ខេត្តស្ទឹងត្រែង ៖ បុរសជនជាតិឡាវម្នាក់ត្រូវបានចាប់ខ្លួន ខណៈធ្វើសកម្មភាពជួញដូរគ្រឿងញៀននៅក្នុងខេត្តស្ទឹងត្រែង កាលពីវេលាម៉ោង១១និង៣៥នាទីព្រឹក ថ្ងៃទី២៩ កក្កដា ២០១៤ នៅលើដងផ្លូវលេខ៧៣៩ ស្ថិតក្នុងភូមិអូរស្វាយ ឃុំអូរស្វាយ ស្រុកថាឡាបរិវ៉ាត់ ។ តាមប្រភពព័ត៌មានឱ្យដឹងថា ជនសង្ស័យជាជនជាតិឡាវខាងលើ បានលួចឆ្លងដែនចូលតាមច្រករបៀងវើនខាម មកក្នុងភូមិសាស្ត្រឃុំអូរស្វាយ
ខេត្តស្ទឹងត្រែង ៖ បុរសជនជាតិឡាវម្នាក់ត្រូវបានចាប់ខ្លួន ខណៈធ្វើសកម្មភាពជួញដូរគ្រឿងញៀននៅក្នុងខេត្តស្ទឹងត្រែង កាលពីវេលាម៉ោង១១និង៣៥នាទីព្រឹក ថ្ងៃទី២៩ កក្កដា ២០១៤ នៅលើដងផ្លូវលេខ៧៣៩ ស្ថិតក្នុងភូមិអូរស្វាយ ឃុំអូរស្វាយ ស្រុកថាឡាបរិវ៉ាត់ ។ តាមប្រភពព័ត៌មានឱ្យដឹងថា ជនសង្ស័យជាជនជាតិឡាវខាងលើ បានលួចឆ្លងដែនចូលតាមច្រករបៀងវើនខាម មកក្នុងភូមិសាស្ត្រឃុំអូរស្វាយ បានប្រហែលជាង៥០០ម៉ែត្រ ក៏ត្រូវកម្លាំងការិយាល័យផ្សព្វផ្សាយអប់រំនៃមន្ទីរប្រឆាំងគ្រឿងញៀនចាប់ឃាត់ខ្លួន និងឆែកឆេរ ឃើញគ្រឿងញៀនវេចខ្ចប់ក្នុងកញ្ចប់មួយដែលរុំជិតដោយស្កុតពីខាងក្រៅ ។
ក្រោយការឃាត់ខ្លួន កម្លាំងការិយាល័យផ្សព្វផ្សាយអប់រំនៃមន្ទីរប្រឆាំងគ្រឿងញៀន បានបញ្ជូនបុរសម្នាក់នេះមកកាន់ការិយាល័យកណ្តាលនគរបាលយុត្តិធម៌នៃស្នងការដ្ឋាននគរបាលខេត្ត និងបានអញ្ជើញលោកស្រីព្រះរាជអាជ្ញារង និងក្រឡាបញ្ជីចូលរួមក្នុងការធ្វើតេស្ត រកសារធាតុញៀន និងកសាងសំណុំរឿងទៅតាមនីតិវិធី ។ មន្ត្រីការិយាល័យប្រឆាំងគ្រឿងញៀន ក្រោយពីធ្វើតេស្តទៅលើវត្ថុតាងដែលបានរឹបអូសបញ្ជាក់ថា នេះជាប្រភេទមេតំហ្វេតាមីនម្សៅពណ៌ស(មា៉ទឹកកក) មានទម្ងន់ជិតមួយគីឡូក្រាម (៩៩៣ក្រាម) ។
ក្រោយពីមានការសង្ស័យទៅលើជនជាតិឡាវខាងលើ ក៏បានឃាត់ខ្លួននិងឆែកឆេរ ទើបរកឃើញថ្នាំញៀនប្រភេទម្សៅពណ៌សថ្លានេះ ដោយមានការវេចខ្ចប់ស្កុតពីក្រៅនៅក្នុងប្រអប់ទឹកដោះគោក្រដាសបួនជ្រុងមួយ ។ ក្រោយពេលហែកប្រអប់នោះចេញ ក៏ឃើញមានការវេចខ្ចប់ក្នុងថង់តែសញ្ញាផ្កាយប្រាំចំនួនមួយជាន់ទៀត ទើបឃើញគ្រឿងញៀនទាំងនោះ ។ នេះជាករណីជួញដូរថ្នាំញៀនមួយទៀត ដែលប្រព្រឹត្តដោយជនជាតិឡាវ ចូលមកប្រទេសខ្មែរក្នុងខេត្តស្ទឹងត្រែង ដែលជាខេត្តជាប់ព្រំដែន ។
តាមចំនួនគ្រឿងញៀន(មា៉ទឹកកក) ដែលចាប់រឹបអូសនេះ បើតាមមន្ត្រីនិយាយថា តម្លៃនៅផ្សារងងឹតក្នុងខេត្តស្ទឹងត្រែងអាចលក់បានជាង៥ម៉ឺនដុល្លារ ហើយបើយកទៅដល់ភ្នំពេញ អាចលក់បានតម្លៃជាង៨ម៉ឺនដុល្លារ ៕
ចែករំលែកព័តមាននេះ