ខេត្តកំពង់ចាម ៖ កម្មករ-កម្មការិនីរោងចក្រស្បែកជើង«លីកាតុង» ចំនួនជាង១.០០០នាក់ បាននាំគ្នាធ្វើកូដកម្ម និងដុតសម្បកកង់ម៉ូតូ ឆេះផ្សែងហុយទ្រលោមទៅលើអាកាស ដើម្បីទាមទារលក្ខខណ្ឌការងារចំនួន៨ចំណុច ។ បាតុភាពនេះ កើតឡើងកាលពីវេលាម៉ោង៧ព្រឹក ថ្ងៃទី២៨ កក្កដា នៅមុខរោងចក្រខាងលើ ស្ថិតក្នុងភូមិរវាង ឃុំខ្នុរដំបង ស្រុកជើងព្រៃ ហើយសមត្ថកិច្ចគ្រប់លំដាប់ថ្នាក់ ក៏បានចុះទៅអន្តរាគមន៍ដល់ទីនោះការងារបង្ការក្រែងមានអំពើហិង្សាណាមួយ កើតឡើងជាយថាហេតុ ។
តាមលោក ប្រាក់ សុខធឿន អធិការរងនគរបាលស្រុកជើងព្រៃ បានឱ្យដឹងថា ចំពោះសកម្មភាពនៃការទាមទាររបស់កម្មករ-កម្មការិនីនេះ គេសង្កេតឃើញថាបានធ្វើឡើងជាបន្តបន្ទាប់ចំនួន៦ថ្ងៃមកហើយ ហើយមកដល់ព្រឹកថ្ងៃទី២៨ កក្កដា ដោយមិនមានដំណោះស្រាយពីថៅកែរោងចក្រ ក៏នាំគ្នាដុតសម្បកកង់ម៉ូតូឆេះហុយទ្រលោមតែម្តង ។ ក្នុងពេលមានហេតុការណ៍នេះ កើតឡើង លោកវរសេនីយ៍ទោ ហេង វុទ្ធី អធិការនគរបាលស្រុកជើងព្រៃ បានដឹកនាំកម្លាំងសមត្ថកិច្ចក្រោមឱវាទជាច្រើនាក់ ចុះទៅកាន់ទីនោះ ដើម្បីការពារ បង្ការក្រែងមានហិង្សាណាមួយកើតឡើង ។
ក្រុមកម្មករដែលមានចំនួនជាង១ពាន់នាក់ បាននាំគ្នាដាក់ធុងបាស់រាំលេងនៅបរិវេណខាងមុខរោងចក្រ បន្ទាប់មកបានដុតសម្បកកង់ម៉ូតូ ចាប់តាំងពីម៉ោង៧ព្រឹក រហូតដល់ម៉ោង១១ព្រឹក និងនៅតែនាំគ្នារាំបន្តទៀត ។ ជាមួយគ្នានេះ ថៅកែរោងចក្រ និងមន្ត្រីមន្ទីរការងារខេត្ត គេឃើញមកប្រជុំនៅសាលាស្រុកជើងព្រៃ ដើម្បីដោះស្រាយពីលក្ខខណ្ឌទាមទារទាំង៨ចំណុចនោះ ។ លោក សួស សំនៀង ប្រធានសហជីពសំឡេងយុវជនខ្មែរ បានឱ្យដឹងថា កម្មករ-កម្មការិនី បានទាមទារលក្ខខណ្ឌចំនួន៨ចំណុច ក្នុងនោះមាន ៖
១-ស្នើសុំប្រាក់ថ្លៃបាយថ្ងៃត្រង់ចំនួន៤.០០០រៀល ។
២-ស្នើសុំក្រុមហ៊ុនយកប្រាក់តួនាទីប្រធានបូក និងគណនាថែមម៉ោង ។
៣-ស្នើសុំឱ្យប្រធានក្រុមដែលស្នាក់នៅក្នុងក្រុមហ៊ុនហូបបាយកុំឱ្យកាត់លុយ ។
៤-លុយធ្វើដំណើរចំនួន១៥ដុល្លារ ។
៥-លុយព្រីម១៥ដុល្លារ ។
៦-ពេលថែមម៉ោងល្ងាច សុំ១ម៉ោងថ្លៃបាយ ចំនួន២.០០០រៀល ។
៧-អ្នកបើកបររថយន្តមានសិទ្ធិធ្វើជាកម្មករក្នុងរោងចក្រដែរ ។
៨-ផ្តល់ប្រាក់រង្វាន់ទៀងទាត់ដល់អ្នកបើកបររថយន្តដឹកកម្មករ ។
លោក ឆាយ វ៉ាន់ស៊ី អភិបាលស្រុកជើងព្រៃ មានប្រសាសន៍ថា ចំពោះការទាមទារនេះ តំណាងកម្មករ និងខាងនិយោជក កំពុងតែសម្របសម្រួលដោះស្រាយនៅសាលាស្រុកជើងព្រៃ រហូតដល់រសៀលថ្ងៃដដែល តែលទ្ធផលមិនទាន់ដឹងជាយ៉ាងណានោះទេ ៕
ចែករំលែកព័តមាននេះ