រាជធានីភ្នំពេញ ៖ ទើបតែរំលេចផែនការដាំកូនឈើជាង១ម៉ឺនដើមនៅភ្នំឱរ៉ាល់ កាលពីពេលថ្មីៗជាកិច្ចការជួយសង្គមគួរឱ្យចាប់អារម្មណ៍ ឥឡូវនេះតារាចម្រៀងលំដាប់ជួរមុខកញ្ញា មាស សុខសោភា បានរៀបចំកិច្ចការផ្ទាល់ខ្លួនមួយទៀត ក្នុងការចេញទៅសម្តែងនៅប្រទេសញ៉ូហ្សេឡេន ។ ការចាកចេញទៅក្រៅប្រទេសសម្តែងលើកនេះ មាស សុខសោភា ទៅច្រៀងរកប្រាក់រៃអង្គាសជួយដល់កុមារកំព្រាដោយមិនគិតពីប្រាក់កម្រៃនោះឡើយ ។ ម៉្លោះហើយទើបមជ្ឈដ្ឋានទូទៅដែលស្គាល់តារាចម្រៀងមាស សុខសោភា យល់ឃើញថា មាស សុខសោភា កាន់តាែងាកមកជួយគិតគូរឿងមនុស្សធម៌ច្រើនដល់សង្គមជាតិ ។
តារាចម្រៀងដែលឈរមុខគេក្នុងផលិតកម្មថោននាពេលសព្វថ្ងៃ កញ្ញា មាស សុខសោភា កំពុងតែធ្វើឱ្យគេឯងចាប់អារម្មណ៍ និងភ្ញាក់ផ្អើលជាបន្តបន្ទាប់នៅពេលដែលនាងមួយរយៈនេះ បានធ្វើកិច្ចការបែបមនុស្សធម៌បន្តពីមួយទៅមួយ ដើម្បីជួយសង្គមមួយផ្នែកខ្លះដែរ ។ ដ្បិតតែមុននេះ នាងរងការរិះគន់រឿងដាំកូនឈើ និងបំបួសដើមឈើក្នុងគោលបំណងការពារព្រៃឈើ ហើយបែរជាត្រូវជនមួយក្តាប់តូចលួចនិយាយរិះគន់តាមប្រព័ន្ធសង្គមហ្វេសប៊ុក ក៏មិនបានរំខានភាពតាំងចិត្តរបស់មាស សុខសោភា នោះឡើយនៅតែបន្ត ដែលនេះការពញ្ញាក់អារម្មណ៍មហាជនកាន់តែបន្ថែមឱ្យនាងបានល្បីល្បាញមួយជាន់ទៀត ។ គោលបំណងរបស់នាងកាន់តែបន្តកើតមានដោយនាងកំពុងតែយកកិច្ចការសិល្បៈ និងទេពកោសល្យដែលធ្លាប់ល្បីល្បាញចេញទៅច្រៀងនៅប្រទេសញ៉ូហ្សេឡេន ដើម្បីប្រមូលបច្ច័យជួយដល់កុមារកំព្រានៅស្រុកខ្មែរដែលកំពុងតែត្រូវការជំនួយផ្គត់ផ្គង់ជាបន្ថែមរាល់ថ្ងៃ និងមិនបានគិតពីប្រាក់ចំណេញពីការងារនោះឡើយ ពោលគឺនាងច្រៀងសម្តែងដោយមិនបានគិតពីតម្លៃការងារ ឬចង់ចំណេញនោះទេ ក្រៅពីរឿងមនុស្សធម៌ជាគោលដៅចម្បង ។
តារាចម្រៀង មាស សុខសោភា ដែលកំពុងត្រៀមខ្លួនចេញទៅបំពេញបេសកកម្មមនុស្សធម៌បានថ្លែងឱ្យអ្នកយកព័ត៌មានយើងដឹងថា «ការសម្រេចចិត្តចាកចេញទៅប្រទេសញ៉ូហ្សេឡេននាពេលនេះ ដើម្បីទៅជួយរៃអង្គាសប្រាក់ជួយដល់កុមារកំព្រានៅក្នុងប្រទេសយើង ដែលរស់នៅតាមបណ្តាអង្គការមួយចំនួន នៅតែត្រូវការមានជន្ទល់គាំទ្រពីក្រោយជានិច្ច ។ នាងបានបង្ហាញរឿងបែបមនុស្សធម៌មួយរយៈនេះ គឺមិនមែនចង់សម្ញែងគេឯងនោះទេ ពោលគឺនាងចង់យកគំនិតដែលខ្លួនចង់ធ្វើដែលជាគំនិតល្អ មានអត្ថប្រយោជន៍ជួយអ្វីបានខ្លះដល់សង្គមក្នុងនាមមនុស្សម្នាក់រស់នៅក្រោមមេឃពឹងលើធម្មជាតិ បរិស្ថាន ។ មិនមែនមកពីហេតុផលជាអ្នកចម្រៀងល្បីនោះទេ អ្នកដែលមិនមែនជាតារាសិល្បៈខ្លះ ក៏គាត់មានមនុស្សធម៌គិតគូរឿងជួយកិច្ចការសង្គមបានជាច្រើននាក់ដែរ ទើបនាងសម្រេចចិត្តធ្វើរឿងមនុស្សធម៌ឱ្យកាន់តែច្រើន» ។
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ