ខេត្តកំពង់ស្ពឺ ៖ យុវជនម្នាក់ត្រូវប្រជាពលរដ្ឋ និងនគរបាលស្រុកគងពិសីឃាត់ខ្លួនបានភ្លាមៗ ខណៈដែលប៉ងរំលោភនារីគថ្លង់ម្នាក់ មិនបានសម្រេច ហើយតាមវាយនាងដល់ក្រោមផ្ទះផ្អើលប្រជាពលរដ្ឋពេញភូមិ ។ ហេតុការណ៍នេះកើតឡើងកាលពីវេលារសៀលថ្ងៃទី២៧ កក្កដា នៅភូមិថ្នល់បត់ ឃុំពេជ្រមុនី ស្រុកគងពិសី ។
តាមសម្តីរបស់មន្ត្រីនគរបាលឱ្យដឹងថា យុវជនសង្ស័យឈ្មោះ សុខ ភឿន ហៅភឿន អាយុ២៧ឆ្នាំ មុខរបរមិនពិតប្រាកដ ស្នាក់ក្នុងភូមិកើតហេតុ រីឯនារីរងគ្រោះ អាយុ១៥ឆ្នាំ ជាមនុស្សគថ្លង់ ស្នាក់នៅជាមួយជីដូនក្នុងភូមិដូចគ្នា ។
ប្រភពព័ត៌មានឱ្យដឹងថា មុនពេលកើតហេតុ នារីរងគ្រោះបានជិះកង់ម្នាក់ឯងនៅក្នុងភូមិ លុះដល់កន្លែងស្ងាត់ ក៏ជួបជនសង្ស័យស្ទាក់ចាប់ប៉ុនប៉ងរំលោភ ពេលនោះនាងបានរើបម្រាស់ រួចជិះកង់ត្រឡប់មកផ្ទះវិញធ្វើកាយវិការប្រាប់ជីដូន ។ ដោយស្តាប់មិនបានទាំងអស់គ្នាមានការងឿងឆ្ងល់ លុះមួយសន្ទុះក្រោយ ស្រាប់តែជនសង្ស័យមករកនារីរងគ្រោះដល់ផ្ទះ រួចហើយយកស្បែកជើងគប់ និងទាញដំបងដេញវាយផ្អើលពេញភូមិ ឃើញដូចនោះជីដូនក៏ចូលជួយឃាត់ ត្រូវជនសង្ស័យវាយចំមួយដំបង រួចក៏មានប្រជាពលរដ្ឋរាយការណ៍ទៅនគរបាលមូលដ្ឋាន ចុះមកឃាត់បានភ្លាមៗតែម្តង ។ ក្រោយពីឃាត់ខ្លួនជនសង្ស័យបាននិយាយថា ខ្លួនមិនបានចាប់រំលោភនាងទេ គឺដោយសារខឹងនាង(នារីរងគ្រោះ) មកចង្អុលមុខ ហើយពេលខ្លួនស្រវឹងស្រា ក៏ដេញវាយនាងនិងត្រូវនគរបាលឃាត់ខ្លួនតែម្តង ។
បច្ចុប្បន្ននារីរងគ្រោះត្រូវសាច់ញាតិបញ្ជូនទៅព្យាបាលនៅមន្ទីរពេទ្យបង្អែកខេត្ត ចំណែកជនសង្ស័យនគរបាលឃុំខ្លួនបណ្តោះអាសន្ននៅស្នងការដ្ឋាននគរបាលខេត្ត ដើម្បីរៀបចំកសាងសំណុំរឿងចាត់ការតាមនីតិវិធី ៕
ចែករំលែកព័តមាននេះ