២០ថ្ងៃក្រោយបើកធ្វើប្រតិបត្តិការយោធារបស់អុីស្រាអែលមានឈ្មោះថារបងការពារក្រុមប្រឹក្សាសន្តិសុខអ.ស.ប បានរួមប្រជុំជាបន្ទាន់ កាលពីយប់ថ្ងៃទី២៧ មក២៨ កក្កដា នៅក្រុងញូវយ៉ក ។ ប្រទេសទាំង១៥ ជាសមាជិកបានអនុម័តសេចក្តីថ្លែងការណ៍រួមមួយ ដែលអំពាវនាវឱ្យមានបទឈប់បាញ់គ្នាមនុស្សធម៌ជាបន្ទាន់ និងដោយគ្មានលក្ខខណ្ឌនៅជ្រោយហ្គាហ្សា ។
សេចក្តីថ្លែងការណ៍រួមនោះ លើកឡើងដោយប្រទេសហ្ស៊កដានី ជាប្រទេសអារ៉ាប់តែមួយគត់ជាសមាជិកក្រុមប្រឹក្សាសន្តិសុខ អ.ស.ប អំពាវនាវដល់អុីស្រាអែល និងក្រុមហាម៉ាស់ ឱ្យពន្យារពេលបទឈប់បាញ់គ្នាពេញមួយថ្ងៃនាថ្ងៃទី២៨ កក្កដា ជាថ្ងៃបុណ្យអ៊ិស្លាម Aid-El-Fitr ដែលកំណត់ពីការបញ្ចប់ខែតមរ៉ាម៉ាដាន និងហួសពីថ្ងៃនោះទៀត ។ អ.ស.ប ស្នើដល់ភាគីទាំង២ ឱ្យគោរពពេញលេញនូវច្បាប់មនុស្សធម៌អន្តរជាតិ ពិសេសច្បាប់ទាក់ទិនដល់កិច្ចការពារជនស៊ីវិល ។
កាលពីយប់ថ្ងៃទី២៧ កក្កដា អគ្គលេខាធិការអ.ស.ប លោក បាន គីមូន បានអំពាវនាវដោយប្រើពាក្យមុឺងម៉ាត់ឱ្យមានបទឈប់បាញ់មនុស្សធម៌២៤ម៉ោងមួយ ។ ពាក្យប្រហាក់ប្រហែលគ្នានេះក៏ត្រូវបានប្រើដោយប្រធានាធិបតីអាមេរិក លោក បារ៉ាក់ អូបាម៉ា ដែលបានពិភាក្សាតាមទូរស័ព្ទជាមួយនាយករដ្ឋមន្ត្រីអុីស្រាអែល លោក បេន ចាមីន នេតាន់ យ៉ាហ៊ូ កាលពីថ្ងៃទី២៧ កក្កដា ។លោក អូបាម៉ា អំពាវនាវឱ្យមានបទឈប់បាញ់គ្នាជាបន្ទាន់មួយ និងដោយគ្មានលក្ខខណ្ឌ ៕
ចែករំលែកព័តមាននេះ