ខេត្តត្បូងឃ្មុំ ៖ យុវជនកើតរោគសសៃប្រសាទម្នាក់ ឈ្មោះ ហ៊ីម សុខណា អាយុ២២ឆ្នាំ នៅភូមិកញ្ចែរ ឃុំកក់ ស្រុកពញាក្រែក បានចាប់ក្មួយរបស់ខ្លួនអាយុ៦ឆ្នាំ ចងទៅនឹងជញ្ជាំងលើផ្ទះឈើតាំងពីវេលាម៉ោងជាង១០ព្រឹក ថ្ងៃទី២៩ កក្កដា ២០១៤ រហូតដល់វេលាម៉ោង៨យប់ ទៅហើយនូវតែមិនទាន់ដោះលែងទៀត ។ ដោយមានកាំបិតចំនួន២ គំរាមមិនឲ្យនរណាម្នាក់ចូលមក យកក្មេងនេះទេតែត្រូវបានលោកឧត្តមសេនីយ៍ត្រី ម៉ៅ ពៅ ស្នងការនគរបាលខេត្ត ដឹកនាំកម្លាំងសមត្ថកិច្ចជាច្រើននាក់ចុះទៅរំដោះចំណាប់ខ្មាំង ពីកណ្តាប់ដៃពូវិកលចរិកនោះហើយ ។
លោកអនុសេនីយ៍ឯក អាំ សុផល អធិការស្តីទីនគរបាលស្រុកពញាក្រែក បានប្រាប់ឲ្យដឹងថានៅព្រឹកមុនពេលកើតហេតុ ក្មេងប្រុសម្នាក់ឈ្មោះ ថា ឆារ៉ាត បានជិះកង់ចេញពីផ្ទះរបស់ខ្លួន នៅភូមិបុសទីមកលេងនៅផ្ទះពូឈ្មោះ សុខណា ដោយបានអង្គុយលេងនៅខាងក្រោមផ្ទះ។ ក្នុងពេលនោះពូបានចុះពីលើផ្ទះមកចាប់បីក្មួយឡើងទៅលើផ្ទះ ចងនឹងជញ្ជាំងផ្ទះថែមទាំងមាន កាន់កាំបិតចំនួន២ក្នុងនោះវែងមួយខ្លីមួយ គំរាមមិនឲ្យនរណាចូលមកយកក្មេងនេះទេ ។ ស្របពេលដែលមានហេតុការណ៍ការភ្ញាក់ផ្អើលខាងលើនេះ រូបលោកបានដឹកនាំមន្រ្តីក្រោមឪវាទ ចុះទៅដល់ផ្ទះកើតហេតុជាបន្ទាន់មានទាំងមេបញ្ជាការអាវុធហត្ថស្រុកពញាក្រែក កម្លាំងសរុបជាង១០នាក់ ។ ក្រោយពីបានចងទៅនឹងរបាជញ្ជាំងផ្ទះមិនអស់ចិត្តក៏ស្រាយចំណង មកចងនៅសសរកណ្តាលផ្ទះទៀត រហូតដល់វេលាម៉ោង៨យប់ទៅហើយនោះសមត្ថកិច្ច នូវតែមិនទាន់រំដោះចំណាប់ខ្មាំង ចេញពីកណ្តាប់ពូនោះនូវឡើយទេ ។
លោកឧត្តមសេនីយ៍ត្រី ម៉ៅ ពៅ ស្នងការនគរបាលខេត្ត មានប្រសាសន៍ឲ្យដឹងដែរថារូបលោកបានដឹក កម្លាំងអន្តរាគមន៍ខេត្ត ហើយលោកនាយឧត្តមសេនីយ៍ នេត សាវឿន អគ្គស្នងការនគរបាលជាតិក៏បានបញ្ជូនកម្លាំងពិសេសមកពីរាជធានីភ្នំពេញ ដើម្បីចុះទៅរំដោះក្មេងប្រុសតូចនោះហើយដែរ ។
ចែករំលែកព័តមាននេះ