រាជធានីភ្នំពេញ ៖ រោងចក្រកាត់ដេរយីហោ ឆាង ស៊ីង ត្រូវបានអគ្គិភ័យលេបត្របាក់អស់ទាំងស្រុងតែម្តង និងបណ្តាលឱ្យបុរសជនជាតិចិនម្នាក់ ត្រូវឆេះខ្លោចស្លាប់នៅក្នុងអណ្តាតភ្លើង និងម្នាក់របួសធ្ងន់ ២នាក់របួសស្រាលដោយការរលាកភ្លើង ។ មិនទាន់មានការអះអាងណាមួយ ឱ្យដឹងពីមូលហេតុនៃការបង្កជាអគ្គិភ័យនោះនៅឡើយទេ ប៉ុន្តែជំហានដំបូងត្រូវបានសមត្ថកិច្ចសង្ស័យថា អាចបណ្តាលមកពីទុស្សេចរន្តអគ្គិសនី ហើយការខូចខាតនៅក្នុងគ្រោះអគ្គិភ័យខាងលើនោះ តាមការអះអាងក្រៅផ្លូវការថាមានប្រមាណរាប់លានដុល្លារ ។
គ្រោះមហន្តរាយនេះបានកើតឡើង កាលពីវេលាម៉ោងប្រមាណ៣និង២០នាទីទៀបភ្លឺ ថ្ងៃទី២៨ កក្កដា ដែលរោងចក្រខាងលើមានទីតាំង ស្ថិតនៅក្នុងភូមិទួលពង្រ សង្កាត់ចោមចៅ ខណ្ឌពោធិ៍សែនជ័យ ។ ជនរងគ្រោះនៅក្នុងអណ្តាតភ្លើងនោះមានចំនួន៤នាក់ ជាជនជាតិចិន ក្នុងនោះបុរសម្នាក់ដែលស្លាប់ឈ្មោះ យា៉ង ស៊ីស៊ុង អាយុ៤២ឆ្នាំ ជាប្រធានក្រុមផ្នែកត្រួតពិនិត្យ និងបោកអ៊ុត ។ ដោយឡែកបុរសជនជាតិចិន៣នាក់ទៀត ដែលរងរបួសធ្ងន់ម្នាក់ និងស្រាល២នាក់ ត្រូវបានបញ្ជូនទៅកាន់មន្ទីរពេទ្យដើម្បីសង្គ្រោះ ព្រោះពួកគេម្នាក់ៗសុទ្ធតែត្រូវភ្លើងឆេះរលាកខ្លួនប្រាណ និងដៃជើងគ្រប់ៗគ្នាតែម្តង ។
មន្ត្រីនគរបាលខណ្ឌពោធិ៍សែនជ័យ ឱ្យដឹងថា រោងចក្រដែលត្រូវភ្លើងឆេះនេះមានទំហំជាង១០០ម៉ែត្រគុណនឹងជាង៥០ម៉ែត្រ រួមជាមួយសម្ភារសង្វាក់ផលិតកម្មទាំងអស់នៅក្នុងនោះផង បានក្លាយទៅជាចំណីព្រះអគ្គីដែលឆេះយា៉ងខ្លាំងព្រោះនៅក្នុងអគាររោងចក្រនោះពោរពេញទៅដោយរបស់ងាយនឹងឆេះ ដូចជាក្រណាត់ ជ័រកាងព្យួរខោអាវ ក្រដាសកាតុងជាដើម ។ ស្ត្រីម្នាក់ដែលសុំមិនឱ្យបញ្ចេញឈ្មោះនិយាយថា ភ្លើងបានចាប់ផ្តើមឆេះ តាំងពីវេលាម៉ោង៣និង២០នាទីមកម៉្លេះ ដែលនៅពេលនោះគេបានឃើញអណ្តាតភ្លើងក្រហមឆ្អៅពីចម្ងាយ ប៉ុន្តែមិនមាននរណាចាប់អារម្មណ៍ថា រោងចក្រនោះត្រូវភ្លើងឆេះឡើយ ដោយនឹកស្មានថាគេដុតសំរាម ព្រោះកន្លងមកក៏ធ្លាប់មានគេដុតសំរាមចេញអណ្តាតភ្លើងសន្ធោសន្ធៅបែបនេះដែរ ។
លុះរយៈពេល១ម៉ោងក្រោយមក គឺនៅវេលាម៉ោងជាង៤ទៀបភ្លឺ នៅពេលដែលអណ្តាតភ្លើងកាន់តែមានសភាពខ្លាំងឡើងៗ ទើបមានការភ្ញាក់ផ្អើល ដែលពេលនោះភ្លើងបានឆេះយា៉ងពេញបន្ទុកទៅហើយ ក្នុងរោងចក្រទាំងមូលត្រូវគ្របដណ្តប់ទៅដោយអណ្តាតភ្លើង និងផ្សែងខ្មៅ ខ្មួល ។
មន្ត្រីនគរបាលមូលដ្ឋាន បានឱ្យដឹងថា សមត្ថកិច្ចបានទទួលព័ត៌មានពីអគ្គិភ័យនេះ នៅវេលាម៉ោង៤និង៤៥នាទីទៀបភ្លឺថ្ងៃដដែលនោះ ដែលព័ត៌មាននោះហាក់មានការយឺតយ៉ាវបន្តិច។ ប៉ុន្តែទោះជាបែបនេះក្តី ការអន្តរាគមន៍បានធ្វើឡើងភ្លាមៗតែក្នុងរយៈពេល១០នាទីប៉ុណ្ណោះ រថយន្តពន្លត់អគ្គិភ័យបានទៅដល់ទីនោះជាបន្តបន្ទាប់ ។ រថយន្តពន្លត់អគ្គិភ័យដែលចេញពន្លត់ភ្លើងនាពេលនោះ មានចំនួន២៥គ្រឿង ដែលមកពីស្នងការដ្ឋាននគរបាលរាជធានីភ្នំពេញ អង្គភាព៧១១នៃកងពលតូចលេខ៧០ និងកងរាជអាវុធហត្ថផងដែរ ដែលក្នុងរថយន្តមួយគ្រឿងៗប្រើប្រាស់ទឹកចាប់ពី១៥ស៊ីទែនឡើងទៅ ហើយរហូតដល់វេលាល្ងាចថ្ងៃដដែលនោះភ្លើងនៅមិនទាន់រលត់នៅឡើយ គ្រាន់តែមិនបានឆេះរាលដាលដល់កន្លែងផ្សេងៗទៀត ។
អគាររោងចក្រកាត់ដេរដែលឆេះនេះ សាងសង់ឡើងពីថ្មគ្រោងដំបូលធ្វើពីដែក និងប្រក់ដំបូលស័ង្កសី ត្រូវភ្លើងឆេះបណ្តាលឱ្យបាក់ធ្លាក់មកដីទាំងស្រុងតែម្តង ។ រីឯជញ្ជាំងថ្មព័ទ្ធជុំវិញបានប្រេះស្ទើរតែបាក់រលំដែរ ។ នៅពេលកើតហេតុភ្លាមៗនោះ គេមិនបានដឹងថា មានមនុស្សស្លាប់ទេ ប៉ុន្តែបានដឹងថាមានអ្នករងរបួសធ្ងន់ និងស្រាលដោយការរលាកភ្លើង ព្រោះពួកគេរត់ចេញពីអណ្តាតភ្លើងដែលកំពុងឆាបឆេះ ។ លុះក្រោយពេលប្រតិបត្តិការពន្លត់ភ្លើងរហូតដល់វេលាម៉ោង៩និង១០នាទីព្រឹក ទើបឃើញមានអ្នកស្លាប់ម្នាក់ដែលត្រូវភ្លើងឆេះរួញក្រញង់ និងដេកស្លាប់ផ្កាប់មុខនៅក្នុងបន្ទប់ដេកជាន់ឡៅតឿក្បែរបន្ទប់ទឹកមួយកន្លែងជ្រុងខាងត្បូង នៃអគាររោងចក្រកាត់ដេរនោះ ។ បន្ទាប់មកគេបានសែងចុះពីលើឡៅតឿនោះរួចដាក់ក្នុងរថយន្តពេទ្យ ដឹកយកទៅកាន់វត្តស្ទឹងមានជ័យតម្កល់ទុកនៅទីនោះ ហើយក៏មានកម្លាំងនគរបាលបច្ចេកទេសនៃស្នងការដ្ឋាននគរបាលរាជធានីភ្នំពេញ ចុះទៅធ្វើការពិនិត្យកោសល្យវិច័យផងដែរ ។
តំណាងរោងចក្រកាត់ដេរបានប្រាប់ថា កម្មករ-កម្មការិនីដែលបម្រើការងារនៅក្នុងរោងចក្រកាត់ដេរនោះមានចំនួន៨៥០នាក់ ពួកគេមិនបានធ្វើការនៅពេលយប់ទេ ។ ពួកគេធ្វើការតែនៅពេលថ្ងៃ ហើយពេលយប់មានតែបុគ្គលិកជនជាតិចិនប៉ុន្មាននាក់សម្រាកនៅទីនោះ ។ តំណាងរូបនោះមិនបានអះអាងឱ្យប្រាកដប្រជាថា ការខាតបង់ជាប្រាក់នៅក្នុងហេតុការណ៍គ្រោះអគ្គិភ័យនោះ មានចំនួនប៉ុន្មាននៅឡើយទេ ដោយគ្រាន់តែនិយាយថា មានរាប់លានដុល្លារ ព្រោះទាំងវត្ថុធាតុដើម ផលិតផលសម្រេច រួមនឹងមា៉ស៊ីនសង្វាក់ផលិតកម្មនៅក្នុងនោះទាំងអស់ត្រូវភ្លើងឆេះគ្មានសល់ ។ តំណាងរោងចក្របានសំណូមពរដល់សមត្ថកិច្ចគ្រប់លំដាប់ថ្នាក់ ជួយធ្វើការស្រាវជ្រាវរកមូលហេតុនៃការឆេះនេះផង ដើម្បីចង់ដឹងថា តើបណ្តាលមកពីអ្វីពិតប្រាកដ ជាពិសេសជួយការពារទីតាំងទាំងមូលដើម្បីកុំឱ្យជនឆ្លៀតឱកាសចូលទៅអុកឡុករើកកាយ ។
ចំណែកឯកម្មករ-កម្មការិនីរោងចក្រ ក៏បានចូលរួមសម្តែងការសោកស្តាយជាមួយថៅកែរោងចក្រយ៉ាងខ្លាំង ប៉ុន្តែទន្ទឹមនឹងនេះដែរ ពួកគេក៏បានសម្តែងការព្រួយបារម្ភយា៉ងខ្លាំងផងដែរ ចំពោះបញ្ហាខាងលើនោះ ដោយពួកគេបាននិយាយថា នៅសល់តែរយៈពេលជាង១០ថ្ងៃទៀតប៉ុណ្ណោះ ពួកគេនឹងត្រូវបានទទួលនូវប្រាក់ឈ្នួល ស្រាប់តែពេលនេះមានរឿងអកុសលបែបនេះទៅវិញ ។ ប៉ុន្តែទោះបីជាបែបណា ពួកគេសង្ឃឹមថា ថៅកែនឹងមានលទ្ធភាពសម្រាប់បើកប្រាក់ឈ្នួលឱ្យពួកគេ ដោយគ្មានបញ្ហាអ្វីកើតឡើងនៅពេលក្រោយឡើយ ។ ទាក់ទិនទៅនឹងហេតុការណ៍នោះ នៅព្រឹកថ្ងៃទី២៨ កក្កដា ក៏មានកម្មករ-កម្មការិនីរោងចក្រកាត់ដេរមួយទៀត យីហោ ឌូហឹស ដែលមានទីតាំងជិតគ្នានោះដែរ ដួលសន្លប់ជិត១០នាក់ ។
មូលហេតុបណ្តាលមកពីផ្សែងដែលឆេះរោងចក្រនោះបានហុយចូលទៅក្នុងរោងចក្រ ក្នុងខណៈពេលពួកគេកំពុងធ្វើការ ហើយពេលនោះមានអ្នកខ្លះទ្រាំមិនបានក៏នាំគ្នារត់ចេញ បង្កការជ្រួលច្របល់ពេញរោងចក្រ ដែលជាហេតុធ្វើឱ្យអ្នកកម្លាំងខ្សោយដួលសន្លប់ជាបន្តបន្ទាប់ និងត្រូវបានគេបញ្ជូនទៅសង្គ្រោះបន្ទាន់នៅគ្លីនិកឯកជនក្បែរនោះផងដែរ ៕
ចែករំលែកព័តមាននេះ