅសាលាភូមិន្ទរដ្ឋបាលថ្ងៃទី២៩ កក្កដា មានរៀបចំពិធីបិទវគ្គប្រគល់វិញ្ញា បនបត្រសម្បទាខាងវិជ្ជាជីវៈមេធាវីដល់សិស្សមេធាវីជំនាន់ទី១០ទី១១និងទី១២ និងបើកវគ្គសិក្សាវិជ្ជាជីវៈមេធាវីដល់សិស្សមេធាវីជំនាន់ទី១៣ ក្រោមអធិបតីភាពលោកបណ្ឌិតសភាចារ្យ សុខ អាន ឧបនាយករដ្ឋមន្ត្រី រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី ។
លោក ប៊ុន ហុន ប្រធានគណៈមេធាវីនៃព្រះរាជាណាចក្រកម្ពុជាបានឲ្យដឹងថា សិស្សមេធាវីដែលត្រូវទទួលបានវិញ្ញាបនបត្រនាពេលនេះមានចំនួន១៤០រូប ដែលជាអតីតសិស្សមេធាវីជំនាន់ទី១០ ទី១១ និងទី១២ រួមជាមួយសិស្សមេធាវីជំនាន់ទី១៣ចំនួន៥៤រូបទៀត ដែលទើបប្រឡងជាប់ជា ស្ថាពរនៅថ្ងៃទី២៩ ឧសភា កន្លងទៅនេះ ។ លោក ប៊ុន ហុន បញ្ជាក់ថា ដោយសារការខិតខំប្រឹងប្រែងរបស់គណៈមេធាវីក្នុងការកសាងធនធានមេធាវីចាប់តាំងពីឆ្នាំ១៩៩៥មកនោះ រហូតមកដល់ពេលនេះគណៈមេធាវីបណ្តុះបណ្តាលមេធាវីបានចំនួន១៣ជំនាន់ មកហើយ ។
ជាលទ្ធផលគិតត្រឹមថ្ងៃទី២៩ កក្កដា ឆ្នាំ២០១៤ គណៈមេធាវីមាន មេធាវីពេញសិទ្ធិដែលកំពុងប្រកបវិជ្ជាជីវៈមេធាវីចំនួន៧២៥រូបក្នុងនោះមេធាវីជាស្ត្រីចំនួន១៣៤រូប ប្រមាណ១៨,៥% ដែលចំនួននេះមិនគិតពីមេធាវីដែលសុំមិនប្រកបវិជ្ជាជីវៈ មេធាវីសុំនៅក្រៅបញ្ជី និងមេធាវីដែលបានលុបឈ្មោះចេញពីគណៈមេធាវីនោះទេ ។ លោកបន្ថែមថា មេធាវីទាំងអស់នោះបានតាំងការិយាល័យរបស់ខ្លួននៅទូទាំងព្រះរាជាណាចក្រកម្ពុជាបានចំនួន៣០០ការិយាល័យ ។
លោកឧបនាយករដ្ឋមន្ត្រីបណ្ឌិតសភាចារ្យ សុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានថ្លែងនូវការអបអរសាទរចំពោះសិស្សមេធាវីទាំងអស់ដែលទទួលបានវិញ្ញាបនបត្រសម្បទាខាងវិជ្ជាជីវៈមេធាវីនាឱកាសនេះ បន្ទាប់ពីការខិតខំប្រឹងប្រែងរៀនសូត្ររហូតទទួលបានជោគជ័យ ។ លោកចាត់ទុកវិញ្ញាបនបត្រនេះមានអត្ថន័យយ៉ាងជ្រាលជ្រៅនិងជាមោទនភាពយ៉ាងធំធេងសម្រាប់បុគ្គលខ្លួនឯង ក៏ដូចជាក្រុមគ្រួសារនិងប្រទេសជាតិ ។
លោកបណ្ឌិតសភាចារ្យ សុខ អាន បានផ្តាំផ្ញើដល់សិស្សមេធាវីទាំងអស់ដែលទទួលបាន វិញ្ញាបនបត្រនាពេលនេះ ត្រូវបន្តខិតខំប្រឹងប្រែងសិក្សាស្រាវជ្រាវនិងធ្វើបច្ចុប្បន្នភាពចំណេះដឹងឱ្យបានទាន់តាមការវិវឌ្ឍរបស់សង្គមព្រោះថា ចំណេះដឹងតែមួយមុខគត់ពិតជាមិនគ្រប់គ្រាន់ឡើយ ហើយត្រូវខិតខំតស៊ូប្រឹងប្រែងត្រូវមានគំនិតច្នៃប្រឌិត ស្មារតីទទួលខុសត្រូវ វិន័យការងារ សីលធម៌រស់នៅល្អ និងភាពជាម្ចាស់ការទើបយើងអាចទទួលបានជោគជ័យក្នុងអាជីពវិជ្ជាជីវៈ ។ លោកឧបនាយករដ្ឋមន្ត្រីបន្តថា ចំណេះដឹង និងជំនាញបច្ចេកទេសដែលទទួលបានពីការសិក្សា នឹងក្លាយជាដើមទុនមួយសម្រាប់ការវិនិយោគនាពេលអនាគត ប៉ុន្តែគប្បីត្រូវចេះប្រើប្រាស់ដើមទុនដ៏មានតម្លៃនេះឱ្យបានត្រឹមត្រូវប្រកបដោយគំនិតច្នៃប្រឌិតខ្ពស់វិចារណញ្ញាណ និងគោរពសីលធម៌វិជ្ជាជីវៈរបស់ខ្លួនដើម្បីផ្តល់ផលប្រយោជន៍ដល់ខ្លួនឯង និងដល់សង្គមជាតិទាំងមូល ។
លោកបណ្ឌិតសភាចារ្យសុខ អាន បានដាស់តឿនដល់មេធាវីទាំងអស់ត្រូវប្រកាន់ខ្ជាប់នូវតួ នាទីរបស់ខ្លួន ក្នុងការតំណាងនិងការការពារសិទ្ធិរបស់កូនក្ដីទោះក្នុងគោលដៅការពារប្រយោជន៍ ឯកជនស្របច្បាប់របស់អតិថិជនរបស់ខ្លួន ក៏ដូចជាការការពារផលប្រយោជន៍ទូទៅរបស់សង្គម។ លើសពីនេះ មេធាវីត្រូវប្រកាន់ឱ្យបានខ្ជាប់ខ្ជួនផងដែរនូវក្រមសីលធម៌វិជ្ជាជីវៈដើម្បីធានាថា វិធីសាស្ត្រនៃការអនុវត្តវិជ្ជាជីវៈរបស់ខ្លួនត្រូវបានធ្វើឡើងដោយមានក្រឹត្យក្រមនិងការទទួលខុសត្រូវខ្ពស់ ។ មេធាវីដែលល្អ គឺមេធាវីដែលមានសមត្ថភាព មានមនសិការ មានសីលធម៌ល្អ ស្អាតស្អំ និងគោរពតាមក្រមសីលធម៌វិជ្ជាជីវៈ ៕
ចែករំលែកព័តមាននេះ