រាជធានីភ្នំពេញ ៖ ប៉ូលិសក្រសួងមហាផ្ទៃសហការជាមួយអង្គការនិងអាជ្ញាធរដែន និងមានការចូលរួមពីតំណាងអយ្យការអមសាលាដំបូងរាជធានីភ្នំពេញ បានចុះឆែកឆេររកវត្ថុតាងនៅក្នុងភូមិគ្រឹះមួយកន្លែងដែលសង្ស័យពាក់ព័ន្ឋនឹងការប្រើអំពើហិង្សាធ្វើទារុណកម្មលើក្មេងប្រុសម្នាក់ ។
ប្រតិបត្តិការចុះឆែកឆេរនេះ បានប្រព្រឹត្តធ្វើនៅម៉ោង៣និង៣០នាទីរសៀលថ្ងៃទី២៩ កក្កដា ២០១៤ នៅក្នុងភូមិគ្រឹះលេខ១៩ ផ្លូវលេខ២៦៥ ( សំណង់១២ ) ។
បើតាមអ្នកឆ្លើយឆ្លងព័ត៌មានកោះសន្តិភាពបានស្រង់សំដីសមត្ថកិច្ចបញ្ចាក់ឲ្យដឹងថា ការចុះឆែកឆេរដឹកនំាដោយលោកព្រះរាជអាជ្ញារង មាស ច័ន្ទពិសិដ្ឋ នាពេលនេះ បានធ្វើឡើងបន្ទាប់ពីក្មេងប្រុសម្នាក់ បានត្រូវបងស្រីរស់នៅក្នុងភូមិគ្រឹះខាងលើជាមួយគ្នា នំារត់ចេញ រួចទៅរៀបរាប់បា្រប់ម្តាយថា ម្ចាស់ផ្ទះបានធ្វើទារុណកម្មវាយដំ និងឆក់ខ្សែភ្លើងលើកុមារាឈ្មោះ ប៉ែន កា អាយុ១០ឆ្នាំ ។
សេចក្តីរាយការណ៏បានបន្តថា បន្ទាប់ពីបានទទួលព័ត៌មាននេះភ្លាម ម្តាយកុមារារងគ្រោះបានទៅបា្រប់អង្គការមួយឈ្មោះអង្គការផ្ទះយើង ឲ្យជួយអន្តរាគមន៍ដល់សមត្ថកិច្ច និងឈានទៅធ្វើការឆែកឆេររកវត្ថុតាងតែម្តង ។ ម្ចាស់ភូមិគ្រឹះ និងជាជនសង្ស័យត្រូវបានគេស្គាល់ឈ្មោះ ស៊ឹម រ៉ុង ប្រមាណ៦០ឆ្នាំ ជាអ្នកជំនួញម្នាក់ ។
យ៉ាងណាក៏ដោយកោះសន្តិភាពមិនអាចរកការសុំបំភ្លឺបានទេពីម្ចាស់ភូមិគ្រឹះ ជុំវិញការលើកឡើងខាងលើ ។ សេចក្តីរាយការណ៏បានបន្តថា មកដល់ម៉ោង៤និង៤៥នាទីរសៀលថ្ងៃទី២៩កក្កដាដដែលនេះ សមត្ថកិច្ចនៅបន្តរកភស្តុតាងនៅឡើយ ។
ព័ត៌លម្អិតនឹងមានផ្សាយជូននៅលើសារព័ត៌មានកោះសន្តិភាព ៕
ចែករំលែកព័តមាននេះ