ខេត្តបាត់ដំបង ៖ អ្នកភូមិ និងអ្នកដំណើរបានភ្ញាក់ផ្អើលចោមរោមមើលរណ្ដៅដ៏ជ្រៅមួយរូងចូលទៅក្រោមដីបាតផ្ទះ និងលុងចូលសំដៅមករកផ្លូវថ្នល់នៅជាប់នឹងរបងប៉ុស្ដិ៍រដ្ឋបាល និងសាលាសង្កាត់ស្វាយប៉ោ ក្រុងបាត់ដំបង ដែលគេសង្ស័យថា ជារណ្ដៅដែលក្រុមជនទុច្ចរិតលួចជីកស្វែងរកកំណប់មហាសាល ដែលក្រុមជនទុច្ចរិតសម្ងំលួចជីកអស់រយៈពេលជាង១ខែកន្លងមកហើយ ប៉ុន្តែបែរជាចៅសង្កាត់ និងមន្ត្រីនគរបាលប៉ុស្ដិ៍នេះមិនបានដឹងទៅវិញ ។
អ្នកភូមិនិយាយថា ពួកគេបានដឹងរឿងនេះនៅព្រឹកថ្ងៃទី២៩ កក្កដា បន្ទាប់ពីគេឃើញកន្ទេលជ័រមួយបានប៉ើងចេញពីមាត់រណ្ដៅនៅក្បែរទ្វារមុខផ្ទះដែលគេបានគ្រប ។ អ្នកភូមិបាននាំគ្នាចុះពិនិត្យមើលក្នុងរណ្ដៅនោះក៏ឃើញមានស្នាមជីកលុងយ៉ាងជ្រៅចូលទៅក្រោមបាតផ្ទះ និងលុងមករកផ្លូវលេខ៣ ហើយថែមទាំងមានវ៉ៃជន្ទល់ឈើដើម្បីទប់ដីក្នុងរណ្ដៅនោះផង ទើបមានការសង្ស័យថា រណ្ដៅនោះគឺជារណ្ដៅដែលគេជីករកកំណប់ ។ អ្នកភូមិប្រាប់ថា ម្ចាស់ផ្ទះនោះឈ្មោះរឿត និងប្រពន្ធឈ្មោះរ៉េត ប៉ុន្តែម្ចាស់ផ្ទះនោះអះអាងថា គាត់បានលក់ផ្ទះនិងដីនេះទៅឲ្យគេផ្សេងច្រើនខែកន្លងមកហើយ ។ បុរសម្នាក់ដែលរស់នៅក្បែរនោះនិយាយដែរថា តាំងពីឮថា ម្ចាស់ផ្ទះនោះបានលក់ទៅឲ្យអ្នកផ្សេង គាត់មិនដែលស្គាល់មុខម្ចាស់ផ្ទះថ្មីនោះទេ តែគាត់តែងប្រទះឃើញមនុស្សប្រុសពី៤ទៅ៥នាក់ ចេញចូលផ្ទះនោះពេលយប់បែបអាថកំបាំងបំផុត តែមិនដឹងថា ពួកគេមកពីខាងណាឡើយ ។
លុះនៅព្រឹកថ្ងៃទី២៩ កក្កដា ពេលគេប្រទះឃើញរណ្ដៅដ៏ធំហើយជ្រៅជីកលុងចូលក្នុងបាតផ្ទះ ទើបមានការភ្ញាក់ផ្អើល និងរាយការណ៍ប្រាប់ចៅសង្កាត់ និងមន្ត្រីនគរបាលប៉ុស្ដិ៍ស្វាយប៉ោ តែម្ដង ។ គាត់បញ្ជាក់ថា រណ្ដៅនោះទំនងគេជីកស្វែងរកកំណប់ ហើយគេជីកប្រហែលជាងមួយខែកន្លងមកហើយ តែប៉ុន្មានថ្ងៃនេះមិនដែលឃើញមនុស្សមួយក្រុមនោះទេ ។ តាមការពិនិត្យជាក់ស្ដែងរណ្ដៅនោះនៅជាប់នឹងរបងសាលាសង្កាត់ និងបុស្ដិ៍រដ្ឋបាលស្វាយប៉ោ ដែលទំនងគេជីកនៅក្នុងផ្ទះដោយបិតទ្វារជិត ប៉ុន្តែដោយមានភ្លៀងធ្លាក់ខ្លាំងក៏បាក់ស្រុតខាងមុខទ្វារ ទើបត្រូវគេប្រទះឃើញតែម្ដង។ រណ្ដៅនោះត្រូវគេជីកលុងជ្រៅចូលទៅបាតផ្ទះខាងក្នុង និងជីកលុងយ៉ាងឆ្ងាយមកខាងមុខផ្ទះសំដៅទៅរកផ្លូវលេខ៣ ដែលមានវ៉ៃជន្ទល់ឈើទប់ដីដើម្បីកុំឲ្យបាក់ស្រុតទៀតផង ។ ប៉ុន្តែចៅសង្កាត់ និងមន្ត្រីនគរបាលប៉ុស្ដិ៍មិនមាននណាម្នាក់បានដឹងនៅពេលគេធ្វើសកម្មភាពទេ ។ លុះនៅព្រឹកថ្ងៃទី២៩ កក្កដា ទើបដឹងដោយប្រជាពលរដ្ឋរាយការណ៍ប្រាប់ ។
អ្នកភូមិបានភ្ញាក់ផ្អើលនាំគ្នាទៅចោមរោមមើលកាន់តែខ្លាំងនៅរសៀលថ្ងៃដដែល ក្រោយពីមានការសង្ស័យថា រណ្ដៅរូងក្រោមដីនោះជារណ្ដៅជីករកកំណប់ ។ រីឯកម្លាំងនគរបាលព្រហ្មទណ្ឌផ្នែកបង្ការ-បង្ក្រាបរបស់ស្នងការដ្ឋានខេត្តក៏បានចុះទៅពិនិត្យរណ្ដៅនោះភ្លាមៗដែរ ក្រោយពីទទួលបានព័ត៌មាននេះ តែមិនឃើញមានវត្តមានអាជ្ញាធរ និងសមត្ថកិច្ចមូលដ្ឋាននៅទីនោះទេ ។ ចៅសង្កាត់ស្វាយប៉ោ លោក អ៊ុក គីម បានប្រាប់កោះសន្តិភាពបន្ទាប់ពីមានការភ្ញាក់ផ្អើលថា ជុំវិញបញ្ហានេះដំបូងម្ចាស់ផ្ទះបានស្នើសុំលោកធ្វើការជួសជុលផ្ទះ ។ ក្រោយមកបានសុំជីកដាក់លូបង្ហូរទឹក ហើយលោកបានប្រាប់ឱ្យទាក់ទងទៅខាងមន្ត្រីសាធារណការខេត្ត ព្រោះជាមន្ត្រីជំនាញ ។ ចៅសង្កាត់រូបនេះបន្តថា លោកនិងមន្ត្រីជំនាញ ក៏បានចុះពិនិត្យទីតាំងនោះដែរមុនពេលអនុញាត ។ លុះនៅព្រឹកថ្ងៃទី២៩ កក្កដា ក៏ស្រាប់តែមានការភ្ញាក់ផ្អើលថា មានការជីករកកំណប់នៅក្នុងផ្ទះខាងលើនេះ លោកក៏ចុះទៅមើល បុ៉ន្តែមិនបានចុះពិនិត្យផ្ទាល់ក្នុងរណ្ដៅនោះទេ ។
លោក គីម បញ្ជាក់ថា លោកមិនទាន់ហ៊ានវាយតម្លៃថា តើការជីករណ្ដៅរូងក្រោមដីមិនប្រក្រតីនោះ ជាការជីកស្វែរកអ្វីពិតប្រាកដនោះទេ ដោយលោកសន្យាថា ចាំហៅម្ចាស់ផ្ទះមកសួរនាំសិន ។ ជុំវិញការជីករណ្ដៅរូងចូលក្រោមផ្ទះនេះ អ្នកស្រុកជាច្រើនគ្រួសារដែលរស់នៅក្បែរនោះកំពុងមានការព្រួយបារម្ភយ៉ាងខ្លាំងអំពីសុវត្ថិភាព ដោយសារខ្លាចដើមគគីរដ៏ធំ១ដើម និងបង្គោលភ្លើងនៅក្បែរនោះរលំសង្កត់លើជាយថាហេតុ ។ ពួកគាត់និយាយថា ដើមគគីរនោះត្រូវក្រុមជនទុច្ចរិតជីករូងជ្រៅទៅដល់គល់ និងផ្ដាច់ឫសមួយចំនួន ។ រីឯបង្គោលភ្លើងនៅក្បែរនោះ ក៏ត្រូវគេជីករូងដល់ឫសដែរ ស្របពេលមានភ្លៀងធ្លាក់រាល់ថ្ងៃ និងមានខ្យល់ព្យុះញឹកញាប់ផង វាអាចដួលរលំគ្រប់ពេលវេលា ។ ប្រជាពលរដ្ឋព្រមានថា ពួកគាត់នឹងប្ដឹងម្ចាស់ផ្ទះ និងមន្ត្រីនានាដែលអនុញាតឱ្យជីកកកាយរណ្ដៅក្រោមដីគ្មានសណ្ដាប់ធ្នាប់នេះ បើសិនជាដើមគគីរ និងបង្គោលភ្លើងនៅក្បែរនោះបង្កគ្រោះថ្នាក់ដល់ពួកគាត់មែន ។
លោក ជេត វណ្ណនី ស្នងការរងខេត្តដែលបានចុះទៅពិនិត្យរណ្ដៅមិនប្រក្រតីនោះបានវាយតម្លៃថា បើតាមការពិនិត្យរណ្ដៅដែលគេជីករូងក្រោមដីបាតផ្ទះ និងរូងជ្រៅមករកថ្នល់នោះ គឺមិនមែនជាការជីកដើម្បីដាក់លូទេ បុ៉ន្តែអាចជាការជីកដើម្បីស្វែងរកអ្វីមួយ ។ លោកបញ្ជាក់ថា ជុំវិញបញ្ហានេះ លោកបានស្នើឱ្យអាជ្ញាធរមូលដ្ឋានកោះហៅម្ចាស់ផ្ទះមកសួរនាំអំពីការជីករូងក្រោមដីនេះ តើពួកគេជីកក្នុងគោលបំណងអ្វី ? លោកជេត វណ្ណនី បន្ថែមថា លោកទទួលស្គាល់ថា ប្រជាពលរដ្ឋដែលរស់នៅក្បែរនោះពិតជាកំពុងប្រឈមនឹងគ្រោះថ្នាក់ដោយសារដើមគគីរដ៏ធំ និងបង្គោលភ្លើងនៅក្បែរនោះមែន បើសិនជាមានភ្លៀង ហើយមានខ្យល់ព្យុះថែមទៀត ។ ដូច្នេះម្ចាស់ផ្ទះ និងអាជ្ញាធរដែលដឹងឮត្រូវតែទទួលខុសត្រូវលើករណីនេះ ។
នេះមិនមែនជាលើកទីមួយទេដែលក្រុមអ្នកស្វែងរកកំណប់មហាសាលបង្កការភ្ញាក់ផ្អើលដល់ប្រជាពលរដ្ឋក្នុងខេត្តបាត់ដំបង ដោយសាររឿងកំណប់ ។ កន្លងមកក្រុមអ្នកស្វែងរកកំណប់ដែលភាគច្រើនមានសមាសភាពជាកងកម្លាំងប្រដាប់អាវុធមានខ្នងបង្អែកធំៗ និងមានទាំងឧកញ៉ាមួយចំនួនផង តែងមកលួចជីករុករកកំណប់ទាំងយប់ទាំងថ្ងៃនៅក្នុងទឹកដីខេត្តបាត់ដំបង ។ ពេលខ្លះពួកគេប្រើប្រាស់គ្រឿងចក្រមករកជីកកកាយទៀតផង ដោយគ្មានខ្លាចក្រែងអាជ្ញាធរដែនដីឡើយ ។ រីឯមន្ត្រីមានអំណាចក្នុងខេត្តមួយចំនួនក៏ត្រូវគេសង្ស័យថា ជាអ្នកសមគំនិតដល់ក្រុមជនទុច្ចរិតទាំងនោះផងដែរ ។
គេនៅចាំមើលថា តើការជីករណ្ដៅរូងចូលបាតផ្ទះខាងលើនេះ ដែលម្ចាស់អះអាងប្រាប់អាជ្ញាធរថា ជាការជីកដាក់លូបង្ហូរទឹកនោះ មានការបកស្រាយបែបណាពីម្ចាស់ផ្ទះ នៅពេលអាជ្ញាធរកោះហៅមកឆ្លើយបំភ្លឺនាពេលខាងមុខនេះ ។
រីឯអាជ្ញាធរគួរតែចុះពិនិត្យឱ្យបានច្បាស់មុនពេលអនុញាតឱ្យដល់អ្នកស្នើសុំ និងគួរតែចុះតាមឃ្លាំមើលពីសកម្មភាពដោយផ្ទាល់ឱ្យដល់ទីកន្លែង ក្រោយពីអនុញាតឱ្យអ្នកស្នើសុំនោះ ចៀសវាងការសន្និដ្ឋានទាំងបិទភ្នែក ៕
ចែករំលែកព័តមាននេះ