រាជធានីភ្នំពេញ ៖ ក្រុមសហគមន៍បុរីកីឡា និងអតីតអ្នកភូមិបឹងកក់ប្រហែល៦០នាក់ ដឹកនាំដោយអ្នកស្រី ទេព វន្នី បានលើកបដាពាក្យស្លោក និងគ្រឿងបំពងសំឡេងឈរបិទច្រកចេញចូលមុខសាលារាជធានីភ្នំពេញ លើកំណាត់មហាវិថីព្រះមុនីវង្ស បណ្តាលឱ្យកកស្ទះចរាចរណ៍ កាលពីព្រឹកថ្ងៃទី២៨ កក្កដា ដើម្បីទាមទារឱ្យអភិបាលរាជធានី បញ្ជាក់ពីគោលជំហររបស់ខ្លួនឱ្យច្បាស់នៅក្នុងដំណោះស្រាយជូនពួកគាត់ ។
រាជធានីភ្នំពេញ ៖ ក្រុមសហគមន៍បុរីកីឡា និងអតីតអ្នកភូមិបឹងកក់ប្រហែល៦០នាក់ ដឹកនាំដោយអ្នកស្រី ទេព វន្នី បានលើកបដាពាក្យស្លោក និងគ្រឿងបំពងសំឡេងឈរបិទច្រកចេញចូលមុខសាលារាជធានីភ្នំពេញ លើកំណាត់មហាវិថីព្រះមុនីវង្ស បណ្តាលឱ្យកកស្ទះចរាចរណ៍ កាលពីព្រឹកថ្ងៃទី២៨ កក្កដា ដើម្បីទាមទារឱ្យអភិបាលរាជធានី បញ្ជាក់ពីគោលជំហររបស់ខ្លួនឱ្យច្បាស់នៅក្នុងដំណោះស្រាយជូនពួកគាត់ ។
ការតវ៉ាពីទំនាស់រឿងដីធ្លីនេះ បណ្តាលឱ្យស្ត្រីមកពីសហគមន៍បុរីកីឡា២នាក់ដួលសន្លប់នៅក្នុងការប៉ះទង្គិចគ្នាជាមួយសមត្ថកិច្ចនៅមុខសាលារាជធានីភ្នំពេញផងដែរ ។ ស្ត្រីម្នាក់ដែលមកពីសហគមន៍បុរីកីឡាបានឱ្យដឹងថា បងប្អូនដែលមកពីសហគមន៍បុរីកីឡានាព្រឹកថ្ងៃទី២៨ កក្កដា គឺដើម្បីសុំឱ្យលោកអភិបាលរាជធានីភ្នំពេញ ពន្លឿនការដោះស្រាយលំនៅឋានជូនពួកគាត់ឱ្យបានឆាប់រហ័ស ព្រោះរដូវវស្សាចូលមកដល់ហើយ មិនគួរចេះតែពន្យារពេលពីមួយឆ្នាំទៅមួយឆ្នាំយា៉ងដូច្នេះឡើយ ។
នៅព្រឹកនោះដែរ ពួកគាត់និយាយប្រាប់អ្នកកាសែតថា ការទាមទាររកដំណោះស្រាយដោយអហិង្សា បែរជាសមត្ថកិច្ចប្រើហិង្សាយកដំបងឆក់មកប្រើលើប្រជាពលរដ្ឋបណ្តាលឱ្យដួលសន្លប់២នាក់ ក្នុងនោះរួមមានអ្នកស្រី ប្រាក់ សុខ និងអ្នកស្រី ហែម ស្រី ។ ដោយឡែក អតីតអ្នកភូមិបឹងកក់ដែលចូលរួមបាននិយាយថា ជាច្រើនលើកមកហើយដែលពួកគាត់មកសាលារាជធានីភ្នំពេញ សុំឱ្យលោកអភិបាលរាជធានីជួយដោះស្រាយប្រាក់គោលនយោបាយក្នុងមួយគ្រួសារ២មុឺនដុល្លារសហរដ្ឋអាមេរិក ព្រោះបច្ចុប្បន្ននេះជួបការលំបាកខ្លាំងណាស់ក្នុងជីវភាពរស់នៅ ឯបញ្ហាលំនៅឋាន សាលារាជធានីបានសន្យាតែលើបបូរមាត់ ពេលមកតវា៉ម្ដង គឺសន្យាខ្យល់ ។
លោកអភិបាលមិនព្រមចេញមកជួបទេ សន្យារហូត ។ ចំណែកប្រជាពលរដ្ឋតំបន់បឹងកក់ចំនួន៤០គ្រួសារបានលើកឡើងថា ការតវា៉របស់ពួកគាត់នៅសាលារាជធានីភ្នំពេញ នាព្រឹកថ្ងៃទី២៨ កក្កដានេះ មិនមែនជាលើកទី១ទេ ហើយមកលើកនេះគឺដើម្បីឱ្យលោកអភិបាលរាជធានី ដោះស្រាយតាមសំណូមពររួមមាន ៖
១-ផ្តល់ប្លង់កម្មសិទ្ធិជូនពលរដ្ឋបឹងកក់ចំនួន៤០គ្រួសារ ។
២-បោះព្រំដី១២,៤៤ហិកតាឱ្យបានច្បាស់លាស់ ដាច់ពីដីក្រុមហុ៊នសូ៊កាគូអុីន ។
៣-បញ្ឈប់ការសាងសង់បន្ទាយប៉េអឹមជាបន្ទាន់ លើដីនៅតំបន់បឹងកក់ដែលកំពុងមានជម្លោះ ។
ក្រុមអ្នកតវ៉ារឿងដីធ្លីសហគមន៍បុរីកីឡាបានលើកបញ្ជាក់ថា សហគមន៍បុរីកីឡាចង់បានការអន្តរាគមន៍ពីអភិបាលរាជធានីភ្នំពេញដោយទាមទារឱ្យមានការស៊ើបអង្កេត លើការដែលក្រុមហ៊ុនផាន អីុមិច បណ្ដេញពួកគាត់ចេញ បែរជាគ្មានដំណោះស្រាយទៅវិញ ហើយចេះតែពន្យារពីមួយឆ្នាំទៅមួយឆ្នាំ ដែលពួកគាត់មិនអាចរង់ចាំតទៅទៀតបាន ។
មន្ត្រីនគរបាលខណ្ឌដូនពេញដែលមានភារកិច្ចរៀបចំសណ្តាប់ធ្នាប់និយាយថា ការប៉ះទង្គិចគ្នានៅមុខសាលារាជធានីភ្នំពេញនេះ ផ្តើមចេញពីក្រុមអ្នកតវា៉ដែលដឹកនាំដោយអ្នកស្រី ទេព វន្នី អ្នកស្រី យ៉ោម បុប្ផា កញ្ញា សុង ស្រីលាភ ដែលជាសកម្មជនដីធ្លីនាំគ្នាឈរបិទទ្វារច្រកចេញចូលមុខសាលារាជធានី និងធ្វើឱ្យស្ទះផ្លូវ ។ ពេលនោះកម្លាំងសមត្ថកិច្ចសំណូមពរឱ្យពួកគាត់ឈរនៅម្ខាងផ្លូវទល់មុខសាលារាជធានី បុ៉ន្តែពួកគាត់មិនព្រម ទើបបង្ខំចិត្តរុញច្រានហើយក៏ប៉ះគ្នាដោយសាររុញទៅរុញមកបុ៉ណ្ណោះ មិនមានប្រើដំបងឆក់នោះទេ ។ ឯការចោទថាសមត្ថកិច្ចប្រើដំបងឆក់នោះ គ្រាន់តែជាការចោទប្រកាន់មកលើសមត្ថកិច្ច ដោយគ្មានភស្ដុតាង ។
ដោយឡែក នាព្រឹកថ្ងៃដដែលនោះដែរ ប្រជាពលរដ្ឋមកពីភូមិព្រៃទា សង្កាត់ចោមចៅ ខណ្ឌពោធិ៍សែនជ័យ ប្រមាណជា៥០នាក់ដែលមានកាន់បដាពាក្យស្លោក និងរូបសម្តេចកិត្ដិព្រឹទ្ធបណ្ឌិត ប៊ុន រា៉នី ហុ៊ន សែន បាននាំគ្នាឈរម្ខាងផ្លូវមុខសាលារាជធានីភ្នំពេញ ដាច់ចេញពីក្រុមអ្នកតវា៉បឹងកក់និងបុរីកីឡា កុំឱ្យច្រឡំគ្នា ដើម្បីសុំឱ្យលោកអភិបាលរាជធានីភ្នំពេញ ជួយអន្តរាគមន៍ដោះស្រាយដីដែលមានសេចក្តីសម្រេចពីសម្តេចតេជោ ហ៊ុន សែន និងសេចក្តីសម្រេចរបស់ទីស្តីការគណៈរដ្ឋមន្ត្រី លេខ៦៥០ សជណ ចុះថ្ងៃទី២៥ ខែមេសា ឆ្នាំ២០០៦ ឱ្យអង្គភាពការពារអាកាសវរសេនាតូចលេខ៩១ កងទ័ពជើងគោក ជូនប្រជាពលរដ្ឋចំនួន៣៥គ្រួសារនៅភូមិព្រៃទា សង្កាត់ចោមចៅ ខណ្ឌពោធិ៍សែនជ័យ ក្នុងមួយគ្រួសារទំហំ០,២៥ហិកតា ។
ប្រជាពលរដ្ឋដែលរស់នៅភូមិព្រៃទា បានបញ្ជាក់ថា បើទោះបីជាមានសេចក្តីសម្រេចពីប្រមុខរាជរដ្ឋាភិបាល ទីស្តីការគណៈរដ្ឋមន្ត្រី និងក្រសួងការពារជាតិក៏ដោយ ក៏រហូតមកដល់ពេលនេះ ប្រជាពលរដ្ឋចំនួន៣៥គ្រួសារដែលរងគ្រោះមិនទាន់ត្រូវបានការដោះស្រាយពីអង្គភាពការពារអាកាសវរសេនាតូចលេខ៩១ទេ ទើបនាំគ្នាមកសុំកិច្ចអន្តរាគមន៍ពីលោកអភិបាលរាជធានីភ្នំពេញដែលជាអាណាព្យាបាល ។
មន្ត្រីសាលាខណ្ឌដូនពេញបានឱ្យដឹងថា សាលារាជធានីភ្នំពេញ បានជូនដំណឹងទៅប្រជាពលរដ្ឋដែលមកតវា៉នៅមុខសាលារាជធានីនោះថា នឹងអនុញ្ញាតឱ្យចូលជួបនៅសប្តាហ៍ក្រោយនិងសុំឱ្យរំសាយនៅវេលាមោ៉ង១១និង៤០នាទីនាព្រឹកថ្ងៃដដែល ទើបឃើញក្រុមអ្នកតវា៉នាំគ្នារំសាយចេញក្រោមការឃ្លាំមើលពីកម្លាំងសមត្ថកិច្ច ៕
ចែករំលែកព័តមាននេះ