ខេត្តកណ្តាល ៖ យុវជនម្នាក់បានរងរបួសធ្ងន់ធ្ងរដោយសារសត្វពស់មានពិសចឹក ខណៈដើរទៅមើលគោដែលចងនៅខាងមុខផ្ទះ ក្បែរច្រំាងទន្លេ ។
ហេតុការណ៏នេះ បានកើតឡើងនៅម៉ោង៣និង៣០នាទីរសៀលថ្ងៃទី២៨ កក្កដា ២០១៤ នៅក្នុងភូមិពោធិញាណ ឃុំគគីរធំ ស្រុកកៀនស្វាយ ។
យុវជនរងគ្រោះឈ្មោះ ហួត សុភណ្ឌ័ អាយុ២១ឆ្នាំ រស់នៅក្នុងភូមិ-ឃុំកើតហេតុខាងលើ ។
បើតាមអ្នកឆ្លើយឆ្លងព័ត៌មានកោះសន្តិភាពបានស្រង់សំដីក្រុមគ្រួសារសាច់ញាតិជនរងគ្រោះបញ្ចាក់ឲ្យដឹងថា មុនពេលកើតហេតុ យុវជនរងគ្រោះបានដើរទៅមើលគោរបស់ខ្លួនដែលចងឲ្យស៊ីស្មៅនៅច្រំាងទន្លេខាងមុខផ្ទះ លុះពេលដើរមិនទាន់ដល់ផង ក៍ត្រូវសត្វពស់មានពិសមិនស្គាល់អត្តសញ្ញាណចឹក ហើយជនរងគ្រោះស្មានតែមុតឈើចុងស្រួច មិនចាប់អារម្មណ៍ តែពេលដើរទៅមុខបានមួយសន្ទុះក៏ដួលស្រែកហៅអ្នកភូមិឲ្យជួយតែម្តង ។ បច្ចុប្បន្ន ក្រុមគ្រួសារកំពុងដឹកបញ្ជូនមកសង្គ្រោះបន្ទាន់នៅមណ្ឌលសុខភាពឃុំគគីរធំ ។
ក្រុមមន្រ្តីអាជ្ញាធរមូលដ្ឋានបានធ្វើការអំពាវនាវឲ្យប្រជាពលរដ្ឋទំាងអស់ ត្រូវមានការប្រុងប្រយ័ត្នខ្ពស់ចំពោះសត្វមានពិស ពិសេសសត្វពស់នារដូវវស្សាដែលតែងតែបង្កគ្រោះថ្នាក់ដល់ពលរដ្ឋជាញឹកញាប់ ៕
ចែករំលែកព័តមាននេះ