រាជធានីភ្នំពេញ ៖ ការប្រកួតប្រដាល់ដណ្តើមខ្សែក្រវាត់ស្រាបៀរភ្នំពេញ ក្នុងប្រភេទទម្ងន់៦៣,៥គីឡូក្រាមនៅលើសង្វៀន CTN នាថ្ងៃព្រហស្បតិ៍ ទី៣១ កក្កដាខាងមុខនេះ ឈានចូលដល់សប្តាហ៍ទី៤ហើយ ។ កីឡាករវ៉ាន់ ចាន់វ៉េត មកពីក្លិបព្រះខ័នរាជនៃកងរាជអាវុធហត្ថលើផ្ទៃប្រទេស ត្រូវជួបជាមួយកីឡាករម៉ាប់ ឆៃយ៉ា មកពីក្លិបខ្លារខិនមានឫទ្ធិ និងកីឡាករនេន វណ្ណា មកពីក្លិបកងពលធំអន្តរាគមន៍លេខ៣ ព្រះវិហារ ត្រូវជួបជាមួយកីឡាករសុខ ចិន្តា មកពីក្លិបឃ្លាំងមឿងកីឡា ។
រវាងវ៉ាន់ ចាន់វ៉េត និងម៉ាប់ ឆៃយ៉ា ប្រកួតបានមួយលើកម្នាក់រួចមកហើយ បុ៉ន្តែលទ្ធផលមិនដូចគ្នា ដោយវ៉ាន់ ចាន់វ៉េត ឈ្នះទទួលបាន៣ពិន្ទុមុន ឯម៉ាប់ ឆៃយ៉ា ចាញ់ទទួលបាន១ពិន្ទុបុ៉ណ្ណោះ ។ ដោយឡែក លើកនេះម៉ាប់ ឆៃយ៉ា សង្ឃឹមរកបាន៣ពិន្ទុបន្ថែម បុ៉ន្តែបើតាមការវាយតម្លៃជាទូទៅ ក្តីសង្ឃឹមនេះគឺមានតិចតួចណាស់ ដោយសារវ៉ាន់ ចាន់វ៉េត ជាអ្នកប្រដាល់ចាស់វស្សាធ្លាប់មានបទពិសោធន៍ប្រកួតនៅលើសង្វៀនយូរឆ្នាំមកហើយ ។ ចំណែកឯ ម៉ាប់ ឆៃយ៉ា ទោះបីមានប្រវត្តិប្រកួតយូរឆ្នាំ បុ៉ន្តែមិនអាចប្រៀបផ្ទឹមជាមួយ វ៉ាន់ ចាន់វ៉េត បានឡើយ។ វ៉ាន់ ចាន់វ៉េត មានស្នៀតកែង និងជង្គង់ល្អ រីឯចលនាវាយចេញរបស់គេ ទោះបីមិនសូវរហ័សរហួន បុ៉ន្តែពេលវាយចេញម្តងៗត្រូវចំគោលដៅបានល្អច្រើន ឯចិត្តក៏សឿងថែមទៀត។ រីឯម៉ាប់ ឆៃយ៉ា មិនសូវជាមានភាពប៉ិនប្រសប់ខាងប្រើស្នៀតកែង និងជង្គង់ឡើយ គេល្អបានតែស្នៀតកណ្តាប់ដៃ និងជើងបុ៉ណ្ណោះ ។
មូលហេតុនេះហើយទើបគេហ៊ានវាយតម្លៃបានថា ម៉ាប់ ឆៃយ៉ា បើចង់យកឈ្នះ វ៉ាន់ ចាន់វ៉េត គឺមានភាគរយតិចតួចណាស់ ។ នេន វណ្ណា និងសុខ ចិន្តា អាចពិបាកក្នុងការវាយតម្លៃបន្តិច ព្រោះបើពិនិត្យទៅលើល្បិច និងបច្ចេកទេសប្រកួតនៅលើសង្វៀនវិញនោះ គឺមិនលើសគ្នាឡើយ ។ ២នាក់នេះធ្លាប់ឆ្លងកាត់ការប្រកួតបានមួយលើកម្នាក់ ដោយនេន វណ្ណា ឈ្នះ ឯសុខ ចិន្តា ចាញ់សន្លប់នៅក្នុងទឹកទី៤ បុ៉ន្តែលើកនេះគេមានជំនឿចិត្តយ៉ាងច្រើនក្នុងការស្វែងរក៣ពិន្ទុបន្ថែម ។ ចំណែក នេន វណ្ណា ក៏មានមហិច្ឆតាមិនខុសពី សុខ ចិន្តា បុ៉ន្មានដែរ បើទោះជាគេមាន៣ពិន្ទុនៅក្នុងដៃរួចទៅហើយក្តី ក៏គេនៅតែចិញ្ចឹមចិត្តចង់ឈ្នះដើម្បីទទួលបាន៣ពិន្ទុបន្ថែមទៀតដែរ ។
ប្រសិនបើគេឈ្នះលើកនេះទៀតមែន គេមានឱកាសច្រើនក្នុងការឡើងទៅប្រកួតនៅវគ្គពាក់កណ្តាលផ្តាច់ព្រ័ត្រជាបន្តទៀត ។ បុ៉ន្តែគូនេះពិបាកវាយតម្លៃទុកមុនបន្តិចហើយមានតែរង់ចាំមើលការប្រកួតជាក់ស្តែងបុ៉ណ្ណោះ ទើបអាចដឹងបាន ៕
ចែករំលែកព័តមាននេះ