ខេត្តកំពង់ឆ្នាំង ៖ ជនសង្ស័យម្នាក់ត្រូវបានកម្លាំងនគរបាលព្រហ្មទណ្ឌកំរិតធ្ងន់ នៃស្នងការដ្ឋាននគរបាលខេត្ត ធ្វើការចាប់ឃាត់ខ្លួននៅវេលាម៉ោង១០និង៣០នាទីព្រឹក ថ្ងៃទី២៨ កក្កដា នៅលំនៅ
ដ្ឋានរបស់ខ្លួន ស្ថិតក្នុងភូមិស្ពានពោធិ៍ ឃុំសេដ្ឋី ស្រុកសាមគ្គីមានជ័យ ក្នុងបទចោទប្រកាន់ធ្វើអត្តសញ្ញាណបណ្ឌ័ក្លែងក្លាយឱ្យប្រជាពលរដ្ឋប្រើប្រាស់ ។
លោក ឌុច ចំរើន នាយការិយាល័យនគរបាលព្រហ្មទណ្ឌកំរិតធ្ងន់នៃស្នងការដ្ឋាននគរបាលខេត្តឱ្យដឹងថា ដោយមានសេចក្តីរាយការណ៏របស់មន្ត្រីនគរបាលការិយាល័យស្ថិតិនិងអត្តសញ្ញាណប័ណ្ណ ថា មានប្រជាពលរដ្ឋ នៅស្រុកសាមគ្គីមានជ័យ មានអ្នកប្រើអត្តសញ្ញាណប័ណ្ណក្លែងក្លាយជាច្រើននាក់ សម្រាប់យកទៅដាក់ពាក្យសុំចូលធ្វើការងាររោងចក្រ ពេលនោះលោកឧត្តមសេនីយត្រី ប្រាក់ វុឌ្ឍី ស្នងការនគរបាលខេត្ត បានដាក់បញ្ជាឱ្យលោកដឹកនាំកម្លាំង ចុះស្រាវជ្រាវ ក្នុងស្រុកសាមគ្គីមានជ័យហើយក៏បានប្រទះឃើញមានអ្នកកំពុងប្រើប្រាស់អត្តសញ្ញាណប័ណ្ណក្លែងក្លាយពិតមែន ។ លោកបន្តថា ក្រោយពីធ្វើការសាកសួរបានដឹងថា ពួកគាត់ជាប្រជាពលរដ្ឋបានធ្វើអត្តសញ្ញាណប័ណ្ណនេះនៅហាងថតរូបបិតកាតមួយកន្លែង មានទីតាំងស្ថិតក្នុងភូមិស្ពានពោធិ៍ ឃុំសេដ្ឋី ស្រុកសាមគ្គីមានជ័យ បន្ទាប់មកលោកបានរាយការណ៏ជូនលោកស្នងការ និងបានរាយការបន្តទៅលោកព្រះរាជអាជ្ញាអមសាលាដំបូងខេត្តហើយបានអនុញ្ញាតអោយនាំខ្លួនមកសាកសួរ នៅស្នងការដ្ឋាននគរបាលខេត្ត។
នៅចំពោះមុខសមត្ថកិច្ច ជនសង្ស័យឈ្មោះ សោម វណ្ណៈ អាយុ២៩ឆ្នាំ មានទីលំនៅខាងលើបានសារភាពថា រូបគេពិតជាបានធ្វើអត្តសញ្ញាណប័ណ្ណក្លែងក្លាយពិតមែន ។ រយៈកាលកន្លងមករូបគេធ្លាប់បានធ្វើឱ្យប្រជាពលរដ្ឋដែលដាក់ពាក្យចូលធ្វើការរោងចក្របានជាង១០នាក់ប៉ុណ្ណោះ ។ ចំពោះពិធីធ្វើគឺគេយកអត្តសញ្ញាណប័ណ្ណពិតប្រាកដមកស្គែន ហើយលុបឈ្មោះលុបរូបថត និងលុបថ្ងៃខែ រួចដាក់រូប ឈ្មោះ និងថ្ងៃខែរបស់អ្នកថ្មីចូលវិញ ដោយក្រៅពីនោះនៅលំនាំដើមទាំងអស់ ។ ចំពោះតម្លៃវិញគេយកអត្តសញ្ញាណប័ណ្ណមួយសន្លឹកពី៣ម៉ឺនទៅ៤ម៉ឺនរៀល ៕
ចែករំលែកព័តមាននេះ