រាជធានីភ្នំពេញ ៖ មកទល់ពេលនេះ សកម្មភាពថ្មីៗរបស់សហព័ន្ធកីឡាកាយវប្បកម្មកម្ពុជា ហាក់មិនមានចលនាកម្រើកឡើងសោះ ក្នុងបរិបទដែលមានអ្នកនិយមហ្វឹកហាត់ដំឡើងសាច់ដុំនៅតាមបណ្ដាក្លិបហាត់ប្រាណត្រូវគេមើលឃើញថា មានកំណើនតួលេខខ្ពស់ជាងមុន។ ស្ថានភាពបញ្ច្រាសទិសគ្នានេះធ្វើឱ្យមានការវិភាគថា កីឡាកាយវប្បកម្មដែលត្រូវគេចាប់អារម្មណ៍កំពុងរីកចម្រើនក្នុងមាគ៌ាប្រទាំងប្រទើស ។
រាជធានីភ្នំពេញ ៖ មកទល់ពេលនេះ សកម្មភាពថ្មីៗរបស់សហព័ន្ធកីឡាកាយវប្បកម្មកម្ពុជា ហាក់មិនមានចលនាកម្រើកឡើងសោះ ក្នុងបរិបទដែលមានអ្នកនិយមហ្វឹកហាត់ដំឡើងសាច់ដុំនៅតាមបណ្ដាក្លិបហាត់ប្រាណត្រូវគេមើលឃើញថា មានកំណើនតួលេខខ្ពស់ជាងមុន។ ស្ថានភាពបញ្ច្រាសទិសគ្នានេះធ្វើឱ្យមានការវិភាគថា កីឡាកាយវប្បកម្មដែលត្រូវគេចាប់អារម្មណ៍កំពុងរីកចម្រើនក្នុងមាគ៌ាប្រទាំងប្រទើស ។
យោងតាមភាពជាក់ស្ដែង ស្ទើរតែមិនមានសកម្មភាពតែម្ដងចំពោះកីឡាករល្អៗដែលធ្លាប់ទទួលបានការកោតសរសើរថា មានរាងកាយស្អាត ឬមានសាច់ដុំធំៗនៅក្នុងវិស័យកីឡាកាយវប្បកម្មនៅកម្ពុជា ។ អសកម្មភាពទាំងនេះកើតមានប្រមាណជាង២ឆ្នាំហើយ ដោយផ្ទុយពីការប្រកាសទុក បន្ទាប់ពីបានបង្កើតឱ្យចេញជាសហព័ន្ធភ្លាមៗ ។ ក្រៅពីគ្មានការរៀបចំប្រកួតឱ្យបានទៀងទាត់ សហព័ន្ធទាំងមូលត្រូវគេមើលឃើញថា មិនមានរចនាសម្ព័ន្ធទទួលខុសត្រូវច្បាស់លាស់ដែលស្ទើរតែធ្វើឱ្យសហព័ន្ធដែលលេចពន្លកត្រួយហើយរលួយទៅវិញទៀតផង ។
ប្រភពពីមន្ត្រីសហព័ន្ធបានសារភាពប្រាប់ថា ចាប់តាំងពីបាត់សកម្មភាពបំផុសបំផុលកីឡាករខ្លាំងៗ ដែលពោរពេញដោយសាច់ដុំធំៗ និងធ្លាប់មានចំណាត់ថ្នាក់ក្នុងការប្រកួតក្នុងស្រុក និងក្រៅប្រទេសផងនោះ បានចេញឆ្ងាយកាន់តែខ្លាំងពីការឃ្លាំមើលរបស់សមាគម ឬសហព័ន្ធកាយវប្បកម្ម ។ អ្នកខ្លះបានសម្រេចចិត្តបោះបង់ ឯ អ្នកខ្លះទៀតរត់ទៅធ្វើការនៅប្រទេសជិតខាងអស់ ដោយរហូតទាល់តែមានគម្រោងតម្រូវឱ្យពួកគេចេញប្រកួត ទើបតំណាងសហព័ន្ធនៅក្នុងស្រុក ឬក្រៅស្រុកទាក់ទងឱ្យពួកគេត្រឡប់មកបំប៉នសាច់ដុំ២អាទិត្យ ឬ៣អាទិត្យក្នុងការហ្វឹកហាត់ ។
យ៉ាងណាក៏ដោយ នៅតាមបណ្ដាក្លិបហាត់ប្រាណនានា គេនៅតែឃើញយុវវ័យភាគច្រើនបានបន្សាំខ្លួនក្នុងការហ្វឹកហាត់កាន់តែខ្លាំង តាមលំនាំរបស់កីឡាករកាយវប្បកម្ម បើទោះជាពួកគេមិនមានចិត្តចង់ប្រកួត ឬចង់ក្លាយខ្លួនជាកីឡាករដែលស្ថិតក្នុងមាគ៌ារបស់សហព័ន្ធក្តី ។ លោកខ្លូត រតនា អតីតជាកីឡាករដែលមានសាច់ដុំធំៗ និងជាមន្ត្រីប្រចាំសហព័ន្ធកីឡាកាយវប្បកម្មកម្ពុជាមួយរូបបញ្ជាក់ថា បើក្រឡេកមើលមួយភ្លែតវិស័យកីឡានេះពិតជារីកចម្រើននៅតាមក្លិបហាត់ប្រាណតូចធំក្នុងបរិបទដែលយុវជនភាគច្រើនចាប់ផ្ដើមស្រឡាញ់សាច់ និងរូបរាងសង្ហាដើម្បីបង្អួតគ្នាបន្ថែមពីការគិតគូរពីសុខភាព ។ មិនមែនត្រឹមតារាប៉ុណ្ណោះទេ សូម្បីតែមនុស្សសាមញ្ញ ក៏ឃើញមានការគូសវាសពាក់ព័ន្ធនឹងបញ្ហានេះគួរឱ្យកត់សម្គាល់ផងដែរ ផ្ទុយពីប៉ុន្មានឆ្នាំមុនដែលមានការយល់ថា អ្នកមានសាច់ដុំកំប៉េងកំប៉ោងបែបនេះ គឺអាក្រក់មើល ។
យ៉ាងណាក៏ដោយ លោកប្រាប់ថា អ្នកមានសាច់ដុំធំល្អ មិនមែនសុទ្ធតែអាចក្លាយខ្លួនជាកីឡាករផ្នែកកាយវប្បកម្មដែលមានសក្តានុពលបានទេ ប្រសិនបើពួកគេមិនមានរបបអាហារច្បាស់លាស់ មិនមានវិធីសាស្ត្រហ្វឹកហាត់ស្របតាមគោលការណ៍ និងមិនអាចធ្វើឱ្យសាច់ដុំដែលបានឡើងធំ មិនមានជាតិខ្លាញ់ ឬគ្មានជាតិញើស។ មន្ត្រីទទួលបន្ទុកជាច្រើនទទួលស្គាល់ថា កីឡាសាច់ដុំដែលបានបង្កើតជាសហព័ន្ធកាលពីថ្ងៃទី២០ សីហា ឆ្នាំ២០១១នេះ មិនមានដំណើរឆ្ពោះទៅមុខនោះទេ ដោយសារភាពប្រទាំងប្រទើសពាក់ព័ន្ធនឹងបញ្ហាថវិកាទ្រទ្រង់តែម្ដង ។
យោងតាមបទពិសោធន៍ កម្មវិធីប្រកួតផ្នែកកាយវប្បកម្មបូករួមទាំងការបញ្ជូនកីឡាករកម្ពុជាទៅប្រកួតនៅក្រៅប្រទេសកន្លងមក គឺជាបន្ទុកដែលខាងសហព័ន្ធជាអ្នកស្វែងរកជំនួយខ្លួនឯងទាំងស្រុង ទើបជាកត្តាយូរទៅមានភាពកម្សោយទៅៗក្នុងការរៀបចំសកម្មភាពនានា ។ លោកនៅមិនទាន់អស់សង្ឃឹមថា កីឡាកាយវប្បកម្ម នឹងមិនបះផ្ងារជើងដូចការបារម្ភទុកនោះទេ បន្ទាប់ពីឃើញមហាជនស្រឡាញ់ការហ្វឹកហាត់ដំឡើងសាច់កាន់តែច្រើនជាងមុននាពេលចុងក្រោយ ។
លោកវ៉ាត់ ចំរើន អគ្គលេខាធិការគណៈកម្មាធិការជាតិអូឡាំពិកកម្ពុជា មិនអាចសុំការបញ្ជាក់បានទេ ប៉ុន្តែមន្ត្រីទទួលបន្ទុកសុទ្ធតែទទួលស្គាល់ថា កីឡាកាយវប្បកម្មនៅកម្ពុជា ហាត់ស្ងាត់សកម្មភាព ។ យ៉ាងណាក៏ដោយ មន្ត្រីទាំងនេះនៅតែផ្ដល់លទ្ធភាពបញ្ជូនអ្នកមានសមត្ថភាពឱ្យចេញទៅប្រកួតនៅក្រៅប្រទេសមិនដែលដាច់នោះទេ ទោះបីជាការប្រកួតប្រជែងក្នុងស្រុកនៅមិនទាន់អាចកម្រើកឡើងជាទ្រង់ទ្រាយធំដូចឆ្នាំដំបូង ៕
ចែករំលែកព័តមាននេះ