រាជធានីភ្នំពេញ ៖ នៅទីស្នាក់ការកណ្តាលគណបក្សសង្គ្រោះជាតិ ស្ថិតនៅក្នុងសង្កាត់ចាក់អង្រែលើ ខណ្ឌមានជ័យ នាព្រឹកថ្ងៃទី២៩ កក្កដា ២០១៤ ប្រធាននិងអនុប្រធានគណបក្សសង្រ្គោះជាតិ លោក សម រង្ស៊ី និង លោក កឹម សុខា កំពុងធ្វើជាអធិបតីក្នុងកិច្ចប្រជុំមួយជាមួយសមាជិកអចិន្រ្តៃបក្ស ។
មិនទាន់មានសេចក្តីរាយការណ៍ណាមួយអះអាងថា កិច្ចប្រជុំនេះពិភាក្សាគ្នាលើទៅលើរបៀបវារៈអ្វីខ្លះនោះទេ ប៉ុន្តែបញ្ហាជ្រើសរើសប្រធានគណៈកម្មការជំនាញនៃរដ្ឋសភាទំាង០៥រូប ទំនងជារបៀបវារៈមួយសំខាន់ដែលអាចនឹងត្រូវធ្វើការជជែកពិភាក្សាគ្នានៅព្រឹកនេះ ។
គួរបញ្ជាក់ថា តាមកិច្ចព្រមព្រៀងកាលពីថ្ងៃទី២២កក្កដា គណបក្សសង្គ្រោះជាតិទទួលបានតំណែងប្រធានគណៈកម្មការនៃរដ្ឋសភាចំនួន៥ក្នុងចំណោម១០ ក្នុងនោះរួមមាន៖ គណៈកម្មការទី១ ( គណៈកម្មការសិទ្ឋិមនុស្សទទួលពាក្យបណ្តឹង អង្កេតនិងទំនាក់ទំនងរដ្ឋសភា ព្រឹទ្ឋសភា ) គណៈកម្មការទី៣ (គណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក ) គណៈកម្មការទី៧ (គណៈកម្មការអប់រំ យុវជន កីឡា ធម្មការនិងសាសនា វប្បធ៌មនិងទេសចរណ៍) គណៈកម្មការទី៨ (គណៈកម្មការសុខាភិបាល សង្គមកិច្ច អតីតយុទ្ឋជន យុវនីតិសម្បទា ការងារបណ្តុះបណ្តាលវិជ្ជាជីវៈនិងកិច្ចការនារី និង គណៈកម្មការទី១០ (គណៈកម្មការអង្កេត បោសសំអាតនិងប្រឆាំងអំពើពុករលួយ ) ៕
ចែករំលែកព័តមាននេះ