រាជធានីភ្នំពេញ ៖ ការតាមប្រមាញ់ពីកម្លាំងសមត្ថកិច្ចកងរាជអាវុធហត្ថរាជធានី សហការជាមួយកងរាជអាវុធហត្ថលើផ្ទៃប្រទេស កាលពីវេលាម៉ោង១១និង១០នាទីព្រឹកថ្ងៃទី២៨ កក្កដា បានឃាត់ខ្លួនម្ចាស់គ្រាប់បែកដែលយកទៅធ្វើជាកាដូជូនថៅកែភោជនីយដ្ឋានែ្រ ផម និងគំរាមទារប្រាក់ចំនួន៥.០០០ដុល្លារនោះ ។ មុននេះក៏មានការចាប់ខ្លួនដែរជាអតីតមេការម្នាក់ បុ៉ន្តែការឃាត់ខ្លួននេះ គ្រាន់តែជាការសង្ស័យបុ៉ណ្ណោះ និងរកឃើញថា មិនមានការពាក់ព័ន្ធទេ ក៏បានដោះលែងឱ្យមានសេរីភាពវិញ ។
ជនសង្ស័យដែលចាប់ខ្លួនលើកនេះ គឺពិតជាម្ចាស់គ្រាប់បែកមែនឈ្មោះ ភិន សុភាព ភេទប្រុស អាយុ២២ឆ្នាំ ជានិស្សិតផ្នែកថែទាំវេជ្ជសាស្ត្រ និងជាអតីតសន្តិសុខភោជនីយដ្ឋានែ្រ ផម មានស្រុកកំណើតនៅភូមិលាក់ជា ឃុំព្រែកក្រឹស ស្រុកកំពង់ត្រាច ខេត្តកំពត ។ គួរបញ្ជាក់ថា កាលពីព្រឹកថ្ងៃទី២៦ កក្កដា មានការភ្ញាក់ផ្អើលមួយនៅភោជនីយដ្ឋានែ្រ ផមដែលមានទីតាំងស្ថិតនៅបណ្តោយផ្លូវលេខ៣១៥ សង្កាត់បឹងកក់ទី២ ខណ្ឌទួលគោក ខណៈមានជនសង្ស័យម្នាក់ជិះម៉ូតូ១គ្រឿងយកកាដូ១កញ្ចប់ទៅឱ្យសន្តិសុខយាមនៅទីនោះ ដែលកាដូត្រូវបានអ្នកនាំមកប្រាប់ថា គេផ្ញើឱ្យថៅកែ ។ ពេលបើកមើលទៅឃើញប្រអប់ទូរស័ព្ទ លុះបើកបន្តទៀត ស្រាប់តែឃើញគ្រាប់បែកក្រឡាទៀប១គ្រាប់ធ្វើឱ្យមានការភ័យស្លន់ស្លោគ្រប់គ្នា។
ក្រោយពីមានការភ្ញាក់ផ្អើលដោយសារសន្តិសុខបើកកញ្ចប់កាដូឃើញគ្រាប់បែក ស្រាប់តែមិនបានបុ៉ន្មានម៉ោងផង ក៏មានទូរស័ព្ទគំរាមទារប្រាក់ពីថៅកែហាងចំនួន៥.០០០ដុល្លារអាមេរិក ។ បន្ទាប់ពីកើតមានករណីកាដូគ្រាប់បែក និងអំពើគំរាមទារប្រាក់នេះមក លោកឧត្តមសេនីយ៍ទោ រ័ត្ន ស៊្រាង មេបញ្ជាការរងកងរាជអាវុធហត្ថលើផ្ទៃប្រទេស និងជាមេបញ្ជាកងរាជអាវុធហត្ថរាជធានី បានដាក់បទបញ្ជាដល់ការិយាល័យជំនាញប្រឆាំងបទល្មើសព្រហ្មទណ្ឌ ឱ្យចុះស្រាវជ្រាវ និងស្វែងរកចាប់ខ្លួនឧក្រិដ្ឋជនជាម្ចាស់គ្រាប់បែកឱ្យខាងតែបាន ។ នៅថ្ងៃទី២៧ កក្កដា កម្លាំងជំនាញដឹកនាំដោយលោកវរសេនីយ៍ទោ ម៉ាំង សុខលុច ប្រធានការិយាល័យស្រាវជ្រាវបទល្មើសព្រហ្មទណ្ឌនៃទីបញ្ជាការកងរាជអាវុធហត្ថរាជធានី បានឃាត់ខ្លួនយុវជនម្នាក់ដែលជាអតីតមេការនៅភោជនីយដ្ឋានែ្រ ផមនោះយកទៅសាកសួរ ។
ក្រោយពីសាកសួរ លោកម៉ាំង សុខលុច បានអនុញ្ញាតឱ្យវិលទៅវិញ ព្រោះមិនមានពាក់ព័ន្ធបទល្មើសដូចខាងលើនេះទេ ។ បន្ទាប់ពីការស្រាវជ្រាវយ៉ាងយកចិត្តទុកដាក់ សមត្ថកិច្ចមានពន្លឺក្នុងការស្វែងរកជនជាម្ចាស់កាដូគ្រាប់បែក រហូតដល់វេលាម៉ោង១១និង១០នាទីព្រឹកថ្ងៃទី២៨ កក្កដា ទើបឈានទៅឃាត់ខ្លួនឈ្មោះ ភិន សុភាព ។ នៅពេលឃាត់ខ្លួនជនសង្ស័យរូបនេះបានសារភាពថា ខ្លួនពិតជាបានរៀបចំគម្រោងធ្វើសកម្មភាពដាក់គ្រាប់បែកគំរាមទារប្រាក់ពីថៅកែហាងនោះមែន ។ បន្ទាប់ពីមានចម្លើយសារភាពរបស់ឈ្មោះ ភិន សុភាព សមត្ថកិច្ចកងរាជអាវុធហត្ថរាជធានី បន្តទៅឃាត់ខ្លួនបក្សពួកម្នាក់ទៀត ដែលកំពុងសិក្សានៅសាកលវិទ្យាល័យឯកជនមួយក្នុងខណ្ឌសែនសុខ នារសៀលថ្ងៃដដែលនោះ និងបន្តស្រាវជ្រាវចាប់ខ្លួនគូកនទៀត ។ បុ៉ន្តែទោះជាយ៉ាងណា ជនសង្ស័យដែលត្រូវឃាត់ខ្លួនបានសារភាពថាជារឿងគំនុំ ព្រោះថៅកែហាងនេះបានបណ្តេញពួកគេមិនឱ្យធ្វើការដោយគ្មានមូលហេតុ ។
គួរកត់សម្គាល់ថា គ្រាប់បែកដៃចាស់១គ្រាប់ដែលគេយកវាមកប្រើជាមធ្យោបាយគំរាមទារប្រាក់នោះ គឺរើសមកពីស្រុកកំណើត ហើយមិនមានគីបគ្រប់គ្រាន់សម្រាប់ធ្វើឱ្យវាផ្ទុះនោះទេ។ គ្រាប់បែកដៃនេះ គេយកវាពីគំនរអេតចាយ វាគ្រាន់តែជាសម្បកបុ៉ណ្ណោះ ។ សរុបមកវិញ ជនសង្ស័យក្នុងការធ្វើកាដូនៅភោជនីយដ្ឋានែ្រ ផម គំរាមថៅកែហាងទារប្រាក់ចំនួន៥.០០០ដុល្លារតាមរយៈទូរស័ព្ទដៃនោះ កងរាជអាវុធហត្ថរាជធានីឃាត់ខ្លួនបានម្នាក់ហើយគិតមកដល់ល្ងាចថ្ងៃទី២៨ កក្កដា ៕
ចែករំលែកព័តមាននេះ